Beni W Benak

أسفل خط البؤس

2011-11-28T03:27:00.001+02:00

مناخ غير مناسب للعمل والحياة, كمية ضغوط رهيبة واقعة عليا, أنا فقدت الاهتمام بكل حاجة وباقيت علي طول عيش في قلق وتوتر.

مش عارف الاقيها منين ولا منين, حال البلد زفت والمجلس العسكري سارق البلد وانا واثق أن مافيش أي خير هيجي من وراهم وان حال البلد هيفضل كما هو, معنديش أي امل وحاسس ان ربنا كاتب علي البلد ديه تعيش منهوبة ومتخلفة طول عمرها.
و من ناحية تانية مزنوق في الكلية, مفروض فاضلي 4 سنين كمان علي ما اتخرج, وكل سنة بدفع مصاريف 10000 جنية, وهفضل مزنوق وبحوش فلوس الكلية ديه لمدة 4 سنين قدام, و أي فلوس هكسبها هتروح علي الكلية, يعني هفضل تحت ضغط وهم طول المدة ديه ومش هعرف أفرح ولا اعيش حياتي لاني مزنوق في فلوس طول الوقت.

أما الشغل, مش عارف اركز في الشغل وسط كل الدوشة ديه, البلد اللي حاليها يدوش, ورحاب اللي الله يكون في عونها وربنا هيحاسب أهلها علي اللي بيعملوه فيها ديه - ياريت لو قرأتي البوست ده في يوم يا رحاب متزعليش, انا بفضفض مع نفسي وده اللي بيدور جوايا -, هما كاتمين علي نفسها وهي مفروض تكون مصدر البهجة في حياتي وحياة اللي حواليها, بالعكس هي مش عارفه تسعد نفسها, ووراها هم كبير الله يعينها.

صعب اني اعرف اركز وانتج وسط كل ده, انا فعلا تعبت ومش عارف انا في الوضع ده ليه؟ ايه اخدت شوية قرارات غلط واتصرفت غلط في أوقات كتير, بس النتيجة صعبة قوييييي, قوييي, مش لاقي مفر ولا مهرب. مش عارف ازاي اطلع من اللي انا فيه ده, هل كل اللي قدامي اني اصبر واشتغل زي المكنة لحد ما اتخرج وبعد أشتغل زي المكنة تاني علشان اعرف ادبر مصاريفي ومصاريف بيتي بعد الجواز؟ هل ديه الحياة اللي مكتوب عليا اعيشها؟

ليه مبقاش زي باقي الناس مرتاح بالي في دنيتي, ليه ماكونش بتعلم صح واعيش عيشة صح طبيعية, ليه كل الظروف ديه عليا أنا.
أنا عارف ان ربنا رازقني بنعم كتير والحمد لله, وانا راضي يا رب, بس علي الأقل اقبلني يا رب وسط عبادك الصالحين, ساعدني أتقرب منك علشان أعرف ارتاح نفسيا, لاني بعقلي وتفكيري مش لاقي مهرب ولا مفر من الوزنقة اللي انا فيها.

وللاسف محدش مقدر ولا حاسس باللي انا فيه, وكل الأطراف اللي حواليا بيمثلوا ضغط عليا بقصدهم أو من غير, أهلي بيضغطوا عليا بأحساسي الرهيب في مسئولية ممكن مش وقتها دلوقتي, وأهل رحاب الله يهديهم وربنا يجعلني عزيز وعالي وغني وقوي ولا احتاجهم في يوم لانهم وسط كل اللي انا فيه لاهما راحمني ومحتوييني ولا هما عاتقني, هما مش عايزين يخاطروا بأي حاجة وعايزين يكسبوا بكل النواحي لتحقق قواعدهم واهدافهم هما تحقيق احلامهم هما وان الدنيا تمشي زي ما هما مخططين وبس ومش مهم باقي الأطراف, مش مهم لانا ولا بناتهم ولا اي حد, هما مؤمنين ان الخطة اللي حاطينها هي الأصلح للكل وشايفين ان ديه الطريقة اللي بينفعوا بيها ولادهم, بس للأسف هما مدمرين حياتها ومخلينها تعيسة برغم أن ربنا مديها مزايا تخليها تعيش أحسن عيشة في الدنيا.

بيخبطوا فيا علي دماغي ومش راحمين ولا مقدرين, هيجي اليوم وانا ارحمهم واقدرهم علشان يعرفوا ان الانسان ميقدرش يعيش علي خطة وبس, احنا مش في الجيش ولا علي الجبهة, ديه حياة مش معركة.

انا كل ما أفكر مبعرفش ازاي اخرج من اللي انا فيه ده, كل اللي قدامي هو أني اشتغل وادرس واخلص سنين الدراسة اللي فاضلالي ديه واستحمل علي قد ما أقدر. بس متغاظ جدا, ومش قادر استحمل اني ادرس لمدة 4 سنين كمان, مش عارف هعملها اذاي, السنة الجاية زمايلي في مودر هيتخرجوا وبنت خالتي السنة دي هتتخرج واخوها السنة اللي بعد الجاية, واخويا هيتخرج السنة ديه وهفضل أنا اللي لسة بدرس, هاكون ضيعت 8 سنين من عمري علي الدراسة اللي مالهاش اي لازمة. طيب أعمل ايه؟ اسيبها واسافر؟ طيب مانا لو سافرت هعيش طول عمري من غير شهادة ولو سافرت ماهايصدقوا ياخدوا حبيبتي مني ويوزعوها علي الغريب, محتار ومش عارف أعمل ايه؟ اذاي احافظ علي دراستي وشغلي وهي وأهلي وفي نفس الوقت أعيش حياة طبيعية.اذاي اقدر اعيش وسط كل الضغط ده الفترة الطويلة الجاية ديه؟ اعمل ايه ؟ فعلا محتار مش قادر أشكي أو اتكلم. نفسيا متدمر ومش باقي علي حياتي, مش عارف اي طريق أو سكة ارتاح فيها, يمكن سكة الله هي اللي هتريحني, بس عايزة جهاد وشقاء, ربنا يكرمني واكون قدها.

أنا هحاول ان شاء الله اتقرب الي الله, من بكرة باذن الله, ويا رب ساعدني واكرمني والهمني الصبر.

2011-04-05T01:22:00.000+02:00

انا مش عارف اقول ايه, بس الايام الجاية صعبة وفيها تحديات كثيرة.هيبقي في قرارات صعبة لازم تتخذ ومجهود كبير. ربنا المعين.

رسالة الي الرئيس مبارك

2011-02-06T00:23:00.000+02:00

السيد الرئيس/ محمد حسني مبارك

تحية طيبة وبعد,

بما أن كل الرسميات قد أسقطت كما أسقطت هيبة رجال الشرطة من الشارع فانا هتكلم بالعامية. من كام سنة لما طلعت اشاعة انك توفيت كتبتلك رسالة -ضاعت مني للاسف- وسألتك فيها انت ناويلنا علي ايه, كنت بسألك انك مفكر لشعب مصر في حاجة ولا سايب الامر لله. وللاسف دلوقت مستحيل أعرف الاجابة اللي اتأخرت جدا لدرجة أن الشعب الراضي ثار ومسح أي مخطط كنت مرتبه. يا ريس أنا بحترمك جدا لاسباب كتير مش وقت قوالها, بس ليا عندك عتاب كبير. أنت يا ريس سيبتنا في وسط شلة حرامية أوهموك أنهم متبعين تعليماتك وهما نازلين في البلد سرقة ونهب وخراب. سلمتنا في أيد حبيب العادلي اللي مابيعرفش يفرق بين البني ادميين والبهايم, سيبته يتعامل معانا بكل لا انسانية لحد ما جيه يوم ضرب علينا نار وقنابل وسحلنا بعربياته وسلط علينا بلطجيته. وسلمتنا في ايد صفوت الشريف العقرب اللي لعب بينا وكان هو سيد العرائس المتحركة, خنقنا وفقرنا وجابلنا أمراض الدنيا. وغيرهم كثير ياريس. وغير كل ده سيبت جمال يحس انه في عزبة أبوة, وسيبت عز -صديق سوء- يتقرب من جمال و يتشعبط علي اكتافه. من الاخر يا ريس سيبت شوية فاسدين يفتوا في البلد ويطيحوا فيها فساد, واللي عينته محترم كانت شخصيته ضعيفة ماعرفش ياخد موقف من الفساد. يعني يا ريس سيبتنا من غير سلاح وسط شلة حرامية.

دلوقتي يا ريس كله جيه علي دماغك أنت, بقيت رمز من رموز الخيانة والفساد والديكتاتورية والاستبداد, مقدمتش ولا نية حسنه تجاه الشعب غير الكلام والكلام, ارصدتك في البنك بالملايين, سلمت علي كل اليهود قتالين القتله, مكنش ليك ولا موقف يخلي المصري يمشي رافع راسه, كل الأمور المعلنه ضدك يا ريس, دلوقت مستحيل حد يصدق انك تستاهل الاحترام. مهما اتكلم وأقول محدش راضي يتقبل لانك عمرك ما أعلنت عن شيء. أو بمعني تاني, بطولتك ووطنيتك ماتظهرش الا للي مستعد يدور عليها ويبذل مجهود شديد جدا.

دلوقت باقيت عزيز قوم ذل, وللاسف مش هيرحموك, الله أعلم انت بتدبر ايه لنفسك. بس انا متأكد انك فعلا ماشي بعد كام شهر, بس معرفش هتقعد في مصر فعلا ولا لا. قبل ما تمشي يا ريس وضح لنا نواياك الحسنه, انشل البلد من اللي هي فيه وحاسب الفاسدين وعاقبهم بأقصي العقوبات. حل مجلس أحمد عز الفاسد وغير مواد الدستور اللي تخلينا ننتخب رئيس يمثل ارادتنا, كل فاسد سرق رجعلنا فلوسنا منه ومهد للرئيس اللي يجي من بعدك انه يقدر يصلح في الدولة.

اتمني يا ريس تكون راضي عن نفسك, بتمني فعلا انك تكون مجهز لاخرتك. الله يهدينا ويهديك.

الامضاء
مواطن مصري

اميرة محبوسه في ابراج احزانها

2011-01-02T18:33:00.009+02:00

انا مش عارف ليه مباقتش اعرف اساعدها زي زمان, و ليه مباقتش عارفه تسمع كلامي .. يمكن انا فعلا كلامي مش منطقي ؟؟ يمكن باقول حلول بعيد عن واقع التطبيق العملي ؟ بس انا جربت اللي هي فيه, و انا عارفها و عارف ظروفها, و عمري ما كنت بتكلم في الهوا قبل كده .. دا انا معروف اني بعرف احل المشاكل و اريح اللي حواليا.

يمكن هي فقدت الشعور بالثقه من ناحيتي, يمكن في الأول كانت شايفاني حاجة كبيرة جديرة بالثقه و الاتباع, كانت شايفاني حكيم, و دلوقتي رأيها اتغير .. دا اخر مره قولتلها حاجة فيها و سمعت كلامي عن ثقه كان من زمان قوي.. طيب ليه حاسه اني مش فاهم, يمكن هو ده السبب انها مش بتاخد برأي .. طيب يمكن انا مش فاهم فعلا .. بس اذاي ؟ انا بفهم الناس و بعرف اتعامل معاهم .. و انا فاهمها كويس جدا, اكتر من نفسها .عارف ايه مشكلتها اكتر منها, و شايف اللي هي فيه من نطاق اوسع و قادر احكم.

اعتقد لو من سنه ولا اتنين قولتيلها نفس الكلام اللي باقوله دلوقت كانت اخدت بيه, بس في حاجة اتغيرت .. هل هي الظروف ؟ الظروف ممكن تقلل ثقة الناس في بعضها او تفقد حد قدرته علي القول السديد ؟؟

انا فعلا محتار, انا اعرف عنها من زمان انها بتحب تشوف كل المشاكل مشكله كبيرة واحده, و هي اعترفت انها متشائمه و بتحب تعيش تحت عناوين و شعارات مالهاش اي اساس من الصحه , او بلاش بتحب, بس مياله الي .

طيب اتعامل مع ده اذاي؟ قبل كده كانت بتثق فيا و علشان كده عرفت اخرجها من الوضع, لما كنت باقولها معلش خلاص بيبقي معلش, دلوقت كلامي مبقاش له اي قيمه ولا لاذمه, اصلا باقيت حاسس انه من الاحسن اني اسكت, يمكن هي شافه حاجات انا مش شايفها بس لما بسألها بتجاوب بكل اللي انا شافه, يعني مافيش حاجة غايبه عندي.

فعلا مش عارف المشكله فين, قله ثقه؟ ولا ظروف؟ ولا تعود؟ ولا حاله نفسيه عابره؟ ولا ضغط شديد؟
ساعات بحس اني عايز انشلك من اللي انت فيه ده, من نفسك .. لما بتكشري كده و تنكدي علي نفسك بحس اني عايز اخطفك و افوقك.. بشدة و بلين , بس اعمل كده اذاي ؟؟ماهو غير متاح ..

ربنا يهديني و يهديكي, ربنا يصلح السبب او يغير فيكي الصفه ديه .. عارف انه صعب, بس انا شايف نفسي مش قادر اتعامل معاها كده, صفه تتعبك و تتعبني, و يا ريت تفهمي ان اللي انت فيه دلوقت ده ولا حاجة بالنسبه للي هتواجهيه بعد كده, فعلا ولا اي حاجة ....

اعملي علي انك تتخلصي من الصفه ديه, و متقوليش مانت كمان لما بتزعل بتعمل كده, عشان هاقولك لا .. انا بعدي الامور بعد فتره, و بالذات و انت موجودة, بيفرق معايا كلامك كتير .. اعرفي اني مش باقول الكلام ده عشان مش قادر استحملك, لا باقول عشان انا مش عارف اساعدك و بطلب منك تساعدي نفسك .. اخرجي مالجحور ديه .. خرجي نفسك بالعافيه و متستسلميش لها . طظ في الكون .. طظ في اللي هايحصل .. طظ في اي حاجة بس فوقي نفسك.

ربنا يعينيك .. حاولي متزعليش من كلامي, بس ده عشان خاطرك.

2011-01-01T02:53:00.002+02:00

بما اني بقالي سنه مكتبتش فيكي حاجة .. قولت استغل السنه الجديدة اني ابدأ اكتب فيكي تاني.

* عايز اخد كام قرار كده في السنه الجديدة, مش عارف بقي هقدر امشي فيهم ولا لا .. بس اديني بجرب.

* النهاردة الشوارع مليانه افراح, الناس كلها بتتجوز النهاردة .

عالمين بداخلي

2010-01-03T22:50:00.002+02:00

صديقتي العزيزة
اظنك لم تعرفي الكثير مما يدور بداخلي بعد, و لكني اظنك تعلمين ما يكفي لتعرفي مع من تتحدثين و الي من تبوحين باسرارك القليلة.

اليك بعض مما قد تتسائلي عنه:
بدخلي عالمين, عالم يخصني و عالم موازي له ولا يقل عنه اهميه و هو كله ملك لك لا يشاركك فيه احد, و عن علمي احدثك: هو مملكتي الصغيرة التي لا يخفي فيها سر عني و ما اعلمه عنها يجعلني اعتز بها و اغار عليها, و علي الرغم من ضعف قدراتي مقارنه بهذا العالم الخارجي الواسع - كحال بقيه البشر -, علي الرغم من ذلك فانا علي كامل الاستعداد للدفاع عن هذه المملكه بكل ما فيها من مادي و معنوي.

و عن عالمك, علي الرغم من ان ملامحه ليست واضحه بالنسبه لي بعد, الا اني اراقبه يزداد اتساعا يوما بعد يوم, و تصدر منه ارقي الالحان و يشع بنوره احلي الالوان و يرش العطور في كل الارجاء. اتابعه كلما هدأ العالم حولي قليلا او زاد من قسوته, فاجد فيه الراحه و بشكل لا افهمه يشعرني بالامان و الامل و السكينه و احيانا يمدني بالقوة وقت الحاجه اليها.

ما يفصل بين العالمين سور عظيم, اري جداره المطل من عالمي, اري فيه مشقه و تعب, و اري انعكاس الجدار من ناحيه عالمك وعد بالسعادة و الراحة, حتي انه في يوم هرب احد اتباع مملكتي حتي استقر بداخل اسوار مملكتك منتظرا اياي لاتبعه, هرب قلبي و مؤنسي فاصبح من ممتلكات عالمك و رسول يعد بما يعد ..

اردت ان اوضح شيئين في ما يتعلق بالعالمين: اولا, احيانا اغار علي الجزء الذي يخصني, اغار من كلمه رد صداها في ارجاء مملكتك و لم اسمع لها رد, او ابتسامه اطل بها علي جدارك ولا اجد المقابل لها, و ما يزيدني هذا الا رغبه في تحطيم هذا السور الذي يفصل بيني و بين مملكتك.

ثانيا, محاولاتي في تحطيم الجدار ليست مجرد كلمات ووعود و لكنها افعال تنتظر الوقت لتبدأ في التحرك, احيانا - و قد تعلمين او لا اخبرك -, احيانا تموت مجموعه من افعالي لاسباب كثيره بعضها لتقصير مني و الاخر لشيء لم يكن في الحسبان, في الحالتين و بعدما تموت افعالي انظر للسور فاراه قد ازداد طولا و عرضا, و بقدر ما يحزنني هذا الا انني التفت لمملكتي فاري القتلي يرقدون فابكي عليهم, عليهم هم. فالامر سيان, العالمين بداخلي, و كما اتمني ان احطم هذا السور اتمني لو تبقي مملكتي في سلام.. العالمين بداخلي

هيرجع, اجلا ام عاجلا راجع و بارادته

2009-12-30T03:33:00.002+02:00

انا من غيرك مسخ, شبه بني ادم, كل انفعلاتي و افراحي و احلامي و انجازاتي مالهاش وجود, سيناريو فيلم فاشل بكتب احداثه بنفسي و بنفسك بتهاودني فيها, بضحك علي نفسي لما احب و اقول ده الحب, و لما افرح و اقول ديه الفرحه, و اما انام و اقول ده النوم, ده الاكل, ده الخروج, هي ديه الحياة, كل ده مالوش وجود لانك مش فيه .. بتراقبني و انت عارف اني من غيرك تايه و اني لا يمكن ابعد عنك و ارتاح, بتخيلك بتقول في نفسك " هيرجع, اجلا ام عاجلا راجع و بارادته", و انا ارادتي ضعيفه, بضحك علي نفسي عشان استخبي منك و بضحك علي نفسي اكتر لما يتهيألي اني مش عايش في ظلك..

يا رب, انا عبدك و تايه منك, ساعدني الاقيك, انا من غيرك مش عايش, من غير بركتك و رحمتك و تساهيلك و عطفك علي, باشوف عبادك اللي في رحمتك و اللي علي طريق هدايتك و احسدهم, باتمني اكون منهم و ادور وشي و اتلهي في اي شيء تاني, اناني مع نفسي علي نفسي, و كل يوم اشوف مليون اثبات ان الدنيا من غيرك ما تسوي, و انك الباقي الوحيد و الاكيد و اي شيء اخر مجرد كماله .. انت الاساس و انت الهدف, و السعي اللي مش لاجلك باطل, و السعي الباطل عاطل و عمره ما بيريح.

تعبت يا ربي, انت العالم بحالي و عارف قد ايه انا محتاج بركتك و رحمتك, محتاج وجودك, ايام ما كنت عارف اني في ظلك كنت ملك حياتي, دلوقتي انا خادم في بلاط الناس, ساعدني ارجوك لاني محتاج مساعدتك.

رب ارجعون

شهور الشتا الخنيقة

2009-12-08T14:05:00.003+02:00

السلام عليكم
عارف انا ان شهور الشتاء بتمر عليا باسوأ ما يكون من الحالات النفسيه, غير البرد و المرض و غيوم السما حاجات كثيره بتأثر فيا بالسلب و منها الخمول الرهيب و الكسل و كأني كسلان افكر حتي .. و من هنا تستلمني افكار تانيه العن و ابدأ اشوف كل شيء اسوأ ما فيه و اكبر الامور و لحد ما احس اني في كارثه ..
شهور غبيه شهور الشتاء علشان كده بكرهه و عشان كده كل اللي بتمناه دلوقتي هو ان الكام شهر اللي جايين دول يعدوا علي خير من غير عقد نفسيه ..ربنا يستر

حاجات قديمة

2009-09-15T08:36:00.001+02:00

السلام عليكم
لطالما شغلني الحديث عن الرجولة و معانيها, و كم من شخص سألته عن معني أن يكون المرء رجلا و كيف للاسنان ان يفرق بين رجل و اخر, و لكن مع طول المدة استطعت ان استنبط بعض المفاهيم و المعاني و حاولت تطبيقها, و لكني أحس اليوم اني بعدت عنها بضع خطوات و اني نسيت ما كنت اسعي اليه في بحثي و احتفظت بما وجدته في أوراق اعرضها هنا اليوم, لعلها تحثني علي العودة الي ما كنت ارغب فيه:

أولا, بحثت عني المعني الحرفي لكي استطيع التفرقة بينه و بين وصف الرجل فوجدت الله قد استخدم تعريف الرجل كمقابل لتعريف الانثي, مثلا كهذه الايه "للرجال نصيب مما ترك الوالدان والأقربون وللنساء نصيب مما ترك الوالدان والأقربون مما قل منه أو كثر".

بحثت عن بعض المعاني لصفة الرجولة التي ذكرت في القران ووجدت الاتي:
مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلا
و من هذه الايه استخرجت: الصدق و الوفاء بالعهود و التضحية في سبيل القضية و القرب الي الله

رِجَالٌ لا تُلْهِيهِمْ تِجَارَةٌ وَلا بَيْعٌ عَن ذِكْرِ اللَّهِ وَإِقَامِ الصَّلاةِ وَإِيتَاء الزَّكَاةِ يَخَافُونَ يَوْمًا تَتَقَلَّبُ فِيهِ الْقُلُوبُ وَالْأَبْصَارُ
و من هذه الايه استخرجت: البعد عن اللهو في سبيل الجد و ذكر الله كثيرا و التعبد و الخوف من الاخرة

فِيهِ رِجَالٌ يُحِبُّونَ أَن يَتَطَهَّرُواْ وَاللّهُ يُحِبُّ الْمُطَّهِّرِينَ
و من هذه الايه استخرجت: طهارة النفس و الجسد, و لطهارة النفس سبل كثيرة منها التخلي عن الحقد و الحسد و البخل و الغيرة و باقي الصفات التي تباعد بين المرء و قلبه

لَّمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ
و من هنا: التعلق بالمساجد

ديه بعض الحاجات القديمة اللي كانت عندي, قلبت فيها من جديد علشان حاسس اني بعدت بشكل ضايقني عن ما كنت اسعي اليه, بس عادي الدنيا تلاهي المهم اني بفكر من جديد .. الحمد لله

الا تعلمين ؟؟

2009-08-29T06:52:00.005+02:00

الا تعلمين ؟؟
فإن كنت لا تعلمين فقد حدثتني
زهـــور الـيـاسمــيــن
بان بـهجـتـك فـاقـت بهـجتـها
و كـلامك يــسُـر الــسـامـعـين

الا تعلمين ؟؟
فإن كنت لا تعلمين فقد اقر لي
مــــوج الـبــحــر
بــان كـرمـك فــاق كـرمـه
و بـــالخير يجــود كـــل حين

الا تعلمين ؟؟
فٳن كنت لا تعلمين فقد نادتني
بـلــقـيـــس ســـبــأ
و داولــــتـــني كـثيــرا
و عــنـك هـي مـن الـسـائلين

الا تعلمين ؟؟
فإن كنت لا تعلمين فقد اكد لي
نــــور الــصــبـــح
بان لـعقـلك نـوار يـهدي لسـبيـل
اراده الله للعـالمين

الا تعلمين ؟؟
فإن كنت لا تعلمين فقد نُصِحت
قــلـــبـــا و عــقــلا
الا ابخــل علـيـك بــيد
تمد الــيك لتــســعـدين

الا تعلمين ؟؟
فٳن كنت لا تعلمين فقد احرقني
بـكــاء عـينـيـــك
و ٳن لم اراه جـــهــره
و لم اكـن مـن الــشـاهـديـن

الا تعلمين ؟؟
فٳن كنت لا تعلمين فقد الح علي
ضـــــــــوء الــنـهـار
الا انــام قـبـل ان اكـتـب
ما اظـنـه اقـرار بما يـسـتـكـين

الا تعلمين ؟؟
فٳن كنت لا تعلمين فاليوم تعلمين
انـه ان جــاء يـومـــا
لم تـشرق فيه شمـس, فـلا حاجه لــنـا بـها
فـانت ها هـنا تشـرقــــين

ان يجعلهم عونا لي و يجعلني سندا لهم

2009-08-28T17:55:00.002+02:00

يلتفون حولي مهما حدث, و لم يصيبني شيئا يوما الا ووجدتهم الاقرب الي, و لم يراودني الشك ولو يوما انها يسعون الي شيء يخصهم قد يؤذيني .. اسرتي بارك الله لي فيها ..

مهما تعاظمت الخلافات و مهما تفرقنا, و مهما بعدت عنهم, فيوم أرجع اليهم محتاج اجدهم في انتظاري علي عكس كل الاخرين .. فلكل شخص دائره يحيطها بحياته و قد يفعل اي شيء من اجلها .. قد أكون انا الوحيد الذي في امكانه اضافه اشخاص الي القائمه لا ينفعوني بشيء و بعضهم قد يضرني احيانا, الا اني استطيع ان احمل بقلبي الكثير و استوعب الكثير ..
لست بملاك أو شيء من هذا, و لكن الله رزقني بظروف تباعدت فيها الناس عني و اصبحت وحيدا فخلا قلبي و اصبح واسعا رحبا قادرا علي استيعاب المزيد, و اما عن الاخرين - بعض من قابلتهم - فقد امتلات قلوبهم بما يكفيها ولا مكان لهم لاخرين لا ينفعونهم في شيء و بالتالي لا مكان لهم لشخص قد يضرهم بجهاله ..

