السيد الرئيس/ محمد حسني مبارك
تحية طيبة وبعد,
بما أن كل الرسميات قد أسقطت كما أسقطت هيبة رجال الشرطة من الشارع فانا هتكلم بالعامية. من كام سنة لما طلعت اشاعة انك توفيت كتبتلك رسالة -ضاعت مني للاسف- وسألتك فيها انت ناويلنا علي ايه, كنت بسألك انك مفكر لشعب مصر في حاجة ولا سايب الامر لله. وللاسف دلوقت مستحيل أعرف الاجابة اللي اتأخرت جدا لدرجة أن الشعب الراضي ثار ومسح أي مخطط كنت مرتبه. يا ريس أنا بحترمك جدا لاسباب كتير مش وقت قوالها, بس ليا عندك عتاب كبير. أنت يا ريس سيبتنا في وسط شلة حرامية أوهموك أنهم متبعين تعليماتك وهما نازلين في البلد سرقة ونهب وخراب. سلمتنا في أيد حبيب العادلي اللي مابيعرفش يفرق بين البني ادميين والبهايم, سيبته يتعامل معانا بكل لا انسانية لحد ما جيه يوم ضرب علينا نار وقنابل وسحلنا بعربياته وسلط علينا بلطجيته. وسلمتنا في ايد صفوت الشريف العقرب اللي لعب بينا وكان هو سيد العرائس المتحركة, خنقنا وفقرنا وجابلنا أمراض الدنيا. وغيرهم كثير ياريس. وغير كل ده سيبت جمال يحس انه في عزبة أبوة, وسيبت عز -صديق سوء- يتقرب من جمال و يتشعبط علي اكتافه. من الاخر يا ريس سيبت شوية فاسدين يفتوا في البلد ويطيحوا فيها فساد, واللي عينته محترم كانت شخصيته ضعيفة ماعرفش ياخد موقف من الفساد. يعني يا ريس سيبتنا من غير سلاح وسط شلة حرامية.
دلوقتي يا ريس كله جيه علي دماغك أنت, بقيت رمز من رموز الخيانة والفساد والديكتاتورية والاستبداد, مقدمتش ولا نية حسنه تجاه الشعب غير الكلام والكلام, ارصدتك في البنك بالملايين, سلمت علي كل اليهود قتالين القتله, مكنش ليك ولا موقف يخلي المصري يمشي رافع راسه, كل الأمور المعلنه ضدك يا ريس, دلوقت مستحيل حد يصدق انك تستاهل الاحترام. مهما اتكلم وأقول محدش راضي يتقبل لانك عمرك ما أعلنت عن شيء. أو بمعني تاني, بطولتك ووطنيتك ماتظهرش الا للي مستعد يدور عليها ويبذل مجهود شديد جدا.
دلوقت باقيت عزيز قوم ذل, وللاسف مش هيرحموك, الله أعلم انت بتدبر ايه لنفسك. بس انا متأكد انك فعلا ماشي بعد كام شهر, بس معرفش هتقعد في مصر فعلا ولا لا. قبل ما تمشي يا ريس وضح لنا نواياك الحسنه, انشل البلد من اللي هي فيه وحاسب الفاسدين وعاقبهم بأقصي العقوبات. حل مجلس أحمد عز الفاسد وغير مواد الدستور اللي تخلينا ننتخب رئيس يمثل ارادتنا, كل فاسد سرق رجعلنا فلوسنا منه ومهد للرئيس اللي يجي من بعدك انه يقدر يصلح في الدولة.
اتمني يا ريس تكون راضي عن نفسك, بتمني فعلا انك تكون مجهز لاخرتك. الله يهدينا ويهديك.
الامضاء
مواطن مصري