عوده الي اسرتي, ارجو من الله ان يجعلهم عونا لي و يجعلني سندا لهم, و ان يجعل مسراتي عندهم و يجعل عندي مباهجهم, و ان يكفيني بهم عن من سواهم, فهم الأولي بالحب و هم الأولي بالمحبه و العطاء ..

- و لكن -
أري حولي اشخاص يستحقون المحبه و يستحقون الخير, فارجو من الله ان يعينني علي مساندتهم مهما اذوني, و ان يرد لي ما افعله من خير فيفعله معي احد يوما ما .. فمهما طال الانتظار فلن امل في البحث عن ما اريده .. و مهما كانت ابصاري لا تدركه فالله سيجعلني بالغه, فانا واثق من ان الله سيعنني لانه اعلم بما في نفسي ..

هذا صراطي مستقيما فاتبعوه

2009-08-27T06:07:00.002+02:00

وأن هذا صراطي مستقيما فاتبعوه ولا تتبعوا السبل فتفرق بكم عن سبيله .. ايه 153 سوره الانعام

هذا الصراط المستقيم هو وحده من سيجعلنا نصل لغاياتنا .. المشكله ليست في صعوبه المضي فيه و لا في جهاد النفس .. المشكله الحقيقيه في معرفته و تفريقه عن باقي الطرق .. فعلي مرمي البصر تتشابه الخطوط و تستقيم كلما تباعدت عن العين, و لا يهدي الله الا من يشاء .. و لكن علينا ان نقوم بدرونا في البحث عنه, و قد نجده هو الاقرب و الايسر في الوصول اليه .. و لكننا لا نحاول, كلنا تائهون نرضي انفسنا ولا نبحث عن ما هو صحيح, و ان بحثنا لا نجد ..

كم من مره بعدت عن الصراط و كم من مره عدت اليه, و كل مره اعود فيها اجده هو الايسر من الناحيه النفسيه و لكنه الاصعب في المضي فيه ..

يا رب اهدينا .. الدنيا اتلغبطت قوي
اهدينا يا رب

2009-08-25T23:37:00.002+02:00

و هتتنسي يا بني ادم و تكون ماضي في قصص قديمه او ذكري عابره تمر مرور الكرام في عقل يأكل الزمن من ذاكرته .. و قد يأتي يوما تمر فيه امام اعينهم رؤي العين و لا يلحظونك .. و قد يأتي يوما تموت ولا يترحمون عليك .. و كله في علم الغيب ..

فامن كما امن من امنوا .. و اصبر صبرا جميلا و لتعلم ان الخير طريقه غير معلوم ولا يصل اليه حقيقه الا من يتوكل علي الله .. فاسلم تسلم

سلام عليك

2009-08-25T20:29:00.003+02:00

احسن و انسب شيء للراجل انه يتجاهل تقلباته النفسيه, و يحكم بان المشاعر و الافكار المرتبطه بها مجرد سبل لتدمير الانسان نفسه بنفسه .. كنت زمان باشوف في الافلام -عربي و اجنبي- أن البطل بيطلع رومانسي و بتظهر مشاعره طوال مده الفيلم مع شويه حبكه دراميه او اكشن, لكن في الحقيقه ان ديه مجرد افلام, الواقع البعيد عن اي وهم هو ان المشاعر هي اكبر اذي للانسان .. او علي الاقل هي هيروين طبيعي موجود في دمه ان اطلقه غاب عن الوعي .. و ما اصعب ان يغيب الرجل عن الوعي ..

في ظل ظروفنا الحاليه معشر الشباب, و بعيدا عن الكلاب مننا, الفرافير و ذوي المعالق الذهب .. بتحكم علينا الظروف اننا نكون بين حاجتين, الخطأ الذي لا نقبله ابدا و الصواب الذي لا نقدر عليه, و ان خضنا في الخطأ قليلا نكره انفسنا و ان تصبرنا علي الصواب قليلا تكرهنا انفسنا, و نبقي علي هذه الحال الي ما شاء الله .. و كل مره نقتل فيها مشاعرنا نحن لها و دفئها, و كل مره تصحو فيها و تزدهر يلعننا اهل الارض.

كلما زاد بي الزمن عمرا كلما اكتشفت ان ما كنت انتظر وقوعه مع مرور الزمن ليس كما تصورته, فلعنت قصص الحب التي سمعتها و الحكاوي المتعلقه بها, و علمت انه ليس مسموحا لنا ان نحب في زمنا كمثل زماننا, و انه المطلوب منا هو ان نعيش كالالات نعمل ولا نكل ولا نمل, نتجرد من كل المشاعر و نستنفذ طاقتنا للعطاء في العمل و الجهد, و ان نقاوم مشاعرنا كما نجتهد لنقاوم نزواتنا و ان نستغفر الله ان احببنا كما نستغفره علي ذنوبنا .. فالصور متقاربه و لا يفصل بين الحب و المعصيه فاصل, فكلاهما هلاك للنفس و كلاهما يغضب الله علينا, فالاول يغضبه لسخطنا علي احوالنا و الثانيه تغضبه لفعلتها .. و تتشابه الصور علي مدار العمر.

هو ليس تشاءم و انما هو نضوج, و ان حكمناها بالعقل فسيربح ظني, فالامور اعقد من ان نتشاور فيها و نتحاور, و لا يكلف الله نفسا الا وسعها و ليس في وسع بشر ان يكتم ما بداخله, ولكن بوسعه ان يقتله ..
ذلك الحلم الذي طالما راودني, و تلك الكلمه التي تمنيت ان تخرج من شفتاي يوما, كلاهما ليس مقدر ان يكون, فمهما رفضت الانسياق مع تيار ما يحدث في ايامنا تلك, و مهما عصيت و قاومت, فسيأتي اليوم الذي انساق فيه مع التيار لانه الانسب .. و لان غيره اكدت تجاربي انه يستحيل حدوثه ..

كما كنت اقول دوما .. هناك اشياء قد تكون أهم مما احكي فيه, اشياء اساسيه لا غني لنا عنها, و قد تكون هي دوائنا .. فلننسي و نعمل و نغرق انفسنا في بحر امواجه عاتيه فيهدنا و نخرج منه لا نقوي علي شيء سوي الثبات و من بعده نغرق انفسنا في نفس الجهد ان لم يكن اصعب ..
العباده و العمل و الانسياق مع المجتمع بكل تياراته, و نكون مثل بقيتنا من البشر .. فالتميز لا يؤتي بثماره, و قد نكتشف في النهايه ان ما كنا نظنه تميز منا قد كان تخلف و تقصير .. مالهم الباقيين, سيحيون حياة يسعدون بها و بيدهم ان يموتوا موتا من بعده جنه .. و ايه لازمه الكفاح الوهمي و المعانده مع تقاليد و سير المجتمع ..

مستسلم لتلك الامور .. و ان لاقيت فرصه ارجع بيها لتيار الفته هرجع .. و سلام عيلك افكارا زرعتها بالخير فطرحت سٌماً .. و سلام عليك قلبا احييته فالزمني جوار الهم .. و مرحبا بك حياتا كما الفتها من قبل .. و اللهم ان كان في ما اقوله صواب فيسره لي و ان لم يكن فبدلني تبديلا ..

ابن الـ700 شهر

2009-08-01T02:07:00.005+03:00

عمري اكتر من 700 شهر, مروا و كأنهم لحظه, حصل فيهم حاجات كتير منها اللي احب افتكره و منها اللي نفسي انساه .. غلطت كتير و خدعت كتير و ظلمت كتير .. و مافيش سبب عارف اقوله علشان اخلي الناس تغفرلي .. هما فاكرين اني مش حاسس بغلطي لكني حاسس بس مش عارف اقول اسف ..

يمكن لو كان الوقت بدري شويه كنت قدرت اصلح غلطاتي و ابدأ من جديد, انما الساعه جريت عقاربها و مبقاش ينفع, نفسي اقدر ابدأ من الأول بس ده مستحيل .. هي محاوله واحده في الدنيا و يا تفلح يا متفلحش .. انا ما فلحتش .. و اذيت نفسي و ناس تانيه معايا.

أنا كهل عايش جوه طفل او طفل عايش جوه كهل, قول اللي تقوله عني .. هسامحك لاني نفسي مش عارف, مش فاكر اصلا اذا كنت عرفت اعمل الصح يوم ولا مقدرتش ..

بيتقال عليا اناني, و يمكن انا اناني و مفكرتش غير في نفسي مع اني مسؤل عن حاجات حواليا, افتكرت ان وجود الحاجات ديه مجرد واقع و قدر و ان كل اللي عليا اني ارضي بالامر الواقع .. ارضي بوجودها و بس .. نسيت ان انا مفروض اعمل اكتر من كده بكتير..
جاري زرع غيط ووقت حصاده رفت عنيا عليه و علي جماله, و قلت لازم اعمل زيه و دبيت الفاس في ارضي و رميت البذور .. و نمت و خرجت و عيشت زي ما عيشت و نسيت الأرض و الغيط و الزرع .. و لما جيراني غيطهم طرح و عنيا رفت عليه تاني افتكرت اني عندي غيط .. رحت اشوفه و افرح بيه و اتباهي زي باقي الناس .. لاقيت الزرع عوده معوج و الريح تقوي عليه ما يقاوم .. تهزه نسمه برد او نفس عيل صغير قاعد جنبه .. لعنت و سبيت ابو اللي زرع و نزلت تقطيع في الغيط و لما تعبت سيبته و مشيت .. و اترميت علي كنبه اخد نفسي و انا باصص علي بواقي الغيط من بعيد .. الهوا بيكمل عليه من عمايلي .. و هفضل مرمي و سايب الغيط و مش ناوي اقوم و اشوفله علاج, مش عارف لاني اناني ولا لان الوقت فات ؟!!

يا اخوانا انا متهم. متهم بالعيشه و النفس, كل نفس في يوم خرجته هو دليل علي جريمتي, و المحكمه اللي بتحاكمني مافهاش رشاوي لان القاضي فيها مقامه عالي لا يقدر مخلوق يكلمه و ان تكلم الكل سكات .. هو هيحاسبني هيسألني:
سيبت الغيط ليه يابن الــ700 شهر ؟ عيشت ليه و خرجت يابن الــ700 شهر ؟ و في الاخر, نمت علي الكنبه ليه يا ابن الـ700 شهر؟ معملتش غير ان عيونك رفت علي زرع الناس ولا يوم بصيت لزرعك؟ فكرت انك سايبه يقوم بطوله من غيرك و انه طارح طارح من غير تسنيد . ... و ياريته ما طرح, ده حتي الزمن ساعدك و خلاه يطرح, بس مقدرش يساعدك اكتر من كده .. طلع معوج, ولا يوم فكرت تعدله, بل قطعته و قعدت علي الكنبه تتفرج عليه و الريح بتمايل فيه و تسمع بودانك طقطقه عوده و هو بينكسر..

و مهما قال القاضي, انا مافيش في ايدي شيء ولا عندي اجابه .. ولا ينفعنيش محامي ولا ندابه .. اللي خلص خلص و انتهي .. و هفضل مستني علي الكنبه لحد ما يندهلي القاضي و يحكم .. و هنام و أحلم بالزرع بيقولي:
كان نفسي افرح بخضاري ولا اخضريت, اخضر زرع جيرانك و رفت عيني منه و كان نفسي ابقي زيه, مسألتكش سماد زي ما هما سألوا .. كان نفسي بس تراعي عودي و تسندني بخشبه لجل اطلع عدل حبتين, حبتين بس .. أو حتي حبه .. بس اليوم و انا مراقبك و انت نايم علي الكنبه, علي قد ما انا متغاظ منك علي قد ما صعبت عليا, و همست للهوا يغطيك لحسن يجيلك برد, و انا عارف البرد صعب اذاي لاني طول عمري بردان.
تفتكر لو كنت راعيت ارضك كنت هتنام نومتك ديه و لا يسألش فيك فكهاني ؟؟ كنا هنبقي بضاعتك وسطهم تبيع و تكسب و تزرع تاني و تبيع و تكسب و تحصد تاني, متهيألي ده احسن من نومتك ديه, و ان كنت هتقولي انك شقيت و من الدنيا اتبكيت هقولك ارضك هي حياتك منها جيت و اليها راجع, منفعكش معافرتك مع الزمن و انت سايب ارضك, اللي يسيب ارضه يخسر يا ابن الـ700 شهر.

و اصحي مالنوم علي صوت الزرع, و ارمي عيني عليه القاه واقف بعوجته بيعافر مع الهوا, ارمي عليه نظره كمان مالهاش اي معني و اسيبه و اخرج اعافر مع دنيتي و اشقي, و ارجع بالليل انام علي الكنبه تاني و ارمي عليه بصه, و انام و احلم بيه بيقولي:
و عملت ايه ببصيتك يابن الــ700 شهر, لا قدمت ولا اخرت, قوم فز حاوط ارضك, انا معافر و مستنيك قوم بس اتحرك و احنا هنساعدك, نومتك بتضعفنا كل يوم و الاراضي حوالينا بتطرح .. و مع كل طرحه بينكسر فينا الامل اننا في يوم نطرح .. مين غيرك يعني هيبص لشويه زرع من ارض بارت ؟؟ قوم يابن الــ700 شهر.

و أقوم مالنوم اسب والعن في الزرع و قوله يا ريتني ما زرعتك ماتقلقش منامي, كان زماني نايم نومتي عالكنبه ولا حد صحاني, سيبني اعيش الكام يوم اللي فاضلين الله يخليك, سيبني يا اخي بدل ما ارجع اقطع فيك.
و ده الحال اللي انا عليه, يطاردني الزرع في نومي و اطارده في صحياني .. و كأنه عدو . عدو بدبحه

يا صاحبي ليا عتاب عندك

2009-07-23T04:39:00.005+03:00

بيني و بينك ... ان غبت في الكلام معاكي مش معناها اني ناسيكي, انا بس نسيت الكتابه او بطلتها, عارفه ليه ؟؟ علشان نفس الاسباب اللي خليتني ابدأها .. و اللي هي اني عايز ابقي انسان كويس ..
الميزة فيكي اني مش محتاج اشرحلك و انك فاهماني لوحدك, لو شفتي عندي في البيت هتلاقي الاوضاع كلها متغيره .. مش هو ده انا اللي زي ما كنت بكتب .. مش ده انا اللي طاير بدماغه و قلبه طيران .. فرضت علي نفسه قيود كتير .. يمكن ضروريه بس تفضل برضوا قيود ..

لو قدرت اتحرر منها في يوم هرجع تاني صدقيني, انا متغيرتش من جوايا انا زي ما انا, نفس الانسان و بحمل جوايا نفس المشاعر لكل الناس اللي اعرفهم من ساعت ما بعدت لحد النهاردة .. يمكن موضوع البعد نفسه مش هو المشكله الكبيرة بالنسبالي, المشكله في تقبل الناس اللي حواليا للي عملته و بعمله, مكنتش اتخيل اني هاثبت علي قراراتي ديه لمده سنه و شويه اهه .. بس اختي ساعدتني و قويت نفسي و ثبت نفسي بيها .. يا رب تفضل فاهماني و مايجيش يوم احس فيه زي ما اهلي و اللي حواليا محسسني, اني غلطت لما بعدت و اني وحيد ماليش صاحب ولا داعم .. ساعتها يااه .. والله ما عارف اتخيل ..

النهاردة كان محمد خالد فاكره في دماغي و قلبت في صوره كتير, يعني معرفش ليه هو بالذات من بين الكل اللي واحشني, يمكن علشان المواقف الكتيرة اللي كنا مع بعض فيها ؟؟ , يمكن علشان هو الوحيد اللي عمره ما عمل فيا حركه نداله - او يمكن عمل بس حاجات عبييطه -, بس هو انسان عزيز عليا و نفسي في يوم نرجع اصحاب تاني ..
( انت عارف يا محمد يا خالد ان الانسان لوحده ذعيف و مالهوش قيمه و ان الناس هي اللي بتعمل للانسان قيمته, انت كنت بتقول كده بس انا اللي مسمعتش كويس, عملت اللي في دماغي و كنت فاكر اني صح .. بس انت برضه يا صاحبي ليا عتاب عندك .. ليه محاولتش تكلمني ولا تقوليش مالك .. مش يمكن يا اخي ساعتها كان حصلي مصيبه و انت متعرفش ؟؟ .. طب ليه مبتردش عليا دلوقت .. انا عارف اني كنت غبي .. و الله عارف .. و قول اللي انت عايزة .. بس احنا صحاب يا جدع .. افتكر طيب كنا عاملين ازاي )

النهاردة اتقالي ادور علي صحاب, انا صعبت عليا نفسي قوييي, ( فاكر يا محمد يا خالد الناس كانت عايزة تصاحبنا اذاي ؟؟ .. فاكر محمد سعيد و خالد و جهاد و ايهاب و الشله ديه .. فاكر الناس كانت بتموت علشان تكلم واحد فينا ازاي ؟؟ .. طب فاكر الخناقه ساعت لما جبت ايمن شوقي من عندي في الشارع و رحنا لمحمد رمضان و الواد اللي اسمه عمرو .. فاكر المدرسه طلعتلنا ازاي ؟؟ ).
صعب علي اني انا اللي هدور علي صحاب .. و متفتكريش يا اختي اني باقول كده ان اللي عملتيه انك دورتي علي صحاب حاجة وحشه .. اطلاقا .. بس الموضوع يختلف .. بالنسبالي او بالنسبه لمعظم الولاد و اغلبهم .. مسأله الصاحب ديه محدش بيفكر انها شيء بندور عليه .. كل واحد كبر حواليه ناس بني معاهم علاقات و قويت مع الزمن و بالتالي بنسميهم اصحاب .. انما اني ادور علي واحد يكون صاحبي و اقعد اختار بين ده اه و ده مينفعش .. مبتحصلش مع الولاد يا اختي .. المفهوم عندنا مختلف كتير.

اللي ضايقني النهارده - لو تعرفي - اني مضطر ادور عن صحاب, انا اجتماعي بشخصي الحمد لله.. و اقدر اتعامل مع نوعيات مختلفه من الناس .. بس علشان احس ان في انسان معين ده صديقي .. مالهاش حسابات .. ناس معينه بحبها لله في لله و بنتفق و نختلف بس اختلافاتنا مش بتزعج بعض .. علشان كده الموضوع مش اختيار .. مينفعش يدخل فيه المخ .. يمكن في اختيار شريكه الحياة لازم الانسان يحكم عقله .. انما في الصاحب لا .. هو صاحب و خلاص .. مالهاش حسابات و مين ينفع و مين مينفعش ..

اما انت يا بيني و بينك .. فا انت عارفه كويس صدق كلامي من عدمه .. و مش محتاجه براهين علشان تصدقي كلامي .. انت عارفه اني لو مش صادق مش هكتب .. هو انا هضحك علي نفسي ليه يعني ؟؟ .. بس انا فعلا فعلا محتاج صحاب.. مش محتاج ادور .. محتاج الاقي صحاب .. و ايوة يمكن قافل بيباني قصاد ناس كتير .. بس انت عارفه يا بيني و بينك ان اللي كان موجود بيني و بين اصحابي زمان صعب يتبني في يوم و ليله .. خالصصصص .. الجدعنه ديه و الحته بتاعت ايهاب و جهاد و محمد خالد مش موجوده .. معرفش ايه اللي جري .. هما كانوا فعلا ناس يستاهلوا اني ابعد عنهم ولا لأ ؟؟ و الله معرف و عمري ما هلاقي اجابه علي السؤال ده..

انا ليا خال .. صحابه كانوا قليلين جدا .. مبدأش يعمل صداقات كويسه الا لما اتخرج .. و كلها باقت صداقات عمل .. و والدي كذلك كلها صداقات عمل .. و كل الناس اللي شايفهم .. يعني هي مسير الصداقه انها تتلاشي و تتحول لمصالح و عمل ؟؟ طيب ان كان كده في اني قطعب بدري ده ارحم ..
أرحم مين .. كل دول اتحولت حياتهم لعمليه بعد اما كبروا اما عاشوا سن الشباب و استمتعوا بيه .. انا مش عارف اعمل ده .. مش عارف اخرج .. و جربتتتت مع ناس في الكليه و انت عارفه يومها ايه اللي حصل .. رجعت قرفان اصلا .. مش دول الصحاب .. مش دول الناس يعني ..

انا كل اللي نفسي فيه بالنسبه للموضوع ده .. حاجة واحده بس .. ان اللي حواليا يفهموا انا حاسس بايه و يحاولوا يقدروا احساسي شويه .. انا مش محتاج نصايح ولا زي ما امي كل شويه تقول ( البس و انزل اقف تحت شويه ) .. مش محتاج ده .. انا كفيل اني اصرف نفسي بنفسي .. انا كل اللي محتاجه ان الضغط ده يهمد شويه .. الله وحده اعلم انا السيره ديه بتعمل فيا ايه ..
هو ده شيء يعايبني اني ماليش صحاب ؟؟ يعني هما شايفين ان ده عيب فيا عايزين يصلحزه ؟؟ ليه شايفين كده .. هو مش عيب و الله يعني عادي .. مش عادي .. بس يعني هاعيش مش هاموت .. و ربنا هيرزقني اكيد بناس و ناس اعرفها .. مش نهايه هي ..

و يا اختي .. انا مش هدور علي صحاب .. ماينفعش .. بالنسبالي كولد عامله زي البنت اللي بتدور علي عريس و شوف ده شويه و ده شويه .. بتبقي وحشه قويي .. الصداقه للولد زي الجواز للبنت .. بيجي لحد عندهم .. مش حد بيبحث عنه ..

واحد شاي

2009-07-04T19:38:00.006+03:00

واحد شاي ... هكذا نطق الراوي أول كلماته في امسيه غره شهر رجب, نطقها و قد التف حوله اهل القريه بنسائهم و اطفالهم تتقدمهم أواني طعام اشبه بالقرابين يقدمها اهل القريه للراوي ليقص عليهم القصص و يؤنس ليلهم .. و لما شعر الراوي بان الكل استقر و العيون اتجهت اليه .. بدأ في الحديث قائلا ..

عن مملكه الأمس, اقص عليكم قصه ملك قطع الأرض زحفا لينال طمعا من خيراتها, و ما ترك بقعه الا كان له نصيب مما فيها رغم انه يملك خزائن تسع جبال تحيط ببحر و شواطئه , ان اصطف جيشه في صف واحد احاط الارض مرتين, و ان سار في خط واحد اهتزت جدران الجبال .
لم يكن يكتفي ابدا بما عنده, فكلما سمع عن شيء قيم ولو كان في اقصي الأرض, ارسل من يأتي به اليه, ولكنه مؤخرا سمع عن شيء اذهله فقد اخبره احد رحالته بانه سمع رجلا من الشرق كان يشاركه جزأ من رحلته أن بموطنه نجمه تنير للناس صباحهم و تظلم عليهم مسائهم, و هذه النجمه ليست بالشمس, و ليست من نجوم السماء, و انما هي شيء يسكن أعلي الجبل, ان طلع الصبح ارسل انواره و ان زحف الليل اطفأها.

لم يصبر الملك لحظه فأعلن في ارجاء المملكه بان من يأتي له بهذه النجمه له ملك و مال, و انه سيكون من عليه القوم طوال عمره ..
أعد كل شباب المملكه عدتهم ليذهبوا في اتجاه الشرق بحثا عن هذا الجبل الذي تعلوه النجمه, و كان شرط الملك أنه اذا اراد شابا ان يشارك فعليه بتقديم ناقه ترعي في مزرعه الملك حتي يعود صاحبها, فان عاد بالنجمه و ناقته باقيه استعادها و نال ما اعلنه الملك, و اما ان عاد من دونها فليس له شيئا ..

سارع الشباب بتحقيق شرط الملك, و امتلأت مزرعه المملكه بكل انواع النوق, و بدأ الشباب في التحرك و خلت المدن منهم و لم يبقي سوي شاب واحد استعصي عليه حظه فمنعه من الذهاب, كان هذا الشاب يعمل لدي احد تجار النوق فيرعي له نوقه و له نصيب في بيعها و لكنه لا يملك اي منها ليقدمها للملك, و قبل ان يتملك الشاب اليأس, عرض عليه صاحب النوق - و قد كان يحبه - بانه اذا باعها كلها في خمسه ايام قد له واحده ليحقق بها شرط الملك و يبدأ رحلته, و هذا ما حدث, دار الشاب القري يعرض النوق للبيع و عمل ليل نهار حتي فعلها, و اعطاه صاحب النوق ناقه صغيره فاسرع و قدمها لمزرعه الملك..

و بدأ رحلته متأخرا بايام خمسه, فاسرع خطاه و سلم نفسه للارض يزحف عليها زحف الرياح .
مرت الايام و الشهور, و صاحبنا لازال علي حاله يقطع الأرض, حتي اقترب من المكان المنشود و بدأ يسأل عن هذه النجمه و هذا الجبل و لكن بلا فائده, حتي استسلم من امر الناس و بدأ يبحث بنفسه, و مرت الايام و هو يدور حول نفسه حتي ظن ان هناك من سبقه اليها و عاد بها الي الملك, و اخذ يندب في حظه, فهو لم يبدأ مع من بدأوا فتأخر عنهم بخمسه ايام .. و اخذت ايامه تسوء و احواله تتدهور و سكن بيتا صغيرا ارتمي فيه حتي ينال منه الموت فيموت ندبا علي حظه .

و في يوم من الايام استيقظ صاحبنا و قرر العودة, فليس له في هذه الأرض مكانا و كان قد استوحش الغربه, فخرج من بيته ليعد لرحلته, فتقدم نحو السوق حيث تتلون الأرض بألوان الادوات و الملابس و الطعام و البشر انفسهم, و في ازدحام المكان رأي ما شده فيها .....

واحد شاي .. هكذا قال الراوي بعد ان قطع القصه فاسرع احد الشباب الي الداخل و خرج سريعا يحمل بيده الشاي فوضعه امام الراوي و جلس, فابتسم الراوي و عاد الي الحديث..

هي فتاه ان ابتسمت ابتسم كل من حولها, و ان تحدثت فكت كرب كل مكروب, و ان مالت لليمين تميل معها الجبال و ان مالت الي الشمال مالت معها الشمس, و ان مشت تبعها نور السماء, و ان وقفت سكنت المخلوقات .. هي انسانه تحمل صفات السمو, ترحم و تمنح و تكرم من عدم .. ترحم المكروب و تمنح الروح الي الضائع و تكرم بالسعاده من عدم..

نسي الشاب كل ما قرر يوما ان يفعله, و تحولت حياته نحوها و كأنها البوصله تشير الي الشمال, و اسلم الخطي ورائها فتبعها حتي بيتها, و علم انها تسكن مع والدها التاجرالذي قطع الارض مشرق و مغرب مرتين .. اقترب من باب البيت و هو لا يعلم ماذا يفعل, كل ما اراده هو ان يراها مجددا, و لكن التردد منعه فظل واقفا عند بابها حتي فوجيء بمن يفتحه, و مع فتح الباب صدم صدمه عنيفه اغابته عن الوعي ....

واحد شاي .. و تكرر ما فعله الشاب و عاد بالشاي

و اكمل الراوي, لم يكن صاحبنا هو من صدمه الباب, و لكن قلبه هو الذي اصطدم بجدران صدره عندما رأها امام عينيه ترسل نظره تحمل معني ( من أنت؟ ), لم يتحرك الشاب و ظل واقفا امامها و كأنه في بلاط الملك يمثل امامه, ظل الوضع علي ما هو عليه حتي خرج والدها و سأله ( من أنت؟ ) اجاب الشاب باسمه و مكانه الذي اتي منه, فسأله ابوها ( و ما جاء بك الي هنا ؟؟ ) فسرد الشاب حكايته و سبب مجيئه, و هنا ابتسم الأب و دعي الشاب للدخول ..

دخل الشاب و جلس امام الاب يستكمل حكايته و ما صار معه, و عندما انتهي من حديثه قال له الأب, اسألك سؤالا ان اجبت عليه بما اريد من اجابه ادلك علي طريق الجبل فتجد نجمتك و ان لم تجب ارسلك الي وطنك خالي اليدين .. فاعتدل الشاب في جلسته و انتظر السؤال ..
فقال الاب: فقر ببيتك, و مال و جاه بعيدا عنه, ايهما احب اليك ؟؟
فكر الشاب قليلا و اجاب, ارضي بفقر داخل جدران بيتي مع من احب علي ان اتركهم نحو مال و جاه .. و عندها استشاط الاب غضبا و اشاح بوجهه و قال له, عد حيث اتيت فانت صاحب الفقر و هو صاحبك .. فوقف الشاب من مقعده و نظر الي الاب طويلا حتي استسلم و خرج, و لكنه سرعان ما عاد الي الاب و قال له .. سلبتني ملك كنت احلم به و جاهدت لاجله, اطلب منك طلبا تعوضني به عن خسارتي .. فقال له الأب .. قل ما عندك .. قال له الشاب:
خسرت ما بدأت به طريقي, و خسرت ما تمنيت ان ينتهي به طريقي, و لكني وجدت مفرا من الموت عند عتبه بابك, تحكم يمينك انسانه حركت مشاعري و اعادت الحياة الي نفسي و ارشدتني لطرق اخري في الحياة غير الذي فقدته .. أسألك الزواج منها لعلي اجد مخرجا مما انا فيه و اعدك بما يلي .. اعيدها اليك بعد عام, فان رأيت سعادتها باديه علي وجهها فردها لي, و ان رأتها حزينه فهي لك ...

فكر الاب العجوز قليلا ثم قال .. سألتك سؤالا فلم تجيبه كما أردت, و لكني اعتقد انك تستحق العوض بما علمته منك عن رحلتك الشاقه, أوافق علي ما طلبت و لقائي معك بعد سنه ..

وقف الراوي قليلا و نظر الي الجمع, ثم استدار ليلقي نظره علي الاطفال الذين غلبهم النعاس فرقدوا بجوار اعواد الحطب المشتعله .. وجلس

أسرع الشاب في تجهيزات الزواج و استعد لرحلته و حتي اذ اكتملت المراسم فانطلق هو و عروسه عوده الي نقطه انطلاقه الأولي, قاطعين طريقا طويلا كان كافيا بأن يتأكد الشاب انها هي من تستحق ان يسعي لها و ليس الملك ولا المال, و كان كافيا لها ايضا ان تعرف كم هو قادر علي ان يحقق احلامه و لو لم يملك سوي العزم ..

دخل الشاب المدينه و توجه الي بيته القديم, و بعد ان استقبل البيت زوجته و قضوا ليلتهم الأولي, توجه الي قصر الملك ليعلم ما حدث في غيابه ... و عند مدخل القصر استوقفه الحراس و اعلموه أن الملك ذهب بنفسه بحثا عن النجمه بعد ان فشل الجميع في احضارها ..
عاد الشاب الي بيته و مضت الايام و رزقهم الله بطفله جميله اصرت امها علي ان تسميها نجمه, و بعد اشهر من الولاده حان ميعاد عودتهم الي الاب العجوز, حيث ان عاما قد مضي علي الاتفاق.

استقبلهم الاب العجوز بعد ان اطمأن علي ابنته و قبل جبين حفيدته و راح يستمع لما قصته عليه الابنه من عجب في بلاد الملك, و بينما الاب و ابنته جالسون ذهب الشاب ليتلمس اخبار الملك و يعرف ماذا وصل اليه و قد علم انه مقيم عند سلسله جبال هي الاقرب لوصف الرحاله مما سمعه من رفيق رحلته, و حتي اذ اقترب الشاب من مكان الملك اقتاده الحراس بعد ان علموا انه احد الشباب الذين ذهبوا للبحث عن النجمه.
دخل الشاب و مثل امام الملك فبوجه الملك اليه الحديث قائلا:
اخبرني انك اتيت بها و لك ما تتمني
فاجاب الشاب:
لا يا مولاي لم اجد نجمتك.
و هنا اشاح الملك بوجهه:
اذا فما الذي اتي بك الي هنا.
فرد الشاب:
جأت يا مولاي لاخبرك بأمر قد يساعدك علي الوصول الي نجمتك.
قال الملك:
هات ما عندك
اقترب الشاب من الملك و استكمل حديثه قائلا:
قابلت رجلا كاد ان يخبرني بمكان النجمه الا انه سألني سؤالا لم افلح في الاجابه عليه مما جعله يرفض الافصاح عن مكانها, و لكني اعتقد انه اذا قابلته يا مولاي فسألته عن النجمه قد يخبرك ما يعرفه عنها.
فأمره الملك بان يأتي بالاب العجوز.

ذهب الشاب و عاد بالاب بعد ان اخباره بما دار مع الملك و وافق الاب علي الذهاب معه, و بمجرد ان دخل الي الملك حتي صاح الرحاله قائلا: ( هذا هو يا مولاي, هو من اخبرني عن النجمه ) و عندها وقف الملك و قال:
اخبرني ايها الشيخ بما تعرفه عن النجمه و لك ما تطلب.
فقال الشيخ: نجمتك التي تبحث عنها ليس لها وجود يا مولاي, اما النجمه التي اخبرت الرحاله عنها فهي موجوده .. و هي فعلا ان ظهرت للقوم في الصباح اضائت يومهم و ان ذهبت عنهم في الليل اظلم مسائهم, و انما ظهورها يبدأ من صحوتها و ينتهي عند نومها .. من كنت اتحدث عنها يا مولاي هي ابنتي, تلك التي تزوجها الشاب الذي ذهب للبحث عنها , لقد وجدها و هو لا يعلم ..
لقد كنت احكي للرحاله عن ابنتي التي كنت قد اشتقت اليها مع طول رحلتي, و يبدوا ان الرحاله اضله الوصف كما اضلك يا مولاي, ان كنت تبحث عن كل غالي علي الارض فهل نظرت لما تملك ؟؟ لديك المال و كل ما تتمني و لكن هل نظرت يوما للاشخاص حولك الذين تحبهم و يحبونك ؟؟

انتهي حديث الشيخ مع الملك بعد ان ضحك الملك كثيرا علي سنوات اذاعها في البحث عن شيء ليس له وجود, و لكن يبدو انه لم يتعلم الدرس و انه لازال علي حالي ينظر لماديات الاشياء و ينسي المشاعر.
و اما عن الالب العجوز فقد عاد مع الشاب الي البيت و روي علي مسامع ابنته ما حدث عند الملك و ما تسببت كلماته عنها من احداث كبيره, و عندما انتهي من الحديث سأله الشاب:
اذا فانت تعلم ما جأت لابحث عنه و مع ذلك ضللتني.
فقال العجوز:
لا يخفي عليك الان اني قد علمت انك وجدت ما جات للبحث عنه, و ما تركتك من دون جواب الا لانني وجدت فيك من هو اهل لابنتي, و لم اشاء ان اخبرك بالسبب حتي تعلمه بنفسك.
فسأل الشاب:
و ماذا عن السؤال الذي سألته لي
رد الأب:
اجابتك هي ما اردت ان اسمعه و لكني اردت ان اختبرك لاعرف سبب سعيك الحقيقي وراء نجمه الملك, و هل ان علمت انه ليس للنجمه وجود ستعدل عن رأيك في ابنتي ام لا.

اطبق الراوي فمه و نظر الي الجمع حوله و قال لهم:
حدثتكم عن ما قد صار و كان, و الان اترككم لما سيكون و اترك معكم بعض كلماتي ... ان اردتم يوما ان تسعوا لشيء فلا تجعلوا المال و الملك هو هدفكم, بل ابحثوا عن هدف اسمي .
و من احب منكم فليجعل حبه هو طريقه و لا يحيد عنه بحثا عما قد يعتقده اهم, لا يوجد اهم من ان يشعر الانسان بالحب و التحاب و المحبه, و ان يستسلم الانسان يجد النصر كان اقرب اليه من استسلامه.

2009-06-30T05:13:00.002+03:00

و ان كنت صلب العود بين ايدين سجاني
فا ده لأن النخل في السما عالي
لا بينزل يبص لتحت مهما الهوا هزه
ولا عمرنا شفناه طول الزمن كسره
و نظن انه صلب العود لا بينحني
انما في الحقيقه .. هو مكسور

2009-06-24T01:25:00.002+03:00

و يتوه الطريق و ما تبقاش شايفه .. و تلقي ايد اتمدلك تشدك للخير و كليون ايد للشر .. و انت اللي تقرر

النبي الطبيب

2009-06-20T01:56:00.002+03:00

و لي عودة مع الكتابه .. ابدأها بأكثر ما يدور بداخلي هذه الأيام ..

عندما يشكو المريض الألم فشكواه مسموعه, يشعر بها كل من حوله فيتعاطفون معه و يساندونه, و اما ان اشتكي الصحيح انهالت عليه نظرات الشفقه و يبدوا ضعيفا في اعين من حوله .. قد تكون الشكوي سلاح من اسلحه المرأه يجعلها أقوي و أقدر علي السيطرة علي عواطف من حولها و بالتالي افعالهم .. اما بالنسبه للرجل فهي عين المذله و أصلها ..

ان اشتكي المريض جرحه عالجه الطبيب .. و اما الصحيح فعليه ان يعالج جرحه بنفسه فلا يوجد طبيب للاصحاء ولن يظهر ذلك النبي طبيب الاصحاء ..

يطيب الدمع بكف الباكي و لا يطيب بغيرها

2009-04-13T00:55:00.001+02:00

مغلقه لحين عوده صاحبها المجنون

2009-04-09T17:00:00.002+02:00

هههههههههههههههههههههههههههههههههههههههههه

ليه بقي .. علشان النهاردة لاقيتي بعمل كما كنت بعمل أيام القهوة, شلبت 3 عيال خليتهم قطط بتنونو :D , و كل ده و أنا قاعد مكاني و بضحك زي زمان بعلو صوتي ..

الحكاية اننا قاعدين عادي جدا, و الاقيلك كلام عمال يتحدف, و من غير ما أفكر لاقيتني برد, و استغربت جدا و فرحت لما لاقيتني خليت ال3 الواح عاملين زي ال3 قطط بيتلجلجوا في الكلام و شويه هيعيطوا ..

نوت سخيفه بس فرحااان .. Welcome Back

كام سطر

2009-04-08T22:13:00.002+02:00

لما الدنيا بتضحك, بحس انه من حقي أن الكل يسكت و أنا وحدي أتكلم علشان أفرح بالشويه دول, و اللي يشوفني ساعتها يقول عليا ده انسان هايف و تافه, ببقي فعلا مكسر كل الحواجز و مبيبقاش هاممني مين بيقول عليا ايه ... و برجع أضحك علي نفسي لما افتكر انا عملت ايه :D

أجدد خلايا ذلك القلب الهرم

2009-04-08T01:38:00.002+02:00

أحيانا - أو غالبا ما - يتعارض المنطق و العقل مع رغباتنا, فنجد أننا نفكر في تحقيق المستحيلات المتعدده و يتحرك الأمل فينا فنجده يحطم كل ما يمنعنا عن الوصول لتلك المستحيلات, و لكنه للاسف مجرد تحطيم وهمي و ليس حقيقي, فتلك السدود المنيعه لا تزال موجودة تسد الطريق امامنا و منعنا بل و تدفعنا للوراء ..

يقال ان العقلاء هم من يجعلون الغلبه للعقل و المنطق و التفكير و الحكمه, و يقال ايضا اني من العقلاء, و لكني أري انني أجعل الغلبه لما هو أقرب الي قلبي فاسمح لنفسي بالغوص في التفكير فيه حتي أصل الي العمق و هناك أجد هذا السد المنيع الذي يمنعني من العبور .. فهل بتلك الأفعال أجرد من صفه عاقل ؟؟

اما عن حديث المشاعر, إنه لمن الطبيعي ان نربطها بالتهور و الجنون و أن نترك لها مجالا لتنفذ و تخترق خلايانا - و ندي لنفسنا فرصه نعيش الاحساس -, و لكن عمليا تلك المشاعر تحتاج لأفعال كي تتاح لها الفرصه لكي تفيض بسلام من دون ان تؤذي منبعها - يا فرحتي بواحد بيحب علي نفسه من غير ما يعمل حاجة أو ياخد موقف -, و لكن الحنكه تكمن في كيف و متي و الي أي حد ستطلق العنان للسانك الشجاع ليبوح بما في قلبك تجاه من تحب.
تلك الـ(كيف) و ذاك الـ(متي) هم - وحدهم - من يقررون مصير كل من يحب .

مين شريك مين؟؟

2009-04-06T17:02:00.004+02:00

او تخيلنا سعي الانسان في الدنيا كسيره في وادي, نجحاته هي القمم و سقطاته هي الحفر, و يفضل الانسان مابين القمم و الحفر ..

ناس بتغمي عنيها و تمشي من غير حساب, و يا تقع يا تطلع علي حسب ما ربنا مسهلها, و ناس ماشيه باصه لتحت و خايفه تقع, عينيها متابعه الارض, و بالتالي عمرها ما هتعرف طريق القمم منين..

ناس تانيه بقي باصين لفوق بيدوروا علي القمم, و ان شافوا قمه يجروا عليها, و ينسوا تماما وجود الحفر, و طبعا و للاسف بيقعوا اكتر ما بيطلعوا.

و ناس و ناس و ناس, انواع كتيرة..

انا بقي شايف ان انجح ناس فعلا هما اللي مش لوحدهم, هما اللي معاهم شريك, واحد يشوف القمم و واحد ياخد باله من الحفر, و يفضلوا يساعدوا بعض و يتبادلوا الادوار لحد ما يوصلوا لنجاحات كتيرة..

يا تري بقي مين شريك مين ؟؟ هو ده اللي المفروض ندور عليه .. و من هنا لحد ما نلاقي, نقوم بدور الاتنين و تبقي عنينا في نص راسنا .. و ربنا بيهدي . . . .

واحد

2009-03-31T00:00:00.002+02:00

زمان كان لينا ناس عارفين اننا علي بالهم علي طول, و كانوا شاغلين بالنا و واخدين حيز من تفكيرنا, كنا بنستمد منهم قوتنا و نقدم في المقابل حبنا ليهم كهبه أو هديه, بصراحه حبنا ليهم مكانش مجرد شيء علينا و واجب, بل هو كان شيء لينا و بنفرح بيه .. و بعيد عن المشاعر كان كل واحد بيحسس التاني بنفسه و بوجوده فا باحساسي بنفسي كراجل كنت برد باحساسها بنفسها كبنت و هي باحساسها بانوثتها كانت بترد باحساسي بنفسي كولد .. و كانت المعادله متحقق فيها شرط الاتزان, و بالتالي الطرفين متساويين و الاتنين مستقرين و المجاهيل معروف قيمتها..

لما باكون حاسس بضعف كنت بكتمه في نفسي علشان افضل في عيون الناس عادي, و بعدين جيت فترة قررت أني اظهره و انه طبيعه بشريه مش عيب ظهورها الا اني عرفت بعد كده اني في الأول كنت أصح و أصح في كل حاجة و قررت أني ارفع راسي مهما كان و اضحك و ابتسم مهما كان و أن محدش يعرف عني حاجة الا الخير, و اني اعالج ضعفي جوايا مع نفسي لأن ببساطه محدش عايز حد ضعيف قصادة, اول ما صورة القوي أو الجامد تتهز بتتهز معاها مكانته في قلوب و عيون الناس و بينزل درجااات لتحت .. و أنا بتكلم علي الراجل مش علي البنت, البنت ضعفها عادي بيترجم في عيون اللي حواليها رحمه و شفقه و محاولات للمساعده, انما بالنسبه للولد ضعفه بيترجم لدرجات سلالم نازله و عماير بتتهد و بحور بتتحرق, و بينتهي في الاخر انه بقي ولا حاجة في عيون الناس و ان هجره مستباح..

---------------

أنا فعلا حابب وضعي الحالي كشاب, يعني بدرس في كليه بحبها و مواد بتشد انتباهي و مستوايا مش بطال فيها, و ده يمكن الشيء الوحيد اللي بيثبتلي اني دلوقتي احسن حالا من ايام القهوة و قعداتها, بس في أول السنه مكنتش لسه متزن ولا عارف اولي من اخري, دلوقتي تقريبا عرفت و عرفت اذاكر ايه امتي و اذاي, و كمان عرفت ان الشيء الوحيد اللي بيعطلني عن المذاكرة هو اني افشل في اني اعزل نفسي عن العال اللي حواليا, طول منا معرفش حاجة عن حد ولا عن حاجة و بنفس القدر بيزيد تحصيلي و يزيد تركيزي .. و أول ما ينغمس عقلي في اي شيء جانبي مهما كان تافه بيلاقي فرصه انه يهرب ليه و يسيب المذاكرة ..

أنا نفسي ببقي عارف انا مذاكر فعلا ولا لا و عملت اللي عليا ولا لا و بحاسب نفسي علي ده, بس الأهم من ده هو اني أعرف اذاي اعزل نفسي و افصلها عن العالم الخارجي, و صدقني ده مش بيتحقق غير بانك تبقي وحيد, و مش قصدي وحيد يعني متعرفش حد و تبقي قاعد لوحدك, بس وحيد يعني تصرفاتك نابعه من جواك انت و بتفكر من غير ما تعتبر وجود حد حواليك, هتركز دلوقت يعني هتركز و هتمشي دلوقتي يعني هتمشي.. حاول تدي لنفسك مساحه اكبر و وسع علي نفسك الخندق..

من هو القوي

2009-02-18T17:08:00.002+02:00

أصعب شيء علي الانسان هو أن يفتعل و يفعل ما ترفضه كل خليه من خلايا جسده و كل طيف من اطياف روحه .. عندما تجد نفسك قد انتقلت من احب الاماكن اليك الي مكان لا ترغبه, تشعر و كأنك تركت روحك و نفسك و كل حواسك بمكانك الحبيب و انتقل جسدك وحده ..

عندما تجبر نفسك علي فعله انت اشد من يعارضها, تشعر و كأنك شخص اخر لا تعرفه و لا تقبله و لكنك مستسلم له ..

و يبقي السؤال, هل القوي هو من يستطيع ان يقاوم طبيعته عند الحاجة ؟؟؟؟
ام هو ذاك الذي يصمد و يبقي علي طبيعته مهما تقلبت الأمور ؟؟

في أشد الحاجة الي اجابه ..

أجمل حاجة

2009-02-07T22:21:00.002+02:00

أجمل حاجة ممكن تحصلي .. اني القي حد يشوفني بشكل تاني غير اللي الناس شايفاني بيه .. حد يشوفني محتاج مساعده .. حد يشوفني محتاج نصيحه .. محتاج طبطبه علي كتفي .. حد يحس من ضحكتي اذا كانت حقيقيه فعلا ولا بطلعها علشان محدش يقول عليا زعلان .... حد يهتم ..

عشر اعشار لسان حالي

2009-02-02T20:26:00.004+02:00

-1-
وحشتني القاعدة وسط الناس الجامدة .. جمودهم و قوتهم في انهم بيعافروا مع الدنيا و هي بتطوح فيهم .. ربنا رزقني بكام شخصيه عرفتها و كان ليها أثر كبير فيا .. و بعد ما الدنيا فرقتنا فضلت فترة مش قصيرة بقوتي اللي اكتسبتها من قوتهم .. ميس غادة و أحمد فوزي .. أنا محظوظ اني قابلتكم و اتعلمت منكم .. انتم حطتوني علي طريق مكنتش احلم اتوجد فيه .. هو صعب بس لو انا استجدعت هكمله للاخر و هوصل لشيء عظيم ..

- 2 -
مش سهل ابدا انك تقرب من ناس قوي و فجأة تلقي نفسك بعيد قوي .. تبني جوا قلبك برج عالي من الدهب و ترصع عليه اسماهيم و تيجي لما تبعد تلاقي نفسك مجبر انك تمحي الاسامي المنقوشه و كأنك بتقطع حته من قلبك .. ياسر و مؤمن و جهاد و نورهان و نورا .. أكيد في حد هلقاه مش هيبقي طياري كده .. حد هيفضل طول عمره قريب ..

- 3 -
برتاح أكتر لما ببص في المرايه اللي في وشها اللمبه .. عشان بتظهر وشي مظلل و بتخبي كل عيوبه و شعري المنكوش .. و زي مانا كده مع ديه المرايه .. أكيد ببقي كده مع المرايه اللي بتعكسني انا اللي جوه .. برتاح للمرايه اللي بتظهرني قوي و مش محتاج لحد و ناجح وواصل .. انما من جوايا متأكد و عارف ان شعري منكوش و ذقني مش محلوقه كويس و برضه عارف اني ضعيف في كذا و فاشل في كذا ..

- 4 -
سألتها اذا كانت شايفه اننا ممكن نكمل مع بعض بالطريقه ديه .. و ردت قالت لأ و قولتلها طيب سلام بقي و متتصليش .. و قفلت السكة في وشها .. و قعدت اسبوع .. و بعدين رجعت اكلمها تاني مقدرتش .. و قعدت 5 شهور رجعت تكلمني تاني و مقبلتش و كان اللي كان .. بس كل اللي كنت عايز اقولهولها بعد كده وصلها .. الا حاجه واحده .. و هي شكرا, انتي خلتيني أعيش 10 شهور معيشتهمش قبل كده و أثرهم فضل معايا سنه و شهرين, مكنتش أعرف انك كان ممكن تنفعيني كده ..

- 5 -
حجر الشيشه وقع عالجاكت حرقه .. و فضلت متعكنن طول الليل لحد ما جيه الواد محمد خالد بيتدنجل علي رجليه اللي باربعه .. وقف زي الدولاب سادد ميه و نور و بيسأل عالساعه .. قال يعني الواد مش واخد باله انه اتأخر .. رفسته برجلي و قعد يضحك لحد ما هز الدنيا كلها بصدره العريض .. اختلق اي عذر من اعذاره اللي مبتخلصش .. و عملت عبيط و قولتله خلاص .. و قعد سحب سحبه قضت علي الحجر كله .. و كأنه بينتقم مالحجر اللي حرقلي الجاكت ..

- 6 -
يمكن كنت بعاكسك بس انتي انتقمتي خلاص .. طلقه و نشنتيها في قلبي دخلت في غيبوبه مش قصيره .. و فوقت و لسه عايزة تنتقمي تاني .. ما خلاص بقي كفايه المسامح كريم .. و أوعدك همشي جنب الحيطه ولا ههش ولا هنش .. و لو شفتيني بصيت في عين بني ادمه تاني ابقي اعملي اللي انت عايزاه ساعتها ..

- 7 -
اللي اتضحك عليه زمان و اخدني قدوة و قلدني .. بيقول دلوقتي اني كنت اراجوز بمنخير حمراء مكورة .. بس يا عبيط .. ايوة انا ماستاهلش اني ابقي قدوة .. بس انت و أمثالك مبتعرفوش مين اللي تفضلوا جنبه و مين اللي تطرقوه .. مخكم الصغير مش مستوعب ان التغير سنه الحياه ولا مستوعب ان صاحب الأصل بيبقي علي اصله .. و اصلي مهما كان زيف في عيونكم .. فا هو أصلي و أنتم التقليد ..

- 8 -
و لما نبوت الفتوة ينزل ثواني .. تلاقي مليون كرباج لسعه .. علشان كده الفتوه يا هوه بيرفع النبوت فوق الروس .. علشان تفضلوا مقلقين منه .. غلبان الفتوة .. محكوم عليه يمشي رافع ذراعه فوق الكل .. و انتم مش غلابه .. دا انتم اللي فتوات .. هدفكم الوحيد في الدنيا ديه .. انكم تخلوا الفتوة ينزل نبوته .. و بعدها تضحكوا عليه لما الكرابيج تلسعه ..

- 9 -
و ماله النهاردة لما تعيش فيه .. هو مش يوم زي باقي الأيام .. فيه صبح و مساء و عفره و زحمه .. زيه زي اي يوم جي .. متفتكرش ان اللي جاي مختلف عن النهاردة .. الايام هي هي .. بس الناس هي اللي بتتغير .. و انت بتتغير .. و كل ما بتركز انك بتتغير .. كل ما تفوتك متع كتيره في الحياة ..

- 10 -
عيون الناس بتكدب عليك .. بتشتمك و بتضحك عليك .. انما قلوبهم صادقه و عادله .. المس قلوب الناس .. و أبعد عن عيونهم .. تسمحلي ألمس قلبك .. و يكون حبيبي و رفيقي ؟!

تجربه أخيره

2009-01-20T05:03:00.003+02:00

يا تري .. يا هل تري ... اللي انا بعمله واللي عملته .. صح ولا غلط ؟؟
يا تري .. اللي بعمله .. يستاهل الجبال و المدن و العواصم اللي هديتها ؟؟؟
يا تري .. دماغي .. عاقله جدا .. ولا مجنونه جدا و غبيه ؟؟
يا تري .. كل اللي بهمله .. علشان خاطر حاجات .. يا تري .. تستاهل الحاجات ؟؟

مش المشكله اني بخسر .. ولا المشكله اني حاسس اني ببعد عن كل شيء عملته - سواء كان خير أو شر - بس المشكله هي .. أني ممكن يجي يوم .. و أندم فيه علي كل اللي بضيعه .. عالوقت .. عالناس .. عالاماكن اللي كان ممكن اتواجد فيها ....

تلقي الكل حدفوك و اترزعت في اتخنها حيطه .. أو بمعني أصح .. رزعت نفسك في اتخنها حيطه لما رفست برجليك بعيد عنهم .. علشان شفت نجوم بتلمع و شدك ضيها .. يا تري .. هتطول النجوم ؟؟ ولا هتفضل تخسر و تبعد و تنسي وبرضوا ما هتطولهاش ...

تجربه اخيره .. هلاقي فيها اجابات لكام سؤال محيرني .. و بالاجابات هلعب لعبتي .. و ياللي عارفينني بالاسم .. ليكم فرصه واحدة اخيره تثبوتوا فيها نيتكم الحقيقيه .. لأني بعدها .. مش هبقي حد تعرفوه خالص .. لا أسم .. ولا شكل .. و أنا جاد في كلامي .. و ياللي هارفيني مالقلب .. أوعدكم .. مهما تعملوا و مهما اعمل و مهما يتعمل فينا .. هتفضلوا طول العمر عندي ملايكه .. هتبقي كرامتي في تقديري و احترامي ليكم .. و أنا جاد في كلامي ..

One Last Chance
Soon or Never

عند ذلك الرصيف

2009-01-18T03:19:00.006+02:00

تحديدا اليوم, عند ذلك الرصيف المواجه للكليه, تجاذبت اطراف الحديث مع نفسي بكل هدوء, و سمعت كل الأصوات المنبعثه من تلك الكائنات الحيه التي تسكن قلبي و عقلي ..

سمعت صوتا هادئا, رائعا في جماله, أقل ما يوصف به هو أنه صوت ( لطيف رقيق ), سمعته يقول " أراك تصارعني يا صديقي, فلما لا تكف عنك هذا؟؟, لماذا لا تمد زراعك فتحتضن قلبك كسابق عهدي بك ؟؟, لما تحاول ان تتجاهل كل ما اكتسبته من مشاعر رقيقه, و العجب أنك تتجاهلها و أنت في أمس الحاجة اليها"

انتهي الهمس, و أختفي ذلك الصوت الرقيق و تتابعت من بعده الأصوات:
فذاك صوتا اعرفه جيدا, فقد اخترق مسامعي طوال تسعه عشر عاما, صوتي أنا, صوت العقل القابع في رأسي .. ذلك الذي أظن انني من اتحكم فيه, و لكنه دوما يؤكد لي انه هو المتحكم, و اني مجرد منفذ لأوامره ...

سمعته يقول " كف عنك ما تسمعه و أصدع بما تؤمر, و تذكر دوما انني انا من نشلتك من ظلام غرقت فيه, وانك لولا اتباعك لي لكنت عبدا لقلبك و شهواتك, فلترد لي الجميل و لتبقي علي ما انت عليه .. يا صديقي أود أن اهنئك .. فقد انتصرنا علي ذلك القلب و امتلكت انت القدره علي التحكم في عواطفك و مشاعرك.. لست عبدا لها بعد الان "

و انبعث صوتا اخر " أبكي عليك يا رفيقي, فقد وصلت بك الحال لأسوأ ما كنت أتوقع .. فها هو الصراع قد اشتعل بين قلبك و عقلك و أنت حائر ضائع, أخشي عليك مما أنت فيه, أخشي عليك من جريمه تكون أنت الجاني فيها و أنت المجني عليه .. "

فلتسقط كل الأقمار
و لتحترق كل النجوم
و ليبكي الكون علي فعله رجل موهوم

عيل صغير

2009-01-15T19:02:00.003+02:00

النهاردة شفت عيل صغير
كان ماشي بيجر رجل ورا رجل
حزين زعلان
ناس كتيره ماشيه حواليه
اخواته و اهله و اصحاب ليهم
بس هو مش لاقي لنفسه وجود وسطيهم
كل شويه يجي يطبطب حد عليه
يغضب و يرد الايد
و يمد لقدام

و يحس بوحده
يرجع يمسك ايد ابوه
يرفض ابوه ايده

يمسك ايد مامته
ترفض مامته ايده

و اخواته و الاصحاب و الكل

قلبه اتحرق علي نفسه و اتبكي
و مشي يمد
و يسرق امتار عالارض
و يمد و يمد لحد ما اختفي و تاه وسط الناس
و تاه من اهله

الناس كلها قعدت تدور عليه
بس اختفي

2009-01-15T02:09:00.003+02:00

اسمحولي
عايز ازعق

عاشقه النجوم

2009-01-04T00:32:00.003+02:00

حدثتني نجمه توسطت السماء .. و أمتد بريقها ليشمل كل الأرجاء .. خاطبتني باسمه, تكاد تصارحني بما بقلبها من حب لشخص ما لا اعلمه, و لكنه بالتأكيد ممن يشملهم الحظ بلطفه.

حدثتني قائله:
بأرضكم لي صديقه
تعشقني و أعشقها
لا يفارق ضيائي قلبها
و تلمحني عيناها من اوساط الغيوم

ارسل لها سلامي
و حدثها عني بالخير
و اعلمها بان لها معزة عندي
ستبقي مهما طالت السنون

سألتها: و ما اسمها
فاجابت: لا اعلم اسمها من اسماء البشر
ما اعلمه عنها قليل فاسمها عندي عاشقه النجوم

تعجبت لما دار بيني و بينها, يا تري من هذه الصديقه العزيزه لتلك النجمه, و كيف لي ان اجدها من وسط هؤلاء البشر .. و ان وجدتها .. فكيف ستكون هذه التي يصاحبها ضوء النجوم ؟؟

ما يناله المجرمون

2009-01-02T18:09:00.002+02:00

توسمت الخير فيها
و سمحت لها بالأقتراب
و ما نلت الا
ما يناله المجرمون

تهمه التصقت بكاهلي
و القاضي حكم
و الشهود لا يتكلمون

تعالت اصوات الحنق
الكل غاضب .. الكل مندفع
وانفجروا في وجهي معاتبون

لا تندم علي خير ابدا
فيدك الأعلي و الأكرم
و ربك عادل حي قيوم

بيبان القلب

2009-01-01T23:12:00.004+02:00

بيبان القلب

وافتح بيبان القلب للهوى وغصب عنى يقفلة الهوى
كأنة طير مقصوص جناحة قص
قلقان ومش شبعان نظر ولا بص
وازاى يطير والكون بحالة قفص
قفص ولة ابواب مقفولة ما بينة وبين الاحباب

يااااه يا منير, صدقت انا لما قلت انك دايما بتيجي عالجرح, ماهو يا اما انت ربنا خلقك علشان تداوي جراحنا بغناك و ألهمك كلام تقوله يشفي كل جرح و يوقف كل نزيف, يا اما انا حظي معاك كده .. كل ما احزن و انجرح القاك بتغني اغنيه و كأني اول مرة أسمعها .. أغنيه فيها رسايل كتيرة اكنك بتوجهها ليا ..

فتحت بيبان قلبك يا منير, سمحت للهوي انه يدخل جواك و تحضنه بقلبك الا انه قفل الباب و كأنه بيقولك مش عايز ... اقفل بابك .. و ترجع تقول انا اللي غلطان و ايه اللي خلاني فتحت الباب ..

شكرا لك يا منير

تخيلات مصريه

2008-12-31T21:43:00.004+02:00

يااااه ... بيني و بينك .. من ساعت ما النت وقع مكتبتش حاجة .. يلا

امبارح و انا سرحان جاتلي فكره كده قعدت في دماغي ثانيه و بس, تخيلت لو كانت مصر عملت حركه جدعنه ووقفت موقف المجاهد في سبيل المستضعفين من الرجال و النساء و الولدان .. و تخيلت هاكون فخور اذاي اني مصري .. و تخيلت للحظه كده اني وطني و بحب البلد و فخور بموقفها و كذا و كذا و كذا ... المهم فقت مالتخيلات ديه و رحت انام ...

2008-12-29T02:43:00.000+02:00

عندي معاني
نفسي الاقي
اللي يحسها
معايا

بعرض البحر

2008-12-19T03:15:00.002+02:00

اما عنك, فلو كانت الدنيا كلها عاصفه و انت وحدك هاديء قابع مكانك لا تتزحزح و لا تهيج مع الهائجين, ان كان هذا ما فعلته لكنت لا ابالي, بل كنت سأتحدي كل العواصف .. و لكنك تفعل خلاف كل ما توقعت, فأنت ايضا تعصف مع العاصفين بل أنت أولهم ...

أسألك لماذا تصر ان تغرقني و بيدك ان تحتضني و تضمني برذاذ المياة المنبعث من امواجك الخفيفه, لماذا اراك هائجا كمن لا عقل له, لماذا لا اري فيك الشموخ الذي يتسم به البحر, لماذا اراك كريما معي فلا تتوقف امواجك عن الفتك بي في محاوله لاغراقي ...

وحيدا انا بعرض البحر, منفرد بصديقي الذي أرفض الأعتراف به كعدو رغم انه يثبت لي يوما بعد يوم انه العدو الأول و الاخير ...

زهقت

2008-12-17T21:56:00.001+02:00

زهقت من كلامك المتكرر
نفس الكلام بيتقال كل مرة
ولا بستفيد
و لا حتي بتسمعي

و لو سمعتي مبتفهمينيش

مش بعاتبك
بس زهقت

للاسف بتكلم عن أمي

سيبك سيبك

2008-12-09T17:30:00.002+02:00

لما لاقيتني براجع دماغي في كل حاجة رفضتها قبل كده
و كل حاجة غيرتها فيا
ضحكت
ضحكت لما قارنت بين حالي لما كنت متردد
و حالي لما اخذت قرار و اتغيرت

بس انا دلوقتي متأكد
أني رافض مجرد فكرة اني اراجع نفسي في قرار زي ده
انا اتغيرت
و ده انا دلوقتي
بالحلو و الوحش

سيبك

بين النقيضين

2008-12-03T00:43:00.002+02:00

ان لم تكن تحب .. فهل انت تكره ؟؟
ماذا بين الحب و الكره ؟؟
هل هي اللامبالاه ؟؟
ام الرضي ؟؟
ام التمني ؟؟

في حضره كيوبيد

2008-11-30T21:32:00.002+02:00

في حضره كيوبيد
أفقد لساني
فينطق باشياء ليس لها معني علي الاطلاق
و يكرر ما قاله أول مره ثم يردده مره بعدها مره
ثم يتلعثم فتختلط الحروف و تتجمع
ثم يقف عن الحراك فيحجز وراءه فيض من الحروف و المعاني
فيض يضغط علي صدري فينقبض

عندما تحدث لي مثل هذه الأمور
أعرف انني في حضره كيوبيد
و أن سهامه طالتني
فقطعت الحبل الفاصل بين المنطق و العقل و بين الجنون
فلا اعد افرق بين الصحيح و الخاطيء
تختلط عندي كل الأمور
ضباب كثيف يحد من الرؤيه و يثقل الحركه

بيني و بينك

2008-11-30T17:12:00.003+02:00

مش مبكتبش علشان مافيش حاجة اكتبها
بس اللي جوايا خلاني اكتشف اني لسه موصلتش لمستوي من البلاغه يساعدني علي الكتابه و التعبير عن ما يدور بداخل هذا الانا الغريب.

هو الموضوع .........

باقول ايه .. انا قايم انام

ساعي بريد

2008-11-25T02:01:00.005+02:00

اردت أن ارسل جوابا لساعي البريد نفسه, فكتبت الجواب بلا عنوان حتي يوزع كل ما لديه من جوابات و يتبقي معه جوابي فلا يجد له عنوان الا عنوانه فيفتحه ..

و لكن هذا ما حدث
وزع ساعي البريد جميع الجوابات التي احتوتها حقيبته و تبقي معه جوابي, و عندما وجده بلا عنوان اخذ يسأل عن من قد يكون موجه اليهم هذا الجواب, ذكر الدنيا بمن فيها و نسي ان الجواب قد يكون له ...

ايهما ابعد عن المنطق ؟؟
أنا ام ساعي البريد ؟؟
ام الجواب ؟؟

النهاردة حفله بلاك تيما

2008-11-23T23:21:00.000+02:00

يعني
عبده و بحر و أمير و سامي

:)

2008-11-20T22:59:00.002+02:00

مش انا انسان ؟؟
يبقي من حقي أحزن
و أقصر
و أكشر
و أنسي
و أكبر
و ازوغ
و الف و أدور
و ألعب

يعني انا انسان ؟؟
يبقي انا من حقي
أضحك في وش ناس بتكشرلي
و أكشر في وش ناس بتضحكلي
و اتريق علي مخاليق ربنا
و اكسر قلوب
و ينكسر قلبي

اصل انا انسان
يبقي من حقي
احب و اكره
من حقي اتكلم
من حقي
المح بعيني
و من حقي ابتسم

محدش فهم حاجه
:)

اعتراف

2008-11-19T00:22:00.005+02:00

أعتقد
انه لمن الضعف
الا تعترف بمشكلتك
و ان تنكر تورطك فيها

ان تقنع نفسك بانك علي ما يرام
و ان الامور تسير علي احسن ما يكون
و انك لم تضل الطريق

فالانسان اذا اقتنع بشيء سار عليه و نسي ( أو تناسي ) احتمال وجود خطأ فيما أقنع به نفسه .. فتجده اذا اقتنع بعكس واقع أصبح كالأنعام بل هو أضل ..

اذا .. فالاجدي نفعا
أن يعترف الانسان بمشكلته
و ان يتعامل معها

سأعترف لك
مسني القدر بضر
مسني بما يقلقني

و تحيرني مشكله
ليست بصغيره
من يري ملامح وجهي
سيتأكد من اني واقع في مشكله اكبر مما اتصور انا
و اني في صراع مع نفسي
ولولا قوة اكتسبتها
لكنت غرقت في بحور الكرب و الهم

لست بضعيف
و الدليل علي ذلك اني لم انكسر
بل ارتخي عودي من ثقل التصق به

اكتفي بما كتبته
فليس لدي اشياء كثيرة اتحدث عنها

كل ما في الامر
اني تناسيت امرا هاما
الي ان كبر و احتل مكانا في عقلي
و اصبحت مقاومتي له في مثل قوته
و بدات تضعف
و الاجدي نفعا
الا اقاوم
بل اتفاوض

هربت من وراء حجاب

2008-11-17T23:34:00.002+02:00

و كأنه يوم الميعاد
حين التقت عيني
بخصله شعر
هربت من وراء حجاب

رسمت بلونها خطوطا
اعادت رسم خريطه قلبي
مخطوطه رائعه
بها السؤال و بها الجواب

ارتعش بداخلي الحب متسائلا:
الست من رفضت عيونا
كانت لك حظا
و كنت لها العذاب ؟؟

أولا تعلم أيها الرفيق
انه للعين حظ
و للقلب
ابواب ؟؟

------------------

تخترقني نظرات
لعين تتلالا
تلونت بحسنها
بألوان السماء

اري انعكاس صورتي بداخلها
أري الحب بعيني
من عينها
أري عطشا يتبعه ارتواء

قلبي النابض بالحياة تعجب
من اين لك هذا النور
نور بهيج
يعم الارجاء؟؟

جائني من نور بسمه
ارتسمت علي وجه
ان ظهر
اصبحت بعده كل الوجوه هباء

--------------------------

ايا قلب بكي و استبكي
ايا نفس طلبت و ألحت
أيا عقل استباح و غاب
الستم عالمين بالأسباب ؟

امنت لكم
و استأمنتكم علي نفسي
و تجعلونني عرضه للتراب؟

فلتبكي و تحترق
و لتطلبي فيمتحق
عقلي البليد التافه
عقلي البليد الذي غاب

فلتكن اخر مره اسلم لكم فيها
ساحيا بلا قلب
ساحيا بلا نفس
و لتعد لي يا عقلي الصواب

------------------------------

كلمه وقفت علي لسان حالي
اردت ان انطقها
فرفض العالم باحوالي

ذكرني بيوم اكون فيه
فارسا علي حصان
يرمح في ارض
حدودها خيالي

سرحت و عدت فانتبهت
أين اللجام اين الحصان ؟؟
لم اجد من حولي شيء
سوي انفعالي

ولكني تعلمت و أدركت
و كان لي في ما حدث
اجابه لسؤالي

--------------------

احيانا اراك تضحكين
و تلعبين
و تتحركين
كالطفل يمشي

و احيانا اراك اميرة
تتلعثم كلماتي امام حضرتك
و مع رؤيه طيفك
اترجل عن عرشي

رائعه انت
وصفا و فعلا و اسما
فالوصف حسن
و الفعل خلق

هتدق بالعافيه ؟؟

2008-11-17T16:08:00.002+02:00

دق و علي نبضك
مش هسأل فيك
و دق تاني و علي أكتر
وبرضوا هفضل مش سائل
عارف ليه ؟؟
علشان انا مش بمزاجك
مش كل ما تدق اسمعلك
زي ما قدرت اسد وداني سنه
هقدر اسدها كمان سبع سنين

و متهددنيش تاني
انا واثق انك مش هتقف
و هتفضل تنبض برضوا
بس انا المتحكم مش أنت
أنت جزء مني
مش انا اللي جزء منك

و ياريت تلم سلاحك
تلم اطراف الحزن من علي وجهي
علشان ديه اطراف مصطنعه
انت اللي مسببهالي

يا ريت تعتقني
بقولهالك من غير تردد
انا مش هاسمعك
متتعبش نفسك
و تتعبني
اخرس و اسكت

باذن الله

2008-11-14T04:20:00.003+02:00

قمه السعادة
ستقفين عليها ناظرة الي ما دونها
فتقع عيناك علي نقطه انطلاقك في الاسفل
و تشعرين بالرضي لما اصبحت عليه

ساظل واقفا بجوارك
اسعد بسعاده عينيك
و اتمني لو كانت للقمه قمم
تصلين اليها هي الاخري

اشعر بالراحه و الاطمئنان
و اعود الي عامه الناس اسفل جبل السعاده
و اخبرهم متفاخرا
هذه التي بالقمه
هذه التي ترونها
هي
اخــتــــــي

متوسط الطول .. اسمر اللون

2008-11-12T21:00:00.004+02:00

دقات خفيفه علي جدار القلب
تهز أرجاء المكان
تخترق السكون كالسهم
تقطع اوصاله و تمزقه
و تتناثر اشلائه التي طالما كانت سجنا
او غشاء احاط القلب الأحمر
و احاله الي السواد

تتسارع دقات القلب
و كأنه يتنفس بعد انقطاع
و تجري الدماء في عروقه
كالأنهار
تدفئه بعد برد ليل طويل
فيرتعش القلب
و يرتعش
و يهتز كل شيء حوله
و تظن ان الجسد بأكمله
علي اعتاب ثوره بركانيه

و تنطلق هذه الثورة
تنطلق في تنهيده هادئه
و ابتسامه خفيفه
و تلتف اليد باليد حول الصدر
و كأنهما يحتضنان صاحبهما
و يرحبان به بعد غياب

تتابع عيناك هذا المشهد من بعيد
في عين شاب متوسط الطول
اسمر اللون
يجر ورائه من السعادة ما نال
و تري الزراعين تلتفان حول الصدر
و كأنهما يحملان ما احتوي من قلب

و لكن سرعان ما تجد الجد
ارتسم في نظرات عينيه
و عاد وجهه الي الثبات
و رجعت الازرع الي مواضعها
و اغمض عينيه السوداوتين للحظه
ثم فتحهما
لتجد نظرات لا معني لها
و لا ترسل اي اشارات

يلتزم الشاب طريقه
ولا يحيد عنه
حتي يختفي بين البشر
و تفقده عيناك

فماذا بك الان ؟؟

خايف قلقان ضعيف و جبان

2008-11-07T04:15:00.002+02:00

تتفجر الروح في جسد طفل ينموا داخل تلك البطن
ثم تنشق الظلمات الثلاث و يخرج طفلا رضيعا الي نور الحياة
ينموا و يكبر
و طوال مراحل عمره يتعلم

كل منا يمر بهذه المراحل تباعا
لا فرق في سيناريو نمو الانسان بيني و بينك

و لكن الفرق الوحيد
الذي يجعل منا الصالح و الطالح
هو كيف وجهت قوة الانسان منذ صغره
و فيما استغلها
ام تركت سدي تذهب الي حيث لا ترجع بفائده

سيبك من أول كام سطر
و متسألش كتبتهم ليه
اصل ليهم معني عندي
محدش عارفه غيري
يمكن اكتب فيه بعدين

كوني و كونك شباب
مخلي دماغنا عبارة عن افكار متزاحمه
كل فكرة بتحارب اختها
و كل فكرة نفسها تطلع للنور
افكار منها السيء و منها الحسن
و وساوس
و خوف كبير من المستقبل
و ساعات أمل و ساعات طمع

ساعات يرقدلك شيطانك
يجننك
يوهمك انك في مصيبه بل كارثه
و يفضل وسواس عندك
لحد ما تنشغل بيه
و تنحرف عن مسارك في الحياة
و تبكي
و تندم
و تموت

ساعات دماغك تاخدك لبعيييد
و تفكر في اشياء مالكش فيها ايد
و تحسب و تعد و تنسب
و في الاخر
متوصلش لحاجة
و تبكي
و تندم
و تموت

ساعات تنسي كل حسناتك
و تفتكر كل سيئاتك
و تكبرها قصاد عنيك
و تحزننن قويييي
و تبكي
و تندم
و تموت

ساعات تخاف من اللي جاي
يا تري هيحصلك ايه
يا تري هتقدر ؟؟
ولا مش هتقدر ؟؟
ولا هتفشل لدرجة انك
تبكي
و تندم
و تموت ؟؟

ساعات تحس ان كل الناس بتحاسبك
و انك في محكمه
كل حركه عليها حساب
و كل شيء فيك
بايديك او مش بايديك
محسوب عليك
و هتتحاسب عليه
و تفضل تبكي
و تندم
و تموت

تعرف
بيني و بينك
أنا خايف قلقان ضعيف و جبان
علشان متوهم اني لوحدي
مع اني لو بصيت في كل مكان
هلاقي علامه
بتقولي
اني مش لوحدي
و ان ربنا موجود في كل مكان

نصيحه مني ليا
فكر في اللي هتوصل بيه لنتيجه
متسيبش حبل افكارك مش مربوط
و لو في يوم
خفت ماللي جاي
افتكر انه ممكن اصلا مايجيش
او يمكن يجي عكس ما انت متوقع تماما

عيش للنهاردة
و علشان النهاردة
و سيب بكرة لبكرة
و بعده لبعده
كل ده
بأمره هو وحده
ساعتها
لا يوم هتبكي
ولا يوم هتندم
بس اكيد
برضوا
هتموت

5478736

2008-11-05T02:56:00.003+02:00

طول مانا ماشي
في الكليه
حاسس ان ورايا 5478736 واحد
بيشوفوا انا بعمل ايه
و رايح فين
و دماغي فيها ايه

لو نسيت حاجة معملتهاش
احس ان الــ 5478736 واحد دول بيقولوا ( يخرب بيتك )

و لو اتأخرت عن محاضرة
احس ان الــ 5478736 واحد دول بيقولوا ( جاتك خيبه )

و لو قعدت اضحك شويتين مع صحابي
احس ان الــ 5478736 واحد دول بيقولوا ( ينيلك يا بعيد )

و حتي و انا في حالي مش سايبني

أبقي قاعد في المحاضرة
واحد يسأل سؤال يعجب الدكتور
تلاقي الــ 5478736 واحد دول بيقولوا ( شايف الناس الفالحين )

اعدي علي مكتب المعيدين
الاقي فيه 5 ولا 6 قاعدين بيسألوا عن حاجات والله عارفها
تلاقي الــ 5478736 دول بيقولوا ( شكلك مش نافع يا مرسي ( انا اسمي محمد علي فكرة ) )

و الــ 5478736 واحد دول ولاد لذين
أول ما افتح كتاب في البيت
الاقيهم ( الــ 5478736 برضوا ) بيقولوا ( ياااااه كل ده !! انت متأخر و مش فاهم .. مش هتلحق )

بجد خنقوني
ولولا انهم 5478736 واحد كنت مسكتهم قطعتهم
أعمل فيهم ايييييييييييه ؟؟؟؟؟

تخيل كده
لو انت بتذاكر في اوضه فيها 5478736 واحد
اللي قاعدلك و اللي واقفلك و اللي بيحسب ذاكرت قد ايه
و الباقي كل واحد واقفلك بالمرصاد
هتعمل ايه ؟؟

ملحوظه هامه:
محدش يسأل اشمعني 5478736 لحسن ابعتهملوا يعدهم براحتوا
و هما بيرحبوا

الله أعلم

2008-11-03T02:57:00.002+02:00

يوم بيمر وراه اليوم
ساعه بتشد في ساعه بعدها
و ثواني بتجر بعض
حبل رقيق
لا ينقطع الا بامره

و طول ما احنا ماشيين عليه
بيجي اليوم اللي نقابل فيه ناس
و اليوم اللي نسيبهم فيه

ساعة الضحك معاهم
وراها ساعة بكاء عليهم

و يبقي الحال سجالا
يوم لقاء
و يوم فراق

و يوم الفراق
لما نفتكر يوم اللقاء
نبكي

و يوم اللقاء لما نفتكر
يوم الفراق
نحبي

نحبي علي حبل تاني
ارفع بكتير
و طويل

و يا تري
هنقابل اللي فقدناهم فين؟؟
اخر الحبل
ولا تحتيه في جهنم

الله أعلم

عذرا,, ما هي الا كلمات اختنقت بداخلي فأردت أن أفرج عنها

أنا عارف نفسي و تلكيكي ( كلاكيت تاني مرة )

2008-10-30T00:56:00.004+02:00

"لست كما ظننت أنك ستكون" قالتها و قد رمت نظرة حادة تجاه الأفق - و كانت الشمس قد استقرت فوق تل منخفض - .. تفقدت ملامح وجهها - كأنما اراه للمرة الأولي - و كنت في اشد الفضول لأعرف معني كلامها .. و لكنها كانت رحيمه بي و استرسلت في كلامها قائله " لا تسألني فكل ما أعرفه أنك لست مثل الباقين " ..

و مع جملتها الأخيره, اختلطت الأفكار بداخلي, و تمنيت لو أعرف وجه الاختلاف بيني و بين الباقين, و هل أنا لست بحسن مثلهم ؟؟ ام لست بسيء مثلهم ؟؟

و لكن سرعان ما عادت الي طبيعتي الغالبه, و تناسيت مشاعري و أفكاري, و رسمت نظره جاده علي وجهي لأقنع نفسي بأني مازلت كما انا لم أتغير ..

تابعت طريقي و تابعت طريقها, و مع بعد المسافاه بين وجهتينا الا اننا التقينا .. التقينا بساحه عقل أبي أن يترك الأمر من دون تفكير .. و ظل يفكر و يستنتج و يحسب بلا نواتج .. و لكني في النهاية أغلقت باب التفكير و فضيت اللقاء بداخل عقلي و افترقنا .. و لم أنظر للخلف مره أخري .. ( علشان عارف نفسي و تلكيكي ) ..

و أنا بكتب الPost ده أفتكرت Post قديم كنت كاتبه بعنوان : ويــــــــلات

فلنحيا بها

2008-10-27T01:05:00.006+02:00

فلنكافح من اجلها
و ان خسرناها
فلنبحث عنها في كل الطرقات
فلنجعلها هي اسمنا
و عنواننا
نجعلها طريقتنا و اسلوبنا في الحياة

ان مررنا بسعاده اتتنا راغبه
و ان مررنا بكرب
نستدعها

انها البسمه

أنا عايز ابقي الكورة الصفراء ديه

عجزت عن اختيار عنوان

2008-10-23T16:27:00.006+02:00

أشرقت الشمس, و اخترقت اشعتها الذهبيه الفراغات الفاصله بين اخشاب ذلك الشباك القديم الواقع في منتصف حجرتي, و بينما انا مستغرق في نوم عميق, اذ بشعاع متطفل يطل علي عيني مباشره, و اشتدت حدته حتي اخترق الجفون و سرق النوم هاربا الي حيث لا استطيع البحث عنه, اضطررت لتسليم الأمر و تقبله, و فتحت عيناي علي اخرهما لاقنع نفسي بان الأمر قد قضي و ها انا أرحب بيوم جديد ..

و بالرغم من تسامحي مع ذلك الشعاع المتطفل, الا اني تأكدت ان ذاك الشعاع لم يكن الوحيد الذي خطط لسرقه نومي, فها هو جرس المنبه يخترق اذاني بصوته المفزع, لأجد نفسي قد قفزت قفزا لاتخلص منه, و مع قفزتي الأخيرة خسرت كل ما تبقي من اثار نومي الحبيب, و لكن سرعان ما استسلمت للامر الواقع و جررت جسدي الي حيث ترقد ملابسي و حقيبتي, و اسرعت في الاستعداد للخروج بعد اداء صلاه الصبح ..

و ها انا هائما علي وجهي في الشارع الاحق الزمن مسرعا لألحق بموعدي, و علي الرغم من المعاناه المعتاده في اختراق شوارع المحروسه, الا اني - و الحمد لله - وصلت بالسلامه و لم اكن من المتأخرين ..
و مع اول خطوة لقدمي داخل اسوار الجامعه تذكرت الكثير و الكثير من الهموم التي اعتاد عقلي استدعائها في الصباح - و كأنه يشتاق اليها - , و مع اعتيادي علي هذه الأفكار و قدرتي علي محاربتها, الا انني اعجز تماما عن التخلص من الاحساس الذي طالما أرق نومي, ذلك الأحساس عندما أتذكر كيف هو حال قلبي, و كيف تٌركت عروقي خاوية علي عروشها لا نبض فيها ولا دماء, و كيف تحول ذلك القلب الشاب المفعم بالحياة الي عجوز كريه يحيا بلا امل .. و كيف اوصدت ابوابه في وجه كل ما هو جميل, فأصبح لا يسمع ولا يري و لا يتكلم .. أصم أبكم أعمي .....

و مع استغراقي في التفكير اشعر و كأني بحاجه الي بعض الدفء, فهذا الاحساس يذكرني ببروده الحجر المهجورة المظلمه التي مر عليها زمن لم يفتحها أحد, فأجد يداي المرتعشتان تلمسان قلبي في محاوله لتدفئته, و أجد شفتاي الحزينتين ترددان ما يطمئن قلبي و يعده بالخير و يبشره بالحدث السعيد الذي أقترب ميعاده ولو لم نكن نعلم متي هذا الموعد .. هذا الحدث المنتظر .. هذه اليد التي ستحل محل يداي المرتعشتان و تلمس قلبي لمسه لا يحزن بعدها ابدا, و تلك العين التي ستشعل نيران قلبي, نيران مضيئه بردا و سلاما, تضيئ قلبي و تدخل البهجه علي الحجرة المهجورة فترقص فرحا .. وا صبراه, الي متي سيطيل علي الدهر الانتظار ..

و بينما أنا غارق في احزاني و همومي, اذ بي ألمح شيئا استوقفني في مكاني, و أحسست و كأنني لا اسمع ولا اري و لا أشعر الا بوجوده, و كل الأشياء الأخري أختفت .. تلك البسمه التي صاحبتها نظره و اندفعوا كالسهم الذي اصتدم بقلبي .. اصتدم بالوريد فهز كل اركاني, و اذ بي اشعر و كأن ذلك القلب العجوز قد عاد الشباب اليه فقفز فرحا و سعاده ..
لم تستمر البسمه سوي لحظه واحده, بعدها استدار ذلك الوجه الملائكي الي حيث لا استطيع رؤيته, أفقت مما أني فيه و اذ بي اسرع خطاي الي حيث يمكنني القاء نظره أخري, و هذا ما حدث, وقفت طويلا انظر و اتفرس و لولا انني تمالكت نفسي ما كانت عيناي لتشبع مما رأيته من جمال .. هي تملك كل ما بالجمال من معني, هي تنثره حولها لعده اميال فتؤثر علي كل ما حولها فتجعله جميلا مشرقا, هي ما هي الا كل ما كنت اخشي الا اجده .. هي من ببسمتها انست علي وحدتي و جذبتني اليها فلم يكن هناك مفر منها الا اليها, و لم استطع ان اتمالك نفسي منذ ذلك اليوم, و أستمر الحال علي ما هو عليه, يمر اليوم لاشتاق لليوم الذي يليه حتي اراها و احادثها و تحادثني باسمه ...

لم يمر الكثير من الايام حتي اعتدت عليها و احسست و كأنها من تكملني, و كأنها من أريد .. الا ان جاء اليوم الذي لم اكن أحسب له حساب ..
يوم اشرقت علي ببسمتها مرحبه - و لاشراقها جلال و رهبه - و بينما عيناي تتابع عيناها اللامعتين و هي مقبله علي من بعيد, جذب نظري ذلك الشيء الصغير الذي يلمع علي رقبتها حتي أقتربت مني فوضحت ملامحه, و بدأت استنتج ما انا فيه و ما علي فعله, و من شده حزني اردت أن اتأكد مرة اخري مما رأيت, لعلي كنت مخطأ في المرة الأولي , و لكني للاسف لم أكن مخطئا ... فهذا الشيء اللامع الصغير هو صليب ذهبي يتدلي من سلسله ذهبيه تلتف حول عنقها .. هو صليب

لا ادري هل كان موجودا من قبل و لم اره, او لم يكن من ضمن حساباتي ..
لا ادري اهو فعل من افعال القدر أم هو مما قدمت يداي ..
كل ما اعلمه الان
أنه
صــلـيـــب

صور عجبانى

2008-10-23T01:58:00.007+02:00

أنا بطبيعتى غاوية كلام...و بصراحة ساعات ببقى رغاية - الحمد لله مش دايما -بس النهاردة بقى مش هاتكلم كتير...هاحط شوية صور عجبتنى فى الفترة الأخيرة و يمكن دول يكونوا معبرين عنى أكتر من أى كلام..

نبكي و يضحك

2008-10-18T19:42:00.004+02:00

للدنيا بسمه, تغزل معاني السعاده لتصنع غطاء من المرح و الراحه يغطي قلوب بني ادم, له ملمس الحرير عندما ينتقي من أجود الأنواع, و له رائحه مياه النهر عند الاصيل عندما تداعب الشعاعات المتبقيه من عين الشمس سطح المياه فيلمع عليها القرص الاحمر ...

و للدنيا بسمه, تأتينا بالأمل تاره و بالحنين تاره أخري, و تجذبنا لحب الحياة, فتجعل من انفاسنا المتصاعدة أعز ما لدينا, و تجعل من نور اعيننا أعظم ما نملك, و عندها نكون في غني عن كل ما هو مادي رخيص - و ان غلا ثمنه - و نتجه بقلوبنا و اعيننا الي مصدر تلك البسمه, و نستمد سعادتنا منها, و نتمني لو تكون هكذا دائما .. مبتسمه .

و لكن سرعان ما تتقلب الوجوه, و تعلوا دموعنا العيون, و نتنهد و نتؤه في ألم, و نحترق من الداخل احتراقا كاملا يمحوا معالم السعادة التي تمتعنا بها لوهله, و يستبدلها بسواد عظيم يغطي جدار القلب ..

تتبدل الأحوال, و تمر الساعات, و يبقي الزمن هو سيد القرار, هو من يحدد متي يبكينا و متي يضحكنا, و ما علينا سوي السمع و الطاعة .. و الرضي .. و التمني .. و الدعاء ..

و في تلك الظلمة, يظهر البطل, هذا الذي سيعيد لنا بسماتنا ,هذا الذي سيصارع أمواج الزمن و يتغلب عليها بل و يخترقها .. هذا الذي لم تعرف الدمعه طريق لعينيه, فنجد انفسنا نبكي و هو يضحك . . .

1/1800 باشمهندس

2008-10-07T22:15:00.002+02:00

السلام عليكم
امبارح كان أول يوم ليا في كليه هندسة, شيء مختلف تماما عن ما كنت اتصور أو أتخيل, من اللحظة الأولي اللي وصلت فيها المليه حاسس أني في عالم تاني مختلف عن اللي كنت فيه, ناس ماشية بلوح و مساطر و ناس بتحل شيتات و ناس بتراجع ورق - مع اننا في أول يوم دراسة - .. حسيت ان كل اللي اللي انا شفته ده كوم, و اللي لسه هاشوفه ده كوم تاني ..

بس برضوا في ناس معانا تعبانين عالاخر, جايين بفلوسهم يبعتروها, و مش عايزين غير لقب يا بشمهندس - اللي انا بعشقه شخصيا - بس ولا يهمهم هما ينجحوا ولا لا و يتعبوا ولا لأ.. ربنا ما يقربني من حد منهم ..

من أول محاضرة حضرتها و أنا عرفت أني مقبل علي شيء متعب جدا و مجهد جدا جدا, محتاج مني وقت و مجهود و تركيز, تقريبا محتاج أني أغير أسلوب حياتي كله, و أسخر معظم حياتي للكليه و مذاكرتها, محتاج يبقي الجزء الأكبر من تفكيري يكون في أني مهندس - مستقبلا يعني - و منشغلش بشيء يبعدني عن الدراسة و الهندسة ..

و من ضمن الاشياء المتعبه, أني داخل عالم جديد و انا لوحدي, مافيش حد اعرفه معايا نساعد بعض و نشجع بعض, يمكن ده أحسن علشان اركز بس في اللي قدامي, بس الصحبه بيبقي شيء جميل خصوصا ان انا اصلا مش بعرف اقعد لوحدي فترات طويله, بس ان شاء الله ربنا يرزقني بصحبه كويسة ..

أكتر حاجة بقي هتتعبني, الضغط اللي هيبقي في البيت هنا, يعني ان شاء الله انا مش هقصر, بس هفضل في عينيهم مقصر لحد ما الامتحانات تأكد ده أو تثبت عكسه, و ان شاء اله أكون قدها ..

النهاردة برضوا كنت بحارب كل الأفكار السلبية اللي بتتسربلي من الناس اللي قصادي, اصل في معانا ناس ممله كده و جايه عايزة تنام, و ناس تانيه عايزة تهزر و تهرج, بس الحمد لله ملاقيتش ناس عايزة شكل ولا بيرسموا نفسهم - لان اصلا مافيش بنات كتير في الكليه -, يلا ولا يهموني ..

مشكلتي في تنظيم وقتي هتبقي اكبر عائق قصادي, بس ان شاء اللع أعرف أحلها, و ربنا المعين ..

نفسي بعد 5 سنين أرجع اقرأ الكلام ده تاني, و اقول لنفسي, Well Done يا بشمهندس ..

بين الصحة و المرض

2008-09-23T11:14:00.003+02:00

ان مسني الشيطان بضر فلا كاشف للضر الا الله, و ان مسني الله بخير فهو علي كل شيء قدير ..

متأكد - من غير أي شكوك - أن ربنا قادر علي كل شيء, و متأكد أكتر أن مش كل ما يصيب المرء من ضر هو غضب من الله عليه .. بس الحكاية أني بتفلسف شوية في نقطة ما بين الصحة الكاملة و المرض المميت .. لو تخيلنا أن شخص سليم معافي لا يشعر باي قصور أو أمراض جسدية, و لم يزق طعم الألم, هيحس ازاي بأن ربنا أنعم عليه, ن غير ما يكون عارف أن في أسوأ مما هو فيه ...
محدش فهم حاجة .. أنا عارف

مثل تاني ... لو أنا عايش طول عمري في القطب الجنوبي - مثلا - و عمري ما خرجت منه, وواحد ذكي شوية قالي " أنت حرران" هفتكره بيشتمني علي طول, لأني مجربتش أحساس ان أنا حرران, يعني عمري ما هاقول الحمد لله أني مش حرران لأني مش عارف ايه معني الحر أصلا ..

نفس الحكاية بقي عن المرض, عمري ما هاقول الحمد لله علي نعمه الصحة الا لما أجرب المرض, و عمري ما هاحس بسعادة كلمة " الحمد لله ربنا شفاني " الله اما اذوق عكس الشفاء - المرض يعني - .

لف كتير و دوران كتير و الفكرة بسيطة, أنا مش هاكون حزين لأني مريض, لأن بكوني مريض بعمل كذا حاجة فيها خير ليا:
1- أني أصبر علي مرضي و ربي يجازيني خير.
2- أني أدعي ربي و للدعاء حسنات.
3- أني أحمد ربي يوم ما أحس اني مش تعبان أو اني شفيت من مرضي.
4- أني منتظر و بشوق اليوم اللي أخف فيه و أشعر أني طبيعي - بجد أحساس زي أفلام التشويق - .
5- أني احس و أعرف مين حواليا يهمه أمري و بيسأل.

كفاية قوي كده .. هي ديه نظرتي الايجابية لكوني مريض .. أعتبروها فلسفه أو جنون بس ما هي الا مصبرات علي الابتلاء .. و لصبر جميل خير من صراخ و عويل - ديه جملة من تأليفي أنا :) - ...

المواجهة الثانية

2008-09-12T02:38:00.002+02:00

المواجهة التانية ليا مع الجنان و المجانين حصلت فى نفس مكان و تقريبا نفس زمان المواجهة الأولى. حصلت فى نفس الشارع الطويل اللى كنت بمشيه عشان أروح المدرسة و انا فى ابتدائى. الشارع ده كنت بمشيه كتير مع أهلى لأنه كان هو اللى بيطلعنا على الشارع الرئيسى, وعشان كدة مواقف كتيرة من اللى حصلتلى فى المرحلة دى من عمرى حصلت فى الشارع ده.
ماتستغربوش ان اكتر من مواجهة مع الجنان حصلت فى نفس الشارع, الحكاية هى ان اكتر من منطقة و منهم الجيزة كانوا فى الوقت ده معروفين بوجود المجانين السارحين فى شوارعهم ( كون الشوارع دى راقية, عادية, او شعبية مكانش بيفرق كتير) كل شارع بقى مشهور بوجود مجنون أو مجنونة أو أكتر فيه. و ساعات كانوا بياخدوها نوبات أو shifts و يبقى الشارع ليه المجنون بتاعه الصبح و المجنون بتاعه بليل.
الظاهرة دى طولت لدرجة انها بقت لا ظاهرة ولا حاجة, بقت حاجة عادية جدا و سكان الشوارع دى اتعودوا على المجانين بتوع شارعهم و بقى التعامل معاهم جزء من حياتهم اليومية. و لما مجنون ولا مجنونة من دول يختفوا فجأة تلاقى الناس استغربت و بدأت تسأل عليهم...يا ترى الحكومة حنت عليهم ولا علينا و لقتلهم مكان يعيشوا فيه؟؟ - و ده احتمال مستبعد جدا – , يا ترى زهق ولا زهقت من شارعنا و بقى مش من مستواهم فا راحوا يشوفوا مكان أرقى شوية أو يغيروا جو ؟؟ - ماهو اكيد المجانين من حقهم يغيروا جو و يبقى عندهم تطلعات طبقية و طموح برضه - ... و الناس كانت فعلا بتقلق على المجانين دول و بتوصل انهم يسألوا و يدوروا عليهم.. الشعب المصرى ده غريب مش كده ؟

ندخل بقى على المواجهة نفسها:
– معلش برضه طولت فى المقدمة أوى مافيش فايدة فيا –
برغم ان المواجهة التانية بتشبه الأولى فى المكان و الزمان و فى انى عمرى ما جتلى الجرأة أقرب كفاية عشان أعرف تفاصيل أكتر بس فى اختلاف بين الاتنين فى شخصية المجنون و الاحساس الناتج عن المواجهة. المرة دى هحكيلكم على واحد من اكثر المجانين المرعبين اللى شفتهم فى حياتى , تعالوا نسميه ابو الشعور و هاتعرفوا السبب فى التسمية دى حالا لما أوصفهولكم..الراجل ده كان بين الأربعين و الخمسين سنة, و كان ضخم جدا ..ضخم عملاق يعنى – عريض المنكعين شلولخ على رأى عادل امام - أما بقى حكاية ابو الشعور دى فسببها هو انه ماكانش يعرف حاجة اسمها حلاقة..شعره و ذقنه طوال لدرجة انك ماتعرفش تفرق بينهم ولا تقدر تميز أى حاجة من ملامح وشه, لأ و الغريب انهم ملفلفين فى شكل اسطوانى كدة ولا تسريحة مارى انطوانيت. فعلا لما تشوفوه هاتعرفوا شكل الانسان قبل اختراع اى طريقة من طرق الحلاقة و ممكن تفتكروه من رجال الكهوف ووقع من آلة زمن ولا شق فى جدار الزمن و مش عارف يرجع لأهله يا عينى – معلش متأثرة بأفلام الخيال العلمى شوية –
الراجل ده شكله كان بيحب الغوامق أوى..من أول راسه لرجليه لون مجهول بين الأسود و البنى كده ماتعرفوش تفرقوا بين شعر و جلد و هدوم, كله لون موحد. متخياين لما طفلة بريئة فى ابتدائى و اصلا حجمها أقل من الحجم الطبيعى – احم احم مش عايزين تريقة – تقف قدام عمو ابو الشعور ده هيبقى احساسها ايه ؟؟ لأ و كمان ماسك عصاية أقرب الى الشومة فى ايده طول الوقت..ولا صوته مش عارفة اوصفه ازاى غير بالكلمة الفصحى جهورى...حاجة ترعب مش كده ؟؟
بس الراجل بصراحة كان قاعد فى حالة و مش بيئذى حد الا اذا حد استفزه فعلا , فى الحالة دى هتلاقى الشارع كله بيجرى ولا كأنهم فى الماراثون. من هنا جه الفرق فى الاحساس بين المواجهتين..فى أول مواجهة كان بيغلب عليا الاستغراب و الشفقة على حال الست دى و الاعجاب باخلاصها للقطط. بس هنا كان بيغلب عليا الخوف و الرغبة فى الجرى أو انى استخبى ورا أى حد كبير. بس ده مايمنعش انى كنت دايما بسأل ايه اللى يخلى راجل محترم – والله العظيم شكله كان محترم و ماتسألونيش ازاى - و ما شاء الله على حجمه و صحته اللى بتأهله انه يكون مصارع ولا بدى جارد يوصل للحالة دى من الضياع و التوهان ؟؟ الله أعلم بس أكيد حاجة صعبة أوى و كبيرة أوى..خمنوا بقى اللى ممكن يكون حصل و أشوفكم على خير فى المواجهة الثالثة.

واجتمع القنافذ

2008-09-05T04:05:00.011+02:00

كان ياما كان, من دون ذِكر العصر ولا الاوان, و من دون مقدمات تُنفِر العقول و الابدان

شائت الاقدار و لعبت لعبتها, و تواجد مجموعه من القنافذ في الصحراء
من دون ماء ولا عشب, فقط رمال

تفرقوا علي ظلال لنباتات الصبار, ليحتموا بها من اشعه الشمس الحارقه
كل يقف تحت نبته, لا يتكلمون ولا يتحدثون, متباعدين عن بعضهم بالاميال

اخذت الحرارة في الاعتدال, و الشمس قَصُرَت يدها و لم تجد ما يطال

و خرج القنافذ من ظلالهم و تحدثوا معا و جرت افعال

وجد كل منهم صديق و أليف, و ارتبطوا برابط قوي فعال

تحركت الشمس و اقترب الليل, و ظهر قرص القمر في اطراف السماء
و بدأ يخيم عليهم شبح البرد, برد الصحراء القَتّال

في ذلك الوقت اجتمعوا, و بدؤا يتقربون من بعضهم اكثر فاكثر
يتقربون و يقتربون, و من البرد التصقت الابدان

و هنالك بدأ صراخهم يعلوا, فاشواكهم تجرح احبائهم
و الالم قاتل و الصراخ عال

فابتعدوا و تشتتوا ناظرين الي بعضهم و البرد قارص
كل يتمني ان يكون علي الاقتراب مُعَان

والان الموقف حيره, ايلتصقون و يجرحون بعضهم البعض ؟؟
ام يتباعدون فيلسعهم البرد ؟؟

جاوب فهم من يطرحون عليك السؤال

مش عايزة اعمل كدة تانى

2008-08-30T09:13:00.005+02:00

النهاردة حد عزيز عليا واجهنى بحقيقة كنت عرفاها بس ماكنتش معترفة بيها... حقيقة انى انسانة متشائمة و غاوية اشيل هم الدنيا فوق دماغى و اعد احط كل المشاكل فوق بعض لحد ما يعملوا عقدة فد كدة و ساعتها ابتدى افكر فى حل للمصيبة اللى أنا شايفاها مصيبة مع انها شوية مشاكل عادية اتجمعوا على بعض.. حقيقة تانية واجهنى بيها حد تانى غير الأولانى بس برضه عزيز عليا هى انى غاوية اعيش تحت عناوين كبيرة و بترن لما الواحد يسمعها يعنى مثلا زى " محدش فاهمنى" " انا مختلفة و عشان كدة وحيدة" " مشاعرى بتروح على الفاضى" " الناس واخدينى كأنى مسلم بيا و كأن مش من حقى اغلط " و كلام كتير شبه دة..جايز يكون الكلام ده جزئيا صح و بيحصلى فعلا بس مش للدرجة اللى تخلينى احطله اسم و اعتبره حقيقة و مشكلة كبيرة فى حياتى و اعيش فى نكد معظم الوقت. لما الاتنين واجهونى مش هانكر انى مصدقتش من اول لحظة و عاندت معاهم و مع نفسى قبل ما اكتشف ان دى عيوب فيا فعلا..... أنا مش عايزة اعمل كدة تانى

انا بجد لما فكرت و حسبت الأمور مع نفسى لقيت انه صحيح عندى شوية مشاكل بس المشاكل دى مش سبب كافى انى ابقى كئيبة و مضايقة على طول و معرفش اتمتع بحياتى..و الأهم من ده هو انى لقيت فى حياتى حاجات كتير حلوة تستاهل انى افرح و احمد ربنا عليها ..انا فى الآخر وعدت نفسى انى مش هاعمل اللى كنت بعمله دة و انى هاخد كل مشكلة لوحدها و ابسط الأمور شوية, و انى هاتعلم يعنى ايه اتعشم فى ربنا خير.. و ازاى ابقى متفاءلة شوية...
ادعولى انى اقدر انفذ الوعد...و بس ملاحظة اخيرة:
انا مش نكدية ..و بجد بكره النكد

المواجهة الأولى

2008-08-28T03:29:00.002+03:00

أول و يمكن أغرب مواجهة ليا مع عالم المجانين حصلت و أنا صغيرة أوى , مش فاكرة امتى بظبط , يمكن فى فى ثالثة أو تانية ابتدائى و يمكن قبل كدة كمان ..برغم ده أنا فاكراها زى ماتكون حصلت امبارح...
وقتها أنا كنت ساكنة فى الجيزة و كنت بروح مدرستى مشى مع بابا أو عمى . كنا بنمشى شارع طويل فاكرة كل حاجة فيه لحد النهاردة. الشارع ده كان فيه محلات فكان دوشة بليل, لكن الصبح كان هادى بطريقة غريبة ماتسمعش فيه غير صوت القطط و الكلاب.. المقدمة طولت مش كدة ؟؟ طيب ندخل فى المواجهة نفسها قبل ما تزهقوا ولا تناموا منى ....فى الشارع ده أنا شفت واحد من أغرب المشاهد اللى قابلتها فى حياتى.. ست... لا هى شابة ولا عجوزة لكن معرفش سنها اد ايه لأنى عمرى ما جتلى الجرأة انى أقرب كفاية عشان أعرف مع انى شفتها أكتر من مرة.. الست دى كانت بتلبس اللى عمر ما أشهر مصمم أزياء قدر يبتكره, كانت دايما لابسة طرحة سودة قديمة, أكيد هاتقولوا يااااااا سلااااااام طرحة سودة مرة واحدة.. ايه يعنى الجديد ؟؟ معلش اصبروا حبة و انتم تعرفوا... بعد ما ننزل من منطقة الطرحة السودة هنلاقى اللى أنا اقصده , حاولوا تخمنوا أغرب حاجة ممكن انسان يلبسها و ما تتخضوش من اللى جاى ... الست دى كانت بتلبس قطط .. أيوة قطط .. مش قلتلكم ماتتخضوش .
بس ماتقلقوش , القطط عايشة و آخر تمام . هدوم الست دى كانت عبارة عن حاجة كدة شبه الجلابية مبهمة المعالم و فى كل حتة فى الجلابية دى متعلقة حبال و شرايط و كل شريط ملفوف حولين قطة و معلقها من وسطها فى الجلابية, قطة عايشة و بتنونو .. أه والله بتنونو ... تخيلوا واحدة ماشية و على جسمها أكتر من عشرين قطة مربوطين فى هدومها , اللى نايمة و اللى بتخربش و اللى بتنونو.
الست كانت طول النهار تلف فى الشوارع بقططها تدورلهم على أكل و شرب و تأكلهم قبل ما تأكل نفسها , و لما تتعب من اللف كانت بتعد على الرصيف و تتطبطب عليهم زى ماتكون أم بتنيم ولادها.. متخيلين المنظر ؟؟ و الله أنا ما كنت عارفة أخاف منها ولا أخاف عليها و على قططها من قسوة الشارع.
طب مين الست دى و ايه حكايتها ؟؟ الله أعلم بعباده.. كل اللى سمعته كان طراطيش كلام كدة, مرة يقولوا انها كانت متجوزة و عندها ولاد كتير بس ماتوا فى حادثة أو بعيا, و مرة يقولوا ان جوزها أخد الولاد و طردها فى الشارع , و مرة تالتة يقولوا انها كانت غنية و جميلة بس ماتجوزتش ولا خلفت فا اتجننت من الوحدة.... أنا معرفش الحقيقة فين فى دول ولا أذا كانت فيهم أصلا, أنا أعرف بس انها عملت القطط دول ولادها.. تأكلهم و تنيمهم و تدافع عنهم بشراسة لدرجة انك تحس انها ممكن تاكل اللى يقرب منهم أو يئذيهم. كل دة برغم ازعاجهم و نونوتهم و قرفهم و خربشتهم..متهيألى لو كل أم أو أب عاملوا ولادهم كدة الدنيا هتختلف كتير...
يالا كفاية كدة النهاردة عشان شكلى تعبت أعصابكم و صدعتكم بنونوة القطط .. أشوفكم فى المواجهة التانية ان شاء الله.

في حديقتي زهرتان

2008-08-25T20:24:00.011+03:00

في حديقَتي زهرتان, تؤنِسان نظراتي و تلوحان لي في الذهابِ و الاياب, اخشي عليهما من كل مارٍ و احفظهُما من كل عَين, فأحجب عنهما نظرات الماره و اخفيهما وراء سياجٍ عظيم لا تخترقه النظرات .... و لكني وجدتُ انه بحجبهم عن نظرات الماره, أحجب عنهما نور الشمس, فتموت الالوان فيهما و تنطفيء ارواحهما .... لذا قررت أن أعلن عن وجودهما, و لكن للشمس فقط, فقد قررت أن اضعهُما في أعلي الاعالي حيث الشمس ساطعه تُغذي ارواحهُم, و في نفس الوقت لا يراهم من هم مارون في الاسفل ....

ألستُ بمنّاعٍ للخَير ؟؟؟

-------------------------------------
اذاً
وان مت ظمئانا فلينهمر القطر

مواجهات مع عالم المجانين

2008-08-23T06:06:00.002+03:00

المجانين أنواع ,منهم اللى سايقين الهبل على الشيطنة و عاملين فيها مجانين أو بيتصرفوا زى المجانين عشان محدش يحاسبهم على أى حاجة بيعملوها .. و دول للأسف الشديد كتروا أوى حوالينا اليومين دول. و منهم المجانين اللى بجد, قصدى المصابين فعلا بمرض نفسى بيخليهم يعملوا تصرفات غير عقلانية و غير منطقية, دول فعلا اللى ماينفعش يتحاسبوا و ربنا يشفيهم و يعينهم على اللى هما فيه. أنا بقى لسوء – أو يمكن لحسن – حظى اتعرضت لمواقف حطتنى في مواجهات مع النوعين . و هنا أنا هاركز على النوع التانى , يمكن عشان النوع الأول مش حاجة غريبة علينا و كلنا اتعاملنا معاه كتير.

ماظنش انها معلومة جديدة عليكم انه خلال السنين الاخيرة قامت مستشفيات المجانين الحكومية باطلاق سراح الكثير من ساكنيها لعدم وجود أماكن كافية بالمستشفيات – ايه ده ؟ المجانين كتروا أوى يا جدعان – و عدم وجود الموارد الكافية للانفاق عليهم , او بمعنى أصح عشان مش عايزين يصرفوا عليهم تانى و كفاية اوى لحد كدة ولا هو أكل و مرعى و قلة صنعة على رأى المثل الشعبى . المهم يعنى المستشفيات دى طالبت أهالى المرضى باستلامهم و رعايتهم بمعرفتهم بقى بعيد عن المستشفى , أما المرضى اللى مالهمش أهل أو اللى اهلهم رفضوا استلامهم فتم اطلاقهم فى شوارع مصر المحروسة هائمين على وجوههم لا يلوون على شىء – ماهو فى حاجات ماينفعش تتقال غير بالفصحى – يخبطوا فى خلق الله و خلق الله تخبط فيهم و كل واحد و نصيبه بقى. أنا عن نفسى كان ليا نصيب مش قليل من التخبيط اللى من النوع ده من قريب و من بعيد و برده سمعت حكايات ليها العجب عن التخبيط اللى اتعرضله ناس أعرفهم فحبيت احكيلكم عليها عشان أشهدكم معايا على جنان الدنيا و اللى بيحصل فيها...قريب ان شاء الله هاحكيلكم أول مواجهة ليا أو أول خبطة فى حياتى.

قلبه علي لسانه

2008-08-23T04:33:00.005+03:00

السلام عليكم

تجربة غريبة جدا مرت عليا النهاردة, اتطلب مني اذ فجأة اني اروح ابوس ماما و اقولها سلامتك ( علشان عيانه شوية ), عادي جدا الطلب بالنسبة لاي حد بس انا استتقلته قوي ( مش علشان مش بحب امي ) بس حسيت اني مش هعرف ... المهم مع الالحاح قررت اني اروح .. و روحت هزرت معاها شوية .. و بعدين سألتها " هو أنت لسة عيانة ؟؟ " ... قالتلي "يعني قريبت أخف" ... خلاص قررت اني هبوسها و اقولها سلامتك .. و هوب معملتش اي حاجة و فضلت واقف .. و بعدين مشيت ...

قعدت أفكر شوية كده, ليه ساعات مش بنعرف نقول الكلمة الحلوة ؟؟؟ ليه مثلا تبقي ناوي رايح تصالح حد و ترجع في كلامك؟؟ و ليه كلمة بحبك بتتأخر كتير قوي ؟؟ و ليه انا أسف صعبة ؟؟ و ليه بتستصعب تقول يا حبيبتي او يا حبيبي ؟؟

السؤال جابني لسؤال, ليه ساعات ممنوع اننا نقول بحبك و ليه ممنوع اننا نتصارح طول الوقت بالحب و المعزة و التقدير, ليه بقي الكلمة الحلوة ليها معنيين ؟؟ ( مثلا واحد بيقول لزميلته انت انسانه ذكية يبقي كده الواد عينه منها و بيلف عليها )...

نفسي اقدر اعمل زي ما جاهين بيقول:" انا احب أقول الشعر في الحلوين .. و الحلو أقوله يا حلو في عيونه", نفسي طول منا ماشي اللي في قلبي يبقي علي لساني.. هفضل اقول بحبك - بعزك - سلامتك - انا اسف - سامحني - نفسي نفضل اصدقاء - و كلام كتييير عايز يطلع.. بس محبوس جوة علشان حاجة انا مش عارفها ..

طيب لو انا ماقولتش لصحبي اني بحبه, هو يعرف منين, و لو مقاليش انا هعرف منين ان شاء الله ؟؟؟

نفسي اكسر الحاجز ده و أقول

بس هل ده صح ؟؟

شخبطات

2008-08-21T10:25:00.001+03:00

قبل اى حاجة عايزة أشكر محمد أوى على تقديمى لبينى و بينك ... بجد مش عارفة أرد على كلامك يا محمد و مش عارفة أقولك ايه غير ان الاحترام و التقدير متبادل و شكرا أوى أوى أوى..عارفة ان دة مش كفاية كرد على اللى قلته عنى بس فعلا مش عارفة كلامك دة ممكن يترد عليه ازاى.

بعد كدة بقى عايزة أقدم نفسى بنفسى ليكى يا بينى و بينك... أنا بنت مصرية, مش أميرة على أرض الواقع لكن يمكن نفسى أكون أميرة فى عالم الأساطير ( و على فكرة انت اللى طلعتها فى دماغى يا محمد), مش أميرة يعنى بنت ملك ولا عايشة فى قصر ولا أحسن من حد غيرى..لأ , أميرة يعنى ليا العالم بتاعى اللى ماشى بطريقة مختلفة عن العالم الواقعى اللى عايشة فيه , عالم هادى و مليان سحر و خيال زى عالم ألف ليلة و ماه برى اللى حكيلك عنها قريب ان شاء الله. عالم أبقى أميرته مش عشان أحكم و أتحكم لكن عشان أمشيه بقانون الأساطير اللى هو مافيش حاجة اسمها مستحيل و فيه أقدر أعيش قصة بتاعتى أنا... كفاية سرحان بقى و نرجع لأرض الواقع...
فى أرض الواقع أنا مشخبطا تية كبيرة, مافيش حاجة بتقع بين ايديا و تسلم من شخبطتى.. كتابة على رسم على خطوط مالهاش معنى .. كل أنواع الشخبطة هتلاقيها فى كتبى و أوراقى و حياتى. أنا عندى اعتقاد ان شخصية الانسان عبارة عن شوية شخبطات اتحطت جنب بعض و بتظهر فى كلامه و تصرفاته وكتاباته و فنه لو كان فنان.
زى ما محمد قاللك يا بينى و بينك , أنا حبيتك من أول مرة شفتك فيها و فرحت أوى لما عرض عليا تبقى أختى أنا كمان , أتمنى انك تسمحيلى أفضفضلك و أوريكى شخبطاتى و أتمنى انها ماتدوشكيش أو تفركش ترتيبك...

أختك الجديدة:
ماه برى

انا عارف نفسي و تلكيكي

2008-08-17T02:39:00.004+03:00

مش عايز احبك مش عايز
مش داخل سجنك مش جايز
مش جايز اموت فيكي و فيكي
دا انا اموت فعينيكي من غمزة
أنا عارف نفسي و تلكيكي
هعشق لياليكي من همسة

محمد منير .. دخل حياتي من 6 سنيين .. و بقي صديقي الصدوق .. كل معني جوايا بيطلعة .. كل فكرة بيكلمني فيها .. بصراحة .. منير ده ساحر و حكاية .. أنا كل شوية كده اعلق علي أغنيه و اقعد اكرر فيها .. بتبقي دماغي فيها و ببقي حاسسها قوي ..

الطول و اللون و الحرية .. أغنية روعة في الكلمات و الاداء .. عارفين لما بيكون الواحد نفسه في حاجة بس مستكترها عليه ؟؟؟ بيحبها قوي بس مش متخيل انها ليه ؟؟ رغما عن انفه و مهما يداري بيبان عليه انه عايزها و انه هيموت عليها....

بالظبط الشعر اللي بحبه
و الطول و اللون و الحرية
ده مهفهف علي وشي بلعبه
هوصفلك ايه يغمي عليا

يا راجل دا انت واقع و مسحوب من لسانك .. فالاول عمال تقولنا مش عايز تحبها و مش هتدخل سجنها .. و دلوقتي بتقول انها هي اللي انت نفسك فيها و هي اللي انت عايزها ؟؟؟ تيجي ازاي ؟؟؟
مافيش غير انك اخدت قرار تقفل قلبك, بس اكيد يا منير مش هتقدر تستحمل, وقت ما هتيجي تخبط عالباب هتفتحلها قلبك علي طول, اسمحلي اقولك انك واقع يا منير ......

ماه بري ... شخبطات أميرة

2008-08-15T02:00:00.005+03:00

السلام عليكم
عارفين لما يكون في حد بتكن له احترام كبير قوي, و يطلب منك طلب صغير قوي, بيبقي نفسك تعمل له اكتر من اللي طلبه بكتير ... طيب و لو طلب منك انه يشاركك في عمل شيء, هيكون احساسك ايه ؟؟؟ اكيد هتكون سعيد و متحمس و حابب تعمل كل حاجة صح و مافيهاش اي غلطه ... و هو ده اللي انا حاسس بيه من ساعت ما عرفت ان الأميرة ماه بري (MahBerry) هتشاركني بالكتابه في بيني و بينك ..

مش عارف اقدمها ازاي لبيني و بينك, انا متأكد انهم هيحبوا بعض قوي, بس برضوا لازم اجمع كلمات اقدم بيها الأميرة ماه بري لبيني و بينك ......... يااه تعبت من التفكير ..:
بيني و بينك, بقالك معايا سنة كامله قابلنا فيها ايام كتير صعبة و ايام كتير حلوة, و كنتي فعلا اكتر حد برتاح لما اكلمه و احكيله, و كنت فعلا بتقدري كل كلمه ليا و كنت بلاقي و انا بكلمك اجابات علي اسئله كتير ... باختصار يا مدونتي العزيزي .. ليكي جانب خاص عندي ... و عايز اعرفك علي شخص هتحبيه كتير .. اسمها الأميرة ماه بري (MahBerry) .. و هي حبيتك من اول ما عرفتك .. و نفسها تحكيلك علي حاجات كتير جواها و حكايات كتير عندها .. و انا واثق انك هتسمعيها و تفهميها .. وواثق انها هتقدرك و يبقي ليكي مساحة خاصة عندها.

بيني و بينك ... اقدملك الاميرة ماه بري (MahBerry) ...

حسن الظن بالله

2008-08-05T15:02:00.002+03:00

السلام عليكم
لسة من خمس دقايق كنت بقرأ مقاله كاتبها الداعية مصطفي حسني علي موقع بص و طل, المقال كان بيتكلم عن حسن الظن بالله و ازاي ان حسن الظن بالله بيقرك اكتر من ربك و بيريحك نفسيا و بيخلي عندك أمل مهما كانت الظروف,, أنا احب اني اكتب كام جمله ليا و لأي حد بيقرأ BeniWBenak, جمل أثرت فيا و احب اني افتكرها كل شوية:

- "أنا عند ظن عبدي بي إن ظن خيرًا فله وإن ظن شرًا فله" حديث قدسي
- الإيمان ما وَقَر في القلب وصَدَّقه العمل.. وإن أناساً قالوا إنّا نُحْسِن الظن بالله، وكَذبوا.. لو أحسنوا الظن لأحسنوا العمل
- عبدي، إنك ما دعوتني ورجوتني غفرت لك على ما كان منك ولا أبالي. عبدي، لو بلغت ذنوبك عنان السماء ثم استغفرتني غفرت لك ولا أبالي
- إن الله حليم كريم يستحي أن يرفع العبد يديه فيردهما صفراً خائبتين
- يا ابن آدم لا تخف من ذي سلطان ما دام سلطانى موجود لا يزول لا تخف من فوات الرزق ما دامت خزائنى ممتلئة

عن الاشياء أتحدث

2008-07-01T21:35:00.000+03:00

(1)
.. عن قلمك أتحدث
أهو فرشاه بيدك
ترسمين بها علي جدار قلبي
بالوان السماء ؟!

كلما أتممت النقوش
و ختمتها
تعود عيناي
و كأنها الحاجه للماء

صاحبتني كلماتك
طوال أيام
أحيانا أجدها ملهمتي
و أحيانا شر البلاء

ألا تعلمين
أن لكلماتك سحر
يغمض العيون
و يحرك الأشياء ؟!

(2)
.. عن الحرية أتحدث
العجب كله منك
فبحركه بيديك
تتخطين كل الحدود

كأنك الطير
مسافر
لا يعبأ بالأماكن
ولا كم مر من العقود

يأبي أن يهبط
بأرض
تتشابك فيها
العقول و القيود

ولكن الطير
ان عَلَي البحار و غفل
تضعف أجنحته
ولا يعود

(3)
.. عن العيون أتحدث
أهو معقول ؟!
كيف تجتمع بيعينيك
كل هذه المعاني

أهي عين من السماء
أم سحر
ألقاه الزمن
قرب كياني

كيف تجتمع البراءه بالجرأة
و متي كانت
للوحشية
قدره علي الابتسامِ

تظنينها
مفضوحه غير مستورة
و اظنها تحمل
أسرار أكوانِ

انت اله

2008-06-23T21:15:00.003+03:00

السلام عليكم
صعب انك تعيش وسط عالم طويل و عريض و حاسس انك لوحدك, حاسس ان مقاس العالم ده واسع عليك قوي و انك علي مدي بصرك مش شايف حد قريب منك, و تحس ان الناس أطياف, أشباح, مهما تزعق و تقول ولا هما هنا.. يا ناس انا بحبكم... يا ناس انا عايزكم .... يا ناس بصولي شوية ... ولااااااا هما هنا... كل واحد مشغول في دنيته. ماهو ليه حق هيفكر في مين ولا مين في الدنيا السريعة ديه اللي لو نام فيها هتروح عليه... ماهو لازم بقي يبص لنفسه ...
طب و بعدين.. انت كده هتموت مالوحدة, لازم تعيش وسط الناس و تحس انك موجود,, قصادك حلين بيكملوا بعض:
يا اما تبقي شيء يهمهم و يشدهم اليك بدافع مصالحهم برضوا
يا اما تخلق لنفسك جواك ناس
فيها ايه لما تخلق اهلك زي ما تحب يكونوا ؟؟
اخلق اخواتك اللي انت عايزهم ؟؟؟
ربنا خلقك و خلق الكون
و اختص التكوين من عدم لنفسه
بس اداك مساحة تتمتع فيها بالخاصية الالاهيه اللي هي الخلق من عدم
المساحة ديه هي عقل ... خيالك
ايه المانع انك تستغل ده و تخلق لنفسك العالم اللي نفسك تعيش فيه ؟؟
اهتم بقي بالتفاصيل و ارسم كل حاجة علي زوقك
و عيش في العالم اللي انت خلقته
شوية .. و هتلاقي العالم اللي انت خلقته .. اللي نفسك تعيش فيه .. موجود قصادك في الحقيقة مع اختلاف الادوار
هتلاقي اهلك اللي نفسك فيهم في ناس تانيين
و اصحابك في ناس تانيين
و رزقك هتلاقيه
و مظهرك
و حبك لنفسك
و حب الناس ليك

هتوصل بقي لشيء اسمه
الرضا
ايوة هو ده الرضي
اوعي تفتكر ان الرضي ده يعني ترضي باي حاجة
لا مترضاش غير باللي انت عايزة
و اللي مش عايزة و مقدرلك
ابعد عنه و استخدم خيالك
اخلق اللي انت عايزة
و ارضي بيه

انسي بقي انك وحيد
متقلش كده تاني
انت عبد في الكون
و اله جوه نفسك
و لو مش مصدقني
اسأل نفسك
هي روحـــــك ديـــه مــــصــــدرهـــا ايـــــه ؟؟

مهندس صغير

2008-05-10T14:12:00.003+03:00

كان في مرة مهندس صغير, قال في عقل باله ( أول ما أخلص دراسة هبني عمارة كبيييرة و عالية أكشف بيها كل الدنيا ), و عاش المهندس الصغنون عله حلمه و نسي كل مشاكله و صبر نفسه علشان حلمه...
و أول ما خلص بدأ علي طول يبني العمارة, كان شغال ليل نهار, الناس حواليه رايحة جايه بتسأل مين ده اللي شغال ليل نهار و هو عايز يعمل ايه ؟؟؟.... حاول يكلمهم كذا مرة و يفهمهم انه بيبني عمارة علشان يطلع فوق و يشوف الدنيا كلها و عجبتهم فكرته قوي و قالوا لبعض ( تعالوا نساعده بدل ماحنا مش لاقيين حاجة نعملها )... و ابتدوا فعلا يساعدوة مبقاش هو لوحده اللي شغال, و بدأت العمارة تتبني بسرعة بسرعة وو الدور الأول طله كل الناس فرحت و عملوا حفلات, و قرر المهندس الصغنون انه مايريحش و راح ابتدا شغل في الدور التاني و كل يوم كان يجي الصبح يلاقي الناس مستنياه و يبتدوا شغل علي طول, و بعد كام يوم حس ان عدد الناس يقل, لحد ماباقاش في أي حد معاه... سأل الناس رحتوا فين ؟؟؟؟ طيب بطلتوا شغل ليه ؟؟؟؟
محدش جاوب عليه, كل الناس سدت ودانها, و حزن المهندس و الدنيا بتتقلب في دماغه, نفسه يعرف ايه السبب, ليه الناس مشيت ؟؟؟ طيب راحت فين ؟؟؟

الفرق بين السلبية و الرضا

2008-04-25T16:40:00.002+03:00

الفرق بين السلبية و الرضا

اتكلمت كتير قبل كدة عن اوضاع الحياة في مصر, و بالأخص اللي اتعرضت ليه في حياتي و انا المصري عمرة 18 عام...
بداية من الثانوية العامة للكلية و أمور الحياة العادية و حتي حياتي الشخصية...
و دايما و انا بكتب كان بيبقي جوايا شيء بيكلمني و بيعنفني, اكن شيء بيقولي انك مش ماشي صح, انك بتكلم كتير و بتشكي, و انك مطلع نفسك مظلوم مع انك انت اللي ظالم نفسك:
أنت اللي سيبت المذاكرة في 3 ثانوي علشان ال ايه عملت حادثة في تانية و جبت مجموع وحش, مع انك لو كنت ذاكرت كنت عرفت تدخل كلية أحسن و تتعلم تعليم أحين... بس انت حبيت تعيش دور المظلوم المهزوم..
و انت اللي عرفت ناس مكانش يصح تعرفهم, و في الاخر عايش دور اللحلو الجميل اللي الدنيا حواليه وحشة...
و أنت اللي رفضت الكلية الجديدة من غير حتي ما تجربها, علشان انت عايز تنام في البيت و تمشي بمزاجك...
و انت اللي كسلت حتي تعرف حاجة جديدة و تتعلمها, ال ايه الناس مش عاجبينك و مش عارف تعمل صداقات هناك, مع أن السبب انك كنت بتروح مش نايم كفاية علشان كدة بتكون قاعد مقريف....
و أنت اللي بطلت تذاكر و تاخد كورسات علشان عايز تقعد قصاد الكمبيوتر و تشتغل علي مزاج أهلك...
و انت وانت و انت..

و الصوت ده مش بيفارقني ابدا, بس ساعات بعمل عبده العبيط و بطنشه, و ساعات باقول عليه غلطان و اني انا الصح, و ساعات بيعلي صوته قوي قوي اروح حاطط وداني تحت المخده و أنام, او انزل اقعد في دوشة القهوة, او اسمع مزيكا عالية.....
انما الواضح اني بهرب منه, و طالما بهرب يبقي من جوايا عارف ان كلامة صح, و ان انا الغلط, و اني عايش دور الفدائي شهيد الدنيا...
و ببرر لنفسي افعالي اني انسان ايجابي, و رافض الأوضاع الراهنة في مصر, مع اني في الحقيقة غير راضي و غير ايجابي, انا نداب, بندب وببكي عال الاحوال.. انما أغير او اخد خطوة لأ لأ...

الحقيقة اللي فهمتها بعد كل ده, و الدرس اللي اتعلمته هو ان:
أن أنت ترفض الغلط .. ديه ايجابية
انك ترفضة و تعيش فيه .. ده سخط علي أمر الله

و ان أنت ترفض الغلط .. ديه ايجابية
و أن انت ترفضة و تغيره .. ده رضي بأمر الله

يبقي لازم نستبدل البكاء و الندب بالفعل و العمل ....
يبقي الطاقة و الوقت اللي بيستنزفوا علي البكاء لازم يستغلوا في التغير.. و الاصلاح يبدأ من الداخل .. علي رأيهم
لو رافض شيء, غيره فيك الأول... و بعد كدة بص للناس.. سامعني يا انسان ؟؟

هو ينفع الانسان يتغير

2008-04-24T06:37:00.001+02:00

وسط زحمة الدنيا ديه

هل يقدر الانسان يتغير و هل عنده وقت انه يبص لنفسه اصلا
اعتقد انه صعب

بس ضروري

انت مين ؟؟!

2008-04-21T05:34:00.056+02:00

انت مين ؟؟!
شفتك من كام اسبوع واقفه علي شط البحر الأحمر
ماسكة درع و باصة عالمرجان
السمك بيدور و يعاكسك بالألوان
و مركب صغيرة بتشق البحر قدامك
و المية بتاخد رجلك بالأحضان
حلمت بيكي قاعدة جنبي و بنتسامر
ضحكتك ليا ما فارقتش الحلم
و اتمنيت من جوة قلبي
ان قلبك عليا يحن

انت مين ؟؟!
شفتك من 5 ايام قاعدة علي رمل أسكندرية
ماسكة كتاب و ريشة و قصادك المية
و الناس فرحانة بيكي
من أبو قير للمنشية
حلمت بيكي و بيا و القمر ثالثنا
و الهوا بيعاكس ضفايرك
و أغير أنا منه
يسكت شوية و يرجع
وكأن الغزل فنه

انت مين ؟؟!
شفتك من يومين تحت التوتة عند السد
ماسكة الزعف و الهوا يطير الفستان
تبوسي السمك بعنيكي و الطير يقولك و انا كمان
و النيل ماشي يدندن
و لا اجمل عاشق ولهان
حلمت بينا فوق جبل عالي
و الناس كلها تحت
و النجمة تلمع و تلالي
و البسمة منحوته في قلبي نحت

انت مين ؟؟!
شفتك امبارح طالة عالهرم مالشباك
ماسكة وردة و ساعة و منديل
و فعينيكي حنين لشيء
أو مستنية حلم طويل
اتمنيت أكون جنبك
قصدي ساكن في قلبك
ساري في عروقك كالنيل

يا ريتني أعرف مين انت
و الاقي اجابه للسؤال
اعرف منين ان كنتي ملاك ولا جنية ولا بشرية ولا بلد

غلبت و بيقتلني السؤال
مين هي يا ولاد الحلال ؟؟

قلب فاضي

2008-04-21T04:09:00.002+02:00

يااااااااااااااااه احساس وحش قوي و غريب قوي
عارفين محمد منير لما كان بيبيع قلبه و بيقول : حد عايز قلب فاضي ؟؟
هو بايع ان شالله ببلاش
انا دلوقتي حاسس بيه
القلب الفاضي زي الشريان المفتوح
بينزف دم صاحبه لحد ما يموت

و القلب الفاضي بينزف وحدة و بينزف شوق
اعملوا فيا ثواب و أشتروا
أنا بايع
حد عايز قلب فاضي ؟؟؟

كل حاجة في حياتي

2008-04-14T18:45:00.001+02:00

الصورة ديه فيها كل حاجة في حياتي
بس كدة

من غير رغي

2008-04-14T03:41:00.003+02:00

تصدقوا مش عارف أكتب كلمة
دماغي مليانة كلام بس يجي ساعة الخروج يقف, يتحبس , بيخنقني و هيموتني....

من غير رغي كتير, أنا قريت كتاب البحث عن الذات و عجتني قوي قصة زعيم مكافح, و انسان قدر يوصل انه يحقق اهدافة و يجد ذاته, و انا نفسي اعمل كدة, عندي احلام كتير و اهداف اكتر بس مش عارف احققها ازاي و امتي و فين..

يا رب ارشهدني و اهديني يا رب..

يا أيتها الحياة

2008-04-08T02:26:00.003+02:00

يا أيتها الحياة أتظنينني قادرا علي تحمل هزلك و سخريتك ؟؟؟
أرجوك فاق الأمر الاحتمال
رديني الي ما أنا عليه في حقيقة الأمر
أنا الذي طلب الحب فذاق مراره
و رغب في الصحة فزاد ألمه
و لبس رداء الأمل فالهبته أشواكه
أنا الذي نظرت للدنيا ببسمة حب
فبادلتني بسمتي نظرة استعطاف
عجبت فطاف بي المطاف
عجبت من حالي فزادني الحال عجب
سألت الهدوء فزادني السؤال صخب

يا أيها الصاحب الصديق
أنظر الي بنظرة العطف و بسمة الأمل
فأنا بالتأكيد لست كما تظنني
تعرف علي من البداية
و أعتبرها نهاية البداية
اسألني عني اجيبك
ان كنت لا تستطيع أن تعرفني
أسألني
أقسم بأني لن أكذب عليك
أرجوك اسألني لتعرفني

علشان ماجبتش الكتاب

2008-04-05T06:29:00.003+02:00

السلام عليكم
و ادي تاني اصتدام بالواقع المرير, واقع التعليم المصري, او واقع الدراسة في كلية تجارة جامعة حلوان...
الدكتور الفاضل بتاع القانون, سيادته هو اللي كان معطل النتيجة بتاعتنا, ليييه علشان الباشا ال ايه بيعيد تصحيح الورق علشان الدفعة كلها شايلة المادة, و اذ به ( ربنا يكحمه ) معطل النتيجة علشان معاه كشوف بأسماء الطلبة اللي اشتروا الكتاب و بيسقط اللي ماشتراش الكتاب ( الكتاب اللي مالوش اي لازمة في الدنيا ), و يا ريت الدكتور الفاشل يرحم الغلابة, لأ سيادته بيبيع الكتاب من خارج الجامعة و يتحكم في سعره زي ما هو عاوز.....

تعالوا نحسبها, لو هو بيبيع الكتاب بمكسب 20 جنيه ( مثلا ), الدفعة 10000 مثلا.......... ( والله ما هكمل ).. و يقولك في الاخر حاصل علي شهادة البتاع في علوم البتاع.. ما هو شاريها بفلوسة ابن اللذين... هو ده منظر حد يدرس برة و ينجح اساسا.. دانا مستغرب اذاي ما بيتمسكش تحري... اللهم قيض له عسكري مرور يسحب الرخص و بوكس يقفله بالمرصاد... قادر يا كريم..

سألأت علي لو حبيت أعمل اعادة تصحيح, قالولي لو طالوا انهم يقطعو ورق الاجابة و يقولوا دا فيه ورقة ناقصة, أو يعلمولك أحمر و يقولوا انت كنت بتغش هيعملوها, بس ما يطلعش عندهم حد بيظلم, علشان صورة الجامعة و كدة...
طب أسمع بقي, انا مش حالل حاجة في الرياضة و جايب ( جيد ), و القانون انا لسة فاكره لحد دلوقتي و كاتبلي ( ضعيف جدا )....

لا لا لا... ان شاء الله هاقوم بثورة تصحيح... و ليتحملوا برودهم و نكدهم

السؤال

2008-04-02T02:54:00.002+02:00

بدور علي السبب و جمع السبب أسباب
بدور علي الهدف و لكل هدف باب
باب ينفتح علي سكة
السكة اخرها نور
للمشي فيها صعاب
و لكل باب مفتاح
مفتاح في ايد الحلوة
الحلوة أم الضحكة
ترسم بيها السعادة
السعادة لعبة اجادة
يا اما تنجح و تنول
يا اما تنتهي علي طول

بدور في عيون الناس
و في وقفه الحراس
علي واحد كان صغير
كان حلمة حاجة كبيرة
كان نفسه يلاقي نفسة
كان حلمه يعلي فوق
من غير ما يبص تحت
كان نفسة يلقي ايد حوالية
و عنين بتبص عليه
و كلمة ترد الروح
و يلاقي اجابه ليه

ليه الدنيا بتضحك ساعة
و تكشر ألف ساعة
ليه ساعات الألم بتمر علي الجرح
بدل المرة ألف مرة
و تبص للساعة تقول
اجري خلصيني
تلاقي العقارب واقفة
بتضحك عليك
بتستفزك
مستحلفه لاتهدك

مسكينة الروح الحزينة
اتحطت في جسد مخزن
يلعب و يتلاعب بيها
تخلص اللعبة يرميها
و يحط عليها التراب
و ميسألش عنها تاني
وكأنها كانت سراب

أمتي السؤال امتي الحساب
أمتي نلاقي نهاية العذاب
عذاب السؤال
سؤال الحياة و الوجود
سؤال الكون لعبد الله
وحياتك هتجاوب و الا
هتعيش عذاب و تموت عذاب

السؤال
...............................
اسئلوا انتوا السؤال

الحياة.. ما هي الا تكه (Click)

2008-03-28T18:32:00.000+02:00

CLICK ( أو اضغط علي زر أو ما شابه - ترجمه حرفية ) فيلم دخل مصر عام 2006 و عرض في أكثر من دار عرض لكن ما أظنش أن كل الناس اتفرجت عليه, و يمكن في ناس شغلته و قلبت في النص علي فيلم أكشن أمريكاني, انا باقول كدة علشان انا حاسيت نفس الاحساس بعد بداية الفيلم بربع ساعة, و كنت خلاص هاخد القرار اني أقلب الفيلم في الــ Recycle و أقعد عالــ Facebook أو أدخل انام, لكني قلت استني لحد ماشوف ايه اللي هيحصل في الاخر.. و علي اخر الفيلم كنت عايز أعيده و أتفرج عليه تاني..

الفيلم باختصار كوميديا خفيفه بطلها Adam Sandler و هو ممثل كوميدي معروف بأفلامه الساخرة للواقع, و غالبية افلامه تحمل معاني فلسفيه عميقه يقدمها مع الكوميديا الخفيفة لكن في الاخر بيوصل رسالة محتاج تقرأ كتب و مراجع علشان تستنتجها... و الفيلم ده بالذات بيقدم رسالة لكل الأعمار و كل الأجناس, بيقدم رساله للبشر كلهم.... هقلككم حكايته:

مايكل نيومان مهندس تصميمات معمارية عنده اسرة مكونة من ولد و بنت و مراته, عنده مشكلتين, المشكله الأولي انه مش عارف يفضي وقت لعائلته, علي طول مشغول بحكم وظيفته, و المشكلة الثانيه أنه عنده في البيت اكتر من 5 ريموت كنترول و كل واحد له وظيفه و هو مش عارف يحفظ كل ريموت بيعمل ايه, و ده بيلغبط الدنيا معاه.
أتفق معاه رئيسه في الشغل انه لو أنجز وظيفه معينه هيكون شريك له في الشركة و ده طبعا معناه مكسب أكتر, قرر نيومان انه يعمل المطلوب منه ( تصميم مبني صيني ) و انشغل في البحث و التصميم, و ده أثر علي حياته العائلية و الزوجية.. و في يوم حصلت مشادة بينه و بين زوجته و جن جنونة و خرج برة البيت, المهم وصل بالعربية لحد متجر للادوات المنزليه و قرر انه يشتري ريموت يؤدي كل الوظايف علشان يستغني عن كل الريموتات اللي عنده, و اثناء تجواله في المتجر وجد سرير ابيض في ركن الاثاث فقرر انه يستريح شوية, و لسه بيحط دماغه لاقي يفطه مكتوب عليها ( العالم الاخر ), شده الاسم و راح يشوف ايه اللي هناك, لاقي راجل مخترع و واضح انه اللي بيحدث التكنولوجيا في المتجر, سأله علي ريموت يعمل كل حاجة و يتحكم في كل حاجة, راح الراجل طلعله ريموت أزرق و اداهوله مجانا علي اساس انه لسه تحت التجربة......

رجع نيومان لبيته و قرر انه يرجع يكمل الشغل المطلوب منه, و لسة بيقول يا هاادي لاقي الكلب بتاعه عامل ازعاج و مش راضي يسكت أو يسيبه في حاله, حاول نيومان يسكت الكلب الا انه فشل فمسك الريموت و ضغط علي زرار اخفاض الصوت علي سبيل الهزار الا انه لاقي صوت الكلب فعلا بيقل, و أكتشف نيومان ان الريموت ده بيتحكم في كل حاجة, و يقدر يوقف الزمن و يرجع و يسرع الوقت...

ديه المقدمه.. اللي هيحصل باختصار...
نيومان فرح بالريموت المعجزة و بدأ يستعمله في حياته, يجري الأوقات المزعجة و يوقف الزمن و يتنقل في المكان.. و فضل نيومان يستعمل الريموت و هو فرحان بييه جدا.. الا انه حصل أن الريموت اتبرمج لوحده علي انه يسرع الأوقات اللي نيومان سرعها, و نيومان معرفش يتحكم فيه, و بقي نيومان تحت رحمه الجهاز, و فعلا بدأ الجهاز يسرع السنيين وراء السنيين و عمر نيومان يضيع, و كل اما الريموت ينتقل بيه من زمن لاخر يلاقي حياته اتغيرت و اولاده كبروا.... الريموت وصل نيومان لسن الأربعين, لاقي زوجته انفصلت عنه لأنه بيهتم بالعمل اكتر من البيت, و لاقي أولاده في ضياع, و هو نفسه جسمه اتدمر و عرفت الأمراض طريقها ليه....
فضل الريموت يتحكم في عمر نيومان, الي ان وصل بيه الي زمن العجز حيث ان نيومان اصيب بانفجار شريان في القلب, و اصبح عاجز يرقد علي سرير الموت... أصعب مشهد في الفيلم, لما زاره أولاده يطمنوا عليه في المستشفي و افاق من المخدر لاقاهم ماشيين و قام من علي السرير يركض خلفهم الي ان وقع في وسط الشارع و رجع له اولادة و زوجته السابقة و زوجها الجديد ليطمئنوا عليه, و لفظ انفاسه الاخيرة, و اخذ ينصح ولده بأن يهتم بالأسرة أولا, و الا يعطي للعمل اهميه علي الأسرة.. و أنتهت حياته. و انتهي الفيلم.. هذا ما ظننته..
و لكن المشهد عاد الي السرير الأبيض في المحل, و اذا به كان يحلم.. و كل ده كان حلم..
رجع نيومان بيتع وقرر انه يصحح اخطائه و يعطي أهميه لأسرته..

بعيدا عن الفيلم
ماذا لو كان لدينا القدرة علي ان ننظر لمستقبلنا؟؟؟
هل سنتعلم من أخطائنا؟؟
-------- هذا ليس السؤال الصحيح --------
السؤال هو:
احنا مستنيين ايه؟؟؟
مستنيين يجري بينا العمر و نقول يا ريت؟؟؟
مستنيين نندم علي ما فاتنا؟؟
و لا نحترم نفسنا و نبقي رجالة و نشجع القيم اللي عارفينها و موجودة في غريزتنا؟؟؟

أنا قررت أعمل حاجة
انا هشغل الريموت, و أبص علي نفسي بعد 10 سنين هبقي عامل ازاي, و احاول اتعلم..
و كمان عشر سنين هبص علي العشرة اللي بعدها..
و هكذا.......
يلا انت كمان
بص لنفسك بعد 10 سنين
و حاول تتعلم
علشان متبقاش مصيبتك مصيبه لما تعرف أنك مكنتش بتحلم زي نيومان
أنت في حقيقة

ايه الحكاية يا منير؟؟؟

2008-03-27T20:03:00.000+02:00

ايه الحكاية يا منير؟؟؟
انت كل شوية تغيب تغيب و تطلع تهز البيوت بزلزال قوته 1000 ريختر
لحد دلوقتي مسمعتش غير 30 ثانيه من ست أغاني بس في الشريط, عمال اعيد و ازيد فيهم و مستني الشريط علي جمر الصبر, و عمال اخمن يا تري هتقولنا ايه في الشريط ده, قبل كده كلمتنا عن بحر الحياة و البنات و برج الحمام و شجر الليمون و الشمندورة و المريلة الكحلي و الجيرة و العشرة و ... و.. و... قلتلنا علي كل حاجة, و كلمتنا في كل حاجة.. يا تري ايه تاني عندك؟؟؟

الشريط باختصار... طعمه مصري

طعم البيوت:
طعم الحاجات ------ بيعيش ساعات ------ و يدوب قوام ------ و قوام يفوت
جوا القلوب ------ و الذكرايات ------ ميعشي غير ------ طعم البيوت
جدران بتحضن جوا منها قلوب كتير
و أبواب بتقفل عالجنايني و عالوزير
شباك موارب من وراه واقفه الصبايا
قضوا النهار في الوقفه قدام المرايا
أسرار كتير عدد البيوت في الشارع الطيب يا ناس مايبانشي منها غير اللي يطلع منه صوت

ده اللي في الـ30 ثانيه اللي عندي... مش لاقي كلام اتكلم فيه.. الكلام ليه مليون معني.. و بيوصل مليون رسالة ..

علي العموم أنا هتكلم تاني لما الشريط ينزل
ده حدث بستناه كل سنتين

حوار مع صديقي المخلص

2008-03-27T16:10:00.000+02:00

أنا: عاوز أعرف اجابه علي سؤال واحد: أنا عاوز أوصل لايه؟؟؟
هو: الاجابه سهله جدا.
انا: ايه هي ؟؟
هو: انك ترضي أهلك و تثبت نفسك للعالم كله و تعمل عيلة و تجيب ذرية صالحة.
هو: و تبعد عن الذنوب و تصلي و تبقي عبد صالح و بار بوالديك.
هو: و ديه كل حاجة الواحد يعملها في حياته... بس المهم يعملها.
أنا: بس ضروري الواحد يحلم... و يهتم بتفاصيل حلمه.. يعني مينفعض أقول أنا عاوز أثبت نفسي من غير ما أحدد ازاي علشان أعرف أنفذ.
هو: أكيد طبعا .. كل واحد بيلاقي نفسه في مجال معين
هو: بيبرع فيه .. هوا دا اللي يمشي فيه و يثبت نفسه فيه
هو: ممكن تكون عارفه دلوقتي .. ممكت تكتشفه قدام بعدين
هو: أو ممكن تفضل طول حياتك تدور عليه و متلقهوش
أنا: انا خايف من كدة
هو: يبقي أول حاجة تعملها تعرف نفسك كويس و تعرف انت حتمشي في ايه
هو: السكك قدامك ممكن تكون مفتوحة بس سكة واحد حتوصلك للي انت عايزه
أنا: السكك قصادي و انا واقف مش بتحرك, و اقف علشان بختار.. و مش عارف أختار
هو: يبقي مدام انت مش عارف .. تسأل اللي اكبر منك
هو: يمكن يكون واقف فوق شوية و شايف السكة الصح
أنا: مش لاقي حد فاهمني
هو: لو انت محدش فاهمك .. يبقي انت مسألتش الناس الصح
هو: او ما حاولتش تسأل الناس الصح
أنا: فين الناس الصح... لو لاقيتهم همسك فيهم بايدي وسناني
هو: في كل حته .. بس دور انت
أنا: انت اكبر مني و شايف اكتر مني...و يمكن فاهمني...ايه رأيك؟؟
هو: رأيي في ايه بال تحديد؟
أنا: الأول رأيك فيا
هو: كشخص اجتماعي .. بجد يا ابني اللي زيك بقوا قليلين أوي
هو: يعني الواحد يعرف عينتك دي و يمسك فيها بإيديه و سنانه
هو: كعمليــا .. مليش دعوة بالدراسة لأنها مش مقياس للطبيخ حتي
هو: بس انت شخص مخلص في اي حاجة بتشغل فيها .. مكافح
هو: بس المشكلة حاجة صغيرة
هو: انك بدأت تشيل هموم كتير و تكربسها علي بعض و دا اللي موقف تفكيرك
هو: و اللي مخلي الصورة عندك ملخبطة أو منغمشة حبتين
أنا: و حياة امي انت صح
أنا: و عارف اللي خلاني كدة مين
هو: مين يا محمد ؟
أنا: الناس اللي ساعدتني اني ابقي حد كويس
أنا: هما اللي خلوا الدنيا علي دماغي
أنا: أهلي و أصحابي و معارفي
هو: بس المفروض الواحد بيفصل .. يعني كل مرحلة عمرية ليها هموم
هو: انت استعجلت و شلت هموم المفروض مكنتش تشيلها دلوقتي
هو: المهم انت عارف ايه مشكلتك...
هو: أهم حاجة الحل
أنا: الحل فييين , اييه و ازاي
أنا: انا دماغي جابت سولار
هو: مش محتاجة سولار خالص.. بص يا سيدي
هو: ببساطة الحل بيتلخص في كلمتين (عيش سنك) بشرط
هو: ولا تشيل هموم الدنيا كلها .. ولا تبقي سلبي أوي
هو: يعني ابدأ في تهيئة نفسك علي الهموم .. مش تشيلها من غير تدريب
هو: انت كشاب و في الزمن دا .. همومك حتبقي قليلة
هو: دي قاعدة من غير استثناء
هو: انت تدرب نفسك انك تشيل الهموم و تقابل كل حاجة و انت واقف و فارد صدرك
هو: انت كدا في مرحلة الوسط .. ولا انت في مرحلة العيل المستهتر و لا في مرحلة الرجل الناضج
هو: انت في مرحلة (الشباب)
هو: يعني حتطلع لسة علي الحياة العملية و بدأت تشيل الهموم من دلوقتي
هو: في حين المفروض في المرحلة دي انك تدرب نفسك انك تشيلها
هو: مش تشيلها من دلوقتي
هو: عشان المرحلة التانية .. حتبقي طوييييييييييييييييلة أوي
أنا: كلامك جميل جدا...بس صعب, او مستحيل التنفيذ
أنا: عارف ليه؟!
أنا: علشان من وانا عيل ب13 سنة الناس كلها كانت بتشاور عليا
أنا: و طبعا أهلي فرحوا بدة
أنا: وخلاهم زي الناس
أنا: فابقيت علي طول حاسس ان في صباع مشاور عليا
أنا: حتي و انا لوحدي
أنا: و ده خلي عندي احساس بحاجتين
أنا: اني مميز: و ده خلاني اعتقد في ده و امشي ورا الوهم ده
أنا: اني مسئول: مسئول عن اسمي, عن شكلي, عن ضحكتي...عن بصتي
أنا: حاسس اني متراقب
هو: كل دا في حته واحدة عايزة تتشال و تتغسل و ترجع تاني
هو: بص يا سيدي .. اللي حصل حصل .. صباع متشاور عليك .. رجلين متشاورة عليك
هو: الموضوع انك فهمت كدا .. و خلاص آمنت بالحالة اللي عندك و مشيت فيها
هو: و مش عايز تطلع منها فرحان بيها بس في نفس الوقت كارهها
هو: و العملية دي يا اما حتقدمك قدام .. يا اما حترجعك لورا
هو: أهم حاجة في ايامك دلوقتي
هو: اعرف و اتاكد انك مميز .. كل واحد فينا مميز
هو: بس الموضوع اللي عندك دا .. مبقاش شهرة و مسؤولية و لا حاجة
هو: بقت زي ما ممكن نقول (زي عقده) بإيديك لوحدك تحلها
هو: آمن بنفسك .. آمن بأخلاقك .. آمن برتبيتك .. آمن بربنـــا
هو: ابدأ فتح عينك .. ابدأ شغل دماغك في الاتجاه الصح
هو: كل دا من جواك .. انت حاسس ان فيه حاجة متلخبطة أو مش صح جواك
هو: و لو جابولك مليون واحد عشان يكلمك مش حيعملوا حاجة
هو: انت دلوقتي اللي في ايدك كل حاجة
هو: و بإيدك انك تتحكم بالموضوع دا في مصلحتك أو انك تدمر نفسك بيه
هو: بص يا محمد .. كله بيعيش الدور لأننا في مسرحية كبيرة جدا محدش بيظهر الا اللي بيعرف يظبط اداؤه
هو: كل واحد فينا حابب دوره و مقتنع و متأكد إن دوره هوا اهم دور .. دور البطولة
هو: في حين اننا كلنــا أدوار البطولة مفيش أدوار ثانوية
هو: كلنــا مميزين .. بشكل أو بأخر
هو: بس المميز صح هو اللي يعرف ايه موهبته و يستغلها صح
هو: أو يستغلها لأقرب سكة للصح
هو: ممكن تغلط .. (محدش فينا ملاك) .. ممكن تفشل .. (محدش بينجح من أول مرة)
هو: بس استحالة نرجع الزمن ان شاء الله لحظات لورا
هو: كل لحظة بتعدي عليك بتتحاسب عليها و بضيع من عمرك
هو: يبقي احسنلك انك تستفيد بأقصي طاقاتك من لحظات حياتك
هو: و متضيعهاش تقول ليه ؟! و ليه ؟
هو: قول (ايه؟ فيه ايه؟)
هو: مضيعش لحظات في القلق و التردد .. فكر بس مش كتير بسرعة و خد طواتك
هو: و ربنا مبيسبش حد .. و لكل مجتهد نصيب
أنا: معاك حق
أنا: ريحتني كتيير بكلامك, و انا عمال الف حوالين نفسي
أنا: انت عارف؟؟؟
أنا: لو كل واحد سمع نفسه شوية هيعرف هو محتاج ايه
أنا: بس المشكلة اننا براويين...زي القرع يمد لبرة
أنا: الكلام اللي انت قلته مش غريب عليا لأنه اساسا جوايا
أنا: بس كل الحكاية يا سيدي, اني فضلت ماشي و الناس حواليا لحد ما بصيت لاقيت نفسي لوحدي
أنا: اتخضيت
أنا: حبيت ارجع تاني لورا معرفتش
أنا: جاي امشي لقدام مش عارف رايح فين
أنا: وقفت .........و الوقوف لعنة
هو: انا قولتلك .. و علي فكرة انا مريت بالفترة اللي انت فيها دي
هو: برضه جه واحد و قالي كلمتين تقريبا شبه دول و فهمني العملية
هو: و الحمد لله مشيت
أنا: دلوقتي انت عارف انت عايز ايه ؟
هو: الحمد لله .. مع ان السكك لسه كتيرة
هو: بس رميت علي سكة و بدأت امشي فيها
هو: و اللي فيه الخير يقدمه ربنا
أنا: عندي مشكلة كمان
أنا: اني وحيد نفسي
هو: لأ انت سيد نفسك
هو: الوحدة دي انت اللي رميت نفسك فيها
هو: حسيت انك كبرت خلاص و عايز تستقل
هو: فبتعمل زي شرنقة لأفكارك و معتقداتك لغاية لما محدش عرف يفهمك
هو: اطلع من الشرنقة و سيب الناس تتعرف علي افكارك .. متكبتهاش
هو: و حتلاقي ان الوحدة دي .. حاجة كانت وهم
-----------------------------------
هو: سعيد
أنا: نعمين
هو: ابدأ يا سعيد
هو: ابدأ انت بس و حاول
هو: و ملكش دعوة بالباقي
هو: و نبقي نكمل كلامنا بعدين
هو: قشطة ؟؟؟
أنا: قشطة

سألتيني هي عامله ازاي

2008-03-26T01:00:00.000+02:00

سألتيني هي عامله ازاي؟؟
هقولك دلوقتي, بس أوعديني تغمضي عينيك و تفكري فيها...
علشان اما اكلمك عليها تفتكريها...

هي... قصيرة
أقصر شوية صغيرة مني
يعني أما افتح ذراعاتي
تطول حضني

هي... سمرة
سمارها مصري بدلع
عينيها بتلمع فوق خدودها
زي النجوم في السما

هي... ضعيفة
بتخاف مني عليا
تستخبي مني فيا
تشكيلي مني

هي... شقية
مش بتعرف تقعد في مكان
يوم ما الكسل يمسكني
تطردة بنظرة عين

هي... جريئة
تتكلم بكل صراحة
يعني لما تعوز مني حاجة
تطلب بأمر الدلع

هي... موجودة
ليها أسم و ليها كيان و رأي
مش كل حاجة أيوة صح و حاضر
لما اكلمها مسمعش صدي صوتي

أوعديني تفضلي فاكراها
علشان لما اسألك عليها تبقي عارفاها

ابتسمي

2008-03-25T03:25:00.000+02:00

مرت أربعه ايام, و لازالت الدنيا في حداد, و لكنها اشرفت علي ان تبتسم مرة أخري..
رجعوا بيتهم الحمد لله, و ان شاء الله يعرفوا يرتبوا أمورهم..

أهم شيء بالنسبه لي اني اعمل اللي المفروض انا أعمله, انا حاسس اني المفروض اعمل حاجة كصديق, و دوري مش واقف علي العزاء بس, ربنا يهديني للي فيه الخير.

و كأن الدنيا كلها في حداد

2008-03-23T15:01:00.000+02:00

كــان لــي مـع الــمــوت 4 مـــشـــاهـــد:

1- جدي توفي في المستشفي و كان عمري 14 سنة, و حضرت الصلاة و الدفنه و التلقين و العذاء, و كنت في العذاء بلعب مع قرايبنا برة الجامع, ولا كأن في حاجة.... عاااادي جدا

2- توفت جدتي و أنا كنت في معسكر خارج القاهرة و كان عمري 15 سنة, رجعت مالمعسكر لاقيتها فارقت الحياة, أكلت و نمت و صحيت قعدت مع اصحابي عاادي برضه, مع اني كنت بحبها جدا.

3- عمي طلع في الروح قصاد عيني, رحناله البيت كان تعبان و قبل ما نتصرف, كان أمر الله, و حضرت صعود الروح, و صليت عليه و دفنته, و حضرت التلقين, و العذاء بالليل, و تاني يوم كان عندي درس, و قتها كنت 16 سنة, رحت الدرس و هزرت مع اصحابي و عادي جدا, مع انه كان عمي المفضل و كان كريم معايا اخر حاجة..

4- توفت والده زمايلي ( ولد و بنت ), صليت عليها, و دفنت و حضرت التلقين, و فاتني العذاء لظرف خارج ارادتي...
لكن في الحقيقة, لم استطع أن ألعب او اهزر أو احضر درس, أو حتي انزل اقعد مع اصحابي, حاولت كذا مرة أخرج من الحاله اللي انا فيها ديه, لكن معرفتش, شغلت نفسي علي الكمبيوتر و حاولت أضيع وقتي, و لكني معرفتش, و كأن الدنيا كلها في حداد, كل حاجة واقفه, كان كل يوم بيوصلي اكثر من 20 ايميل من ناس اعرفهم, يا اما بنضحك و نهزر أو عن شغل او حاجة.. دلوقتي كله وااااقف..

مش عارف ايه اللي حصل, أو ايه السبب, ليه المرة ديه الدنيا وقفت في وشي, و الحزن سكن قلبي..
هل علشان المرات اللي فاتت كنت صغير شوية و معرفتش اشوف وجه الموت ؟؟
ولا علشان شايف الحزن في عين اتنين غاليين عليا قوي؟؟

البقاء لله

2008-03-22T19:27:00.000+02:00

عندما تدق ساعة الرحيل, لا يبقي امامنا الا الوداع, و يا ليته أمرا هينا, الا انه يصعب الرحيل و يجعل منه شبحا نخشي مواجهته بل و نرتعد من ذكره..هادم اللذات هو ميناء السفر الاخير لجميع البشر, فكلنا اينما ذهبنا ومهما فعلنا فأن وجهتنا الاخيره ستكون اليه..
له رهبه, و له جلال, و له قدسية, ترتعش قلوبنا عندما نمر بمن هم في القبور, يخيل لنا أننا نسمع ندائهم, نسمع صراخهم, نسمع رجائهم, و لكن الحقيقه أننا لا نسمع الا صمتهم, و ان كنا نسمع شيئا فهو بكائنا عليهم, و علي حالنا من دونهم..

بالأمس دفنت والدة زميلي من أيام الطفولة, علي الأرجح هم أخوتي.. سمعت الخبر في التليفون, و توجهت فورا لأداء الصلاة علي روحها, و الي ان أنتهت الصلاة لم يكن في قلبي شيء سوي الدعاء لهذه الأم التي فقدها أولادها في يوم عيدها, و لكن بعدما أنتهيت من اداء الصلاة و رأيت النعش و شرعت لحمله علي كتفي شعرت بأنها أمي أنا, و شعرت أني من فقدتها, و شعرت أني أحملها الي دار الاخره كما حملتني الي دار الدنيا.. و حتي هذا الوقت كان كل شيء كما هو بداخلي, الا أن كياني قد أنقلب علي أعقابه عندما رأيت أولادها غارقون في البكاء, هؤلاء هم أخوتي, و هم في حزن عميق..

أدعوا الله أن يغفر لهذه الأم العظيمة ذنوبها, و أن يسكنها فسيح جناته..
و أدعوا الله أن يصبر أخوتي و يعينهم.

عايش عشان .. أتعلم ببساطة .. ببساطة عشان أتعلم

2008-03-19T01:32:00.000+02:00

السلام عليكم
أجمل شيء في اكون و من أهم النعم اللي ربنا ينعم بها علي من يشاء, حي نعمه الرغبة في الحياة, أجدكم مستغربين ( ما كلنا يا عم نفسنا نعيش ).. أكيد, بس تعرف أنك ممكن تبقي عايش بعد ما يندفن جسدك بسنين؟؟ قوللي ازاي..
هقولك أنا, عم الكساندر جراهام بل لما أخترع التليفون عمره كان يتخيل ان فكرته هتعيش كل السنين ديه ؟؟
و عم جـــــون ووكر اللي أخترع الكبريت, عمره كان يتخيل أنه هيفضل عايش و أختراعه هيموت كل الناس ديه؟؟

اذا, فمن الممكن أن نحيا و جسدنا في التراب, وده بأننا نعمل شيء يكون عمره من عمر التاريخ, و ده مش سهل ابدا, ده عايز دماغ مفتحة و عايز تامل و تحليل و ابداع, و حاجات بالعبيط....

المهم, ان انت يبقي عندك رغبة في الحياة, معناها أنك تبقي عايز تسيبها و أنت عامل حاجة, مش زي ما جيت زي ما رحت, علشان يوم ما تقف قصاد الخالق تقوله يا رب أنا قدمت كذا للناس و انتفعوا بيه, جازني يا أكرم الأكرمين.

طيب علشان الواحد يعمل كده لازم طبعا يكون علي قدر من العلم, لأنك عمرك ما هتكون بشيء و تقدم فيه منفعه.. و علشان كدة لازم يكون عندك الحب في التعلم, مهما كان العلم نوعه فأنت ترغب فيه و بشدة..و مهما كانت الظروف فلن تعطلك عن سعيك.
تعلم و تعلم و تعلم, اينما هو موجود ( العلم ), أسعي خلفه و جاهد لتأخذه بقوة.

و لو عايز تحبب نفسك في العلم, تخيل نفسك و أنت عارف فيه..
يعني مثلا لو أنت بتذاكر ميكانيكا تخيل أنك عقلية فذه في الميكانيكا و أن الناس كلها في الشارع بيتكلموا عليك و علي افكارك و علي التقديرات اللي ممكن تاخدها, و أقعد أحلم لحد ما توصل لسابع سما و توصل بأحلامك أنك مش لاقي كلام تاني في الحلم ده, و أرجع تاني لأرض الواقع هتلاقي نفسك علي الأرض و قدامك السلم, متترددش و اطلع عليه علي طول علشان تتطول حلمك, هتلاقي نفسك بتجري علشان توصل للجنة اللي رسمتها لنفسك..
و نصيحة من مجرب:: أوعي تتعلم حاجة أنت مش حاببها, و لو بالعافية, أعرف اللي يمشي حالك, انما متتعلم حاجة أنت مش حاببها, هتكره الدنيا باللي فيها..

فاضل حاجة واحدة بس, لو في يوم وصلت بحلمك لسابع سما و وقفت ما لاقيتش السلم, لف و دور عليه في كل مكان, أقرا في كل المجالات و أتعلم منها علي قد ما تقدر, لحد ما فيوم هتلاقي السلم, و هتطلعه و هتحقق أحلامك..

أتعلم ....... أتعلم ........ أتعلم

مفترق الطرق

2008-03-13T16:02:00.000+02:00

السلام عليكم
يبدوا لي أني وصلت الي ما يطلق عليه مفترق الطرق, حيث أنتهت أوقات الحيرة و التشتت بالنسبة لي, و حان الوقت لكي أختار أحد الطرق لأسعي فيه, و حان الوقت لكي اجازف و أخاطر بالاختيار, و حان الوقت لأستعد لتحمل نفقة الاختيار.

يخرب بيت البلد دية

2008-02-27T17:59:00.000+02:00

السلام عليكم
انا هدخل في الموضوع علي طول علشان الكلمتين واقفين بقالهم كثير..
أنا مش لاقي لازمة خالص للكلية..

يعني لا علم ولا دكاترة ولا مناهج ولا طلبة
ولا حتي صحبه
ولا أي حاجة
صحراء جرداء مملة و خنيقة

كفاية المشوار الممل من الهرم لحلوان, المشوار القميء, المشوار اللي عبارة عن شرذمة من الرتفعات و المنخفضات.
نفسي اروح الكلية بس كل مرة اخد القرار اسأل نفسي أروح لييييه, مافييش اجابة خالص.
طيب اروح لييه.؟؟

لو علي المذاكرة هما الملزمتين اللي في الاخر بيقضوا الغرض و بيجيبوا امتياز, علشان الامتحان بيجي بالنص من الملزمة علشان الكوسة اللي مزروعة في انحاء الجمهورية..
معلش بقي انا اتعصبت عليكوا بس من غلبي..

المجال بتاعي رائع بس الدراسة مقرفة
تصدقوا اني بذاكر مع نفسي في البيت بعيد عن مناهج الكلية
بس بذاكر نفس المجال
و مستعد اقف قصاد أحمر طالب بيجيب امتياز و اوريله انه مش عارف اي حاجة في أي حاجة..
ولا الدكاترة يا عيني عليهم
فعلا هما دول اللي ماسكين اقتصاد البلد
علشان كده حالنا طييييينة

يخرب بيت البلد ديه
مش قصدي مصر الجميلة طبعا
انا قصدي ما هي عليه
و أقسم الا تبقي هكذا
انتظروني ... او اسبقوني

أرحموا عزيز قوم ذل

2008-02-22T19:57:00.000+02:00

السلام عليكم

امبارح حصل شيء لم يكن علي البال ولا عالخاطر, امبارح عرفت كم انا ضعيف و مكتوف اليدين امام غلبة الرجال, امبارح عرفت قد ايه كل من أحبهم في خطر و لست بقادر علي حمايتهم, امبارح عرفت كم هو صعب أن أري الظلم بعيني و لا يسعني الا البكاء..

امبارح حوالي الساعة الرابعة صباحا سمعت صوت صياح في الشارع و فورا عرفت انها خناقة, فرحت كعادتي ابص من الشباك علشان أعرف اذا كان حد ليا في الخناقة, و للأسف كان ما كنت اخشاة, أبو عمار صاحب القهوة اللي بقعد عليها بيتخانق مع امين صاحب القهوة التانية علي ايه انا مش عارف لحد دلوقتي و اوعدكم اني لما أعرف حبلغكم...
المهم, اشتعلت الخناقة و لم ابو عمار صبيانه و دخلوا القهوة و قفلوا عليهم, و عم امين و صبيانه قاعد يخبط و يرزع في الباب عايز يكسره, و فجأة خرج أبو عمار و صبيانه بيحدفوا ازاز البيبسي علي امين و صبيانه, كانت اشبه بمعركة منظمه لم اري فيها الا هذا الجزء الصغير, و لكن يبدوا انها كانت اكثر اشتعالا.. المهم جت الحكومة, و فضت بين الفريقين و اخدت ابوا عمار و امين...

ما فات ليس هو ما اقصد الحكي عنه, اللي فات كله شيء عادي و طبيعي انه يحصل لما يكون في ناس بتتخانق, ان الحكومة تيجي تلم الناس و تنظف الشارع... م ا هزني و اطار النوم من عيني هي مشهد قبض الحكومة علي ابو عمار..
أبو عمار راجل عمره يتعدي ال 50 و من أول ما الحكومة دخلت الشارع و هو واقف يبص من بعيد لحد ما البوكس جه جنبه و نزل الظابط و ابو عمار بيبص عليه و يقوله لازم تسمعني يا باشا.. كل ده و انا بتفرج علي المشهد من الشباك و كلي خوف علي ابو عمار ( العادي يعني ), لكن اللي حصل هو ان الرظابط نزل ضربي ف ابو عمار و صبيانه, أبو عمار معروف في المنطقة بزعامته و جدعنته و عزته بينضرب من عيال في سن ابنه. المشهد هزني كثيرا و انا انظر لرجل كان يمثل شيئا كبيرا بالنسبه لي و هو يهان اهانه الكلاب..

أرحموا عزيز قوم ذل....
ده أقل قول انا ممكن اقوله... ربنا يكون في عوننا

اسعي و انا أسعي معاك

2008-02-17T13:21:00.000+02:00

السلام عليكم

كان في شكوي كده سمعتها من واحد صاحبي..
بيقول اني دايما بتكلم علي الحاجات الكويسة اللي فيا, و علي المواقف اللي كنت فيها جدع و طيب و محترم و.. و...و بطلع دايما الواد المش عارف ايه اللي مفيش زيية اتنين...
معاك حق يا صاحبي, انا عارف اني دايما برسم صورة ليا عند الناس, غالبا ما بتبقي متعارضة مع الحقيقة, مش معني كده ان انا بضحك علي الناس, انما هما اللي بيحطوا في دماغهم دايما ان انا كويس 100% و مش بيحاولوا يدوروا علي الجانب الوحش فيا.. و ليه يدوروا, هما شافوا مني حاجة وحشة؟؟

ما علينا, من ضمن الحاجات اللي فيا و بتنرفزني, هي ان انا بستسلم بسرعة و مش بقاوح علي حاجة, يمكن علشان مش بحب أحس ان أنا مهزوم و مش بحب اشوف نظرة أسف في عين حد عليا..و ده سبب اني بسيب حاجات تروح مني كتييير و حاجات تانية مش بسعي لها من أصله..

بس ده لازم لازم لازم يتغير, لازم أصر علي كل تحدي اخوضة, لازم أصر علي النجاح و الفوز, لأني لو خفت أني ابقي مهزوم في نظر الناس هبقي مهزوم فعلا, انما لو عملت اللي عليا و اتهزمت هكون في نظر نفسي منتصر..
أن شاء الله ده هيتغير..

عاوز توصل لايه ؟ ؟ ؟

2008-02-11T14:22:00.000+02:00

نكمل بقي كلامنا
أنا لست بمغرور أو متكابر, و مش واخد قلم في نفسي ولا حاجة, أنا كل الحكاية أني متأكد ان عندي طريقة تفكير مختلفة عن كثير ممن حولي, طموحي يتعدي طموحهم و افكاري تهشم افكارهم اذا ما تقابلوا, و لذلك عندي الثقة انني مميز عنهم, مميز بطموحي و خيالي الجامح لا أغلق بابا للتفكير ابدا, فكل الابواب مفتوحة امامي و لي كامل الصلاحيات للدخول فيها و اللعب في جميع المناطق..مش محدد نفسي في منطقة معينة زي ما اغلب الناس اللي حواليا شايفهم محددين نفسهم و مش عاوزين يخرجوا عن النمط..
ميهمنيش اللي انا فيه ده صح ولا غلط ( أقصد الاختلاف ), كل اللي يهمني ان ده أنا و مستحيل اتغير لأن ديه عقيدة بالنسبه لي, مهما الظروف حاولت تغير اتجاهي في الحياة و طريقتي في اللعب, عمري ما هاكون غير كده, ده امر مسلم به ولا رجعه فيه..ان شاء الله

كثيرا تمنيت ان اخرج من نفسي ليوم واحد لأري نفسي من عيون شخص اخر, علشان اعرف عيوبي و مميزاتي, و طالما ده مستحيل يحصل فقررت اني اكون ما انا عليه, و من يرفضني فلينصحني و يوجهني و من يتقبلني فليحمسني و يزيدني..و هذا ما كان و ما سيبقي علي الدوام..ان شاء الله

أنا مش هحدد انا عاوز أكون ايه, انا همشي زي ما أنا ماشي, و لو ان خطواتي بطيئة الا اني علي يقين اني وقت ملاقي الطريق واضح قصادي هتكون خطوتي تساوي عشرين خطوة من خطوات من حولي..ان شاء الله
لست بعظيم ولا اله كما قلت مسبقا, و لكني مختلف ( يمكن متخلف ؟؟!! ), و طالما انا مختلف فاكيد مصيري مختلف, يا اما نحو الاحسن او الاسوأ, و لكني واثق اني لن اكون نسخة ممن حولي, سأكون أحسن منهم مليون مرة, أو أسوأ منهم مليون مرة.. مخاطرة غير محسوبة, و ليكن الله في عوني..

يا من أدرتم الوجه عني, أعلموا أني من سيرد وجوهكم الي, أعلموا أنكم فعلتم ما لن تحبوا ان تفعلوه, اني ماضي و انكم لراجعون, اني ماضي و انكم لراجعون, ان مددتم يد العون تجدون يدي أسرع, و ان مددتم يد الغدر تجدون ربي أقدر, و ان عانقتم ذهب الأرض فأني معانق نجوم السماء.. علي فعلتكم انتم نادمون؟؟ قد كان ما كان, و ليكن ما سيكون.... أن شاء الله

عاوز توصل لايه ؟ ؟ ؟

2008-02-10T02:50:00.001+02:00

عاوز توصل لايه ؟ ؟ ؟

سؤال و ما زال ماجاش عليه الرد, بسأله لنفسي كل يوم و كل ساعة بقعد فيها مع نفسي, أنا عاوز أوصل لايه؟؟:
ساعات القي طموحي واقف عند بيت و زوجة و أولاد؟
و ساعات القي طموحي عدي السبع سموات؟
و ساعات القي ماليش طموح اصلا و مش عاوز حاجة؟

انما في الحقيقة, أنا عارف انا عاوز ايه, بس بشكل مجمل غير محدد المعالم, أنا عايز اسيبها و أنا عامل حاجة, مش عاوز اجي و أخرج زي ما أنا ( أنا بتكلم طبعا علي الدنيا ), عاوز اسيب بصمتي في الدنيا, انما تحديدا ايه, ده اللي انا بدور عليه, و ده اللي انا عاوز اعرفه...
أيه اللي ممكن أعمله علشان اسيب بصمتي في الدنيا, ليس لدي عقل العلماء لأكون منهم و أترك علوم ينتفع بها, و ليس لدي عقل الحكماء لأنتسب اليهم و اترك تراثا من الاقاويل و التوجيهات, و بالتأكيد لست لاعب كرة ماهر أسعي لاحتفاظ مصر بكأس العالم مدي الحياة...
اذا من انا وكيف و ماذا؟؟؟
قرأت سير ذاتيه كثيرة يتكلم فيها اصحابها عن انفسهم, ولكني لم اجد اي اجواب لتساؤلاتي, وجدت اكثرهم عامل فيها اله و الباقيين بيثبتوا انهم لم يسعوا لما هم فيه, و مع ذلك صدقتهم, ان صعب جدا انك تسعي انك تكون شيء معين او تضيف شيء معين و محدد, انما انت بتفضل تبحث عما تقدمه و مع مرور الزمن تتضح الاجابه شيئا فشيئا...هذا ما وصلت اليه و ليكن ما سيكون..
و لكن في بعض الاحيان, يستفزني شبابي فانتفض انتفاضة رفض لما انا فيه من حال, مهما كان ما انا عليه فانه يزعجني احيانا فأبحث عن ما هو أقوي و أحسن و أغني و أجمل, و القي نفسي عايز أكون رجل أعمال كبير و معايا ملايين الدنيا علشان اعمل بيها كل اللي انا عاوزة.... و ساعات اقول اني عايز ابقي رئيس الجمهورية ديه و يكون معايا قوة لا مثيل لها أعمل بيها اللي انا عاوزة....و ساعات بتمني اني اكون ابو تريكو ولا عمرو زكي تهز قدمي مدرجات القلوب....و حاجات تانيه كتير انا لو فكرت فيها دلوقتي هموت من الضحك...

نكمل بعدين علشان ورايا مشوار ضروري

يوم بالدنيا

2008-02-09T01:31:00.000+02:00

السلام عليكم

يوم صاخب من ايام عمري المعدودة, يوم وقف فيه قلبي اربع مرات ثم ارتعد فرحا, و ارتعد خوفا مرة ثم اطلق صيحات الحماس..
الساعة العاشرة و النصف مساء الخميس, القهاوي منورة و الناس ملو الشوارع مستنيين ماتش الكوت دي فوار, محدش كان بيأمل ان احنا نكسب, الناس كلها متوقعة الهزيمة او التعادل و ضربات الترجيح.. بس فعلها المعلم و اولادة, كسروا شوكة الكوت ديفوار و بهدلهم, دلوقتي نقول من غير شك احنا غلبنا الكوت ديفوار و قلعناهم هدومهم...
بجد السعادة اللي شفتها في الشوارع متتوصفش, ناس غلاااابة و فرحانين بالمنتخب اللي بقي الحاجة الوحيدة فعلا اللي فالحين فيها, الحاجة الوحيدة اللي الحكومة بتفرح بيها الشعب..
امبارح سمعت واحد بيقول: المفروض الحكومة تدي مكافئات للعيبة مليون دولار مش جنيه
واحد رد عليه: يعني الحكومة تجيب منين
قاله: يلموا من اعضاء المجلس, كل واحد نص مليون دولار
........الناس سعيدة بالمنتخب لدرجة انها مستغنية عن فلوسها اللي لاهفينها ممثلين دوائرهم في المجلس..حاجة غريبة..
ما علينا..المهم ماتش البطولة, لما نكسب ان شاء الله نتأكد ان الحاجة الوحيدة اللي فالحين فيها...هي.....الكوووووسسة...هممم.الكووورة