ماسكة أطراف الفساتين

السلام عليكم
تخيلوا بنت صغيرة فتحت عينيها علي ظهور الناس, ومأخدتش من وشوشهم غير نظرات خاطفه بين كل حين و مين, أتوجدت في اختلاف و اختلفوا في وجودها..
عاشت في حيرة و احتارت تعيش فين, في عينيها حاجات كتيرة بس هتحققها مع مين, مع ظهور؟؟ جبلات مبيحسوش, مبيشوفوش عروسة صغيرة تايهة يرشدوها, لا بيتوهوها و يخربوها..

كبرت محتارة و الحيرة نار, مش عارفة اغلب الصح و فاكراة غلط, و مش عارفة أغلب الغلط وفاكراه صح...تاييييهة

بس هي مش هتفضل طول عمرها عايشة قصاد ظهور, لازم تشوف الوشوش, فمكنش قدامها غير انها تمسك اطراف الفساتين, و تمشي ورا كل وش يبصلها, تتعلق بيه زي الغرقانه, و تخاف تسيب الفستان لا الوش يتدور...
و الفساتين لأنواع:
فستان لونه جميل و شكله يسر الناظرين, بس في نفسه مصنوع بالشوك, صعب يتلبس, و صعب يتمسك
و فستان ابيض مافيهوش شوائب, بس ضيق يخنق علي اللي لابسه, و صعب يتمسك
و فستان طويل, سهل تمسكه, بس هفضل طول عمرك رافعه, علشان ميطولش الأرض

يا تري مين اللي هيخلي ليها فستان بتاعها, الناس تبص لجماله و تبص ليها,و الوشوش تلف حواليها..... ؟ ؟

الموضوع لغز, اللي يفهمه هو اللي يقدر يجيبلها الفستان....

ترتيب أوراق

السلام عليكم
أعتقد انه حان الوقت لترتيب أوراقي علي ترابيزة واحده, و النظر ليهم بتفكير عميق عشان أعرف اللي ليا و اللي عليا, و عشان ما أخسرش حاجة, لان سوء تنظيم الوقت خسرني حاجات كتير جدا . . .

أولا: اللي عليا
الدراسة في الكلية: ( سنه أولي تجارة), و لسه ماروحتش الكلية ولا عرفت الجداول ولا حتي أخدت الكارنيه
كورس أوراكل: الاحد و الثلاثاء و الخميس, ثلاث ساعات كل يوم من 8 الي 11 و لسه مافتحتش كتاب فيها
المجله: لازم اظبطها و اوقفها علي رجليها عشان استريح بعدين
تصميم موقع مطلوب مني: بقاله شهر ماخلصش, و لسه ما حطيتش ايدي فيه
أنا بقي: عايز اروح جيم عشان حاسس اني لزقت في الارض و لما بطلع السلم بنهج, مع اني ممكن استخبي ورا عمود نور

ثانيا: اللي ليا
لا كتير قوي, مش عارف اقول ايه ولا ايه, بس عايز اعوض السنتين بتوع الثانوية العامه اللي خسرت فيهم كتيير من وقتي عالفاضي

يا ريت بس أعرف اعمل اللي عليا, عشان حاسس انه كتيرالموضوع محتاج تركيز
ما علينا, دوشتلكوا دماغكوا معلش, اعمل ايه بس
ماهو لو كان عندي اخت بنت !!!!

أول خناقه ليا من 3 سنين

السلام عليكم
بجد والله, خسارة علي الرجالة, خسارة علي النخوة و الرجوله اللي اتبخرت من عالمنا, خسارة علي الاحساس بالناس و ألف ألف خسارة علي الاخلاق و الدين, و الله العظيم ودي ابكي, و بكائي ده حزن علي الدنيا اللي احنا عايشين فيها, تعمل خير و تراعي الناس, و يتعمل فيك سر و ماحدش يراعيك

يا جماعه انا كل اللي بطلبه ان الناس تتعامل معايا زي ما أنا بتعامل معاهم, و الله مش عايز غير كده

النهاردة, اتخنقت أول خناقه من حوالي 3 سنين,و انا من الواضح اني مش ميال ابدا للخناق, مع ان اقشم بالله, بيبقي فيه أوقات لو مسكت مع حد هموته, بس بمسك نفسي, و أقسم بالله العظيم مش خوف, بس ممكن تسميه عقل او هبل, سميه زي ما تسميه
الواد العبيط العيل, مابيعرفش يتعامل مع رجاله شكله, بكلمه اظاهر خاف يرد عليا فبيرد علي حد اصغر مننا احنا الاتنين و بيستقوا عليه, لأ بقي ياخد علي دماغ اهله, بس والله ما رفعت ايدي عليه, هو قعد يهوش بس كده زي البنات, و يقول كلام أهبل

أنت ماتعرفش انا مين

انا مافيش حد يقدر يكلمني
دانا دانا دانا دانا ......... هبل و رغي ستات

رديت قلت كلمتين بس, انا مش هرفع ايدي عليك, و لما تعرف تكلم رجاله ابقي كلمني

و لحسن الحظ ان الناس حاشوا بيننا, لانه لو كان رفع ايده عليا كنت ضربته و ماكنتش عرفت امسك نفسي, بس انا مسكت نفسي عشان حاجتين
أولا لأنه اصغر مني و ماينفعش اصغر نفسي ليه
و ثانيا عشان ما اعملش مشكله لشخص مالوش أي ذنب غير انه بيتكسف و بيستحي

معلش انتوا مش عارفين أي تفاصيل, بس يكفي اقولكم, ان الرجوله بجد بتختفي, و الناس اللي تقابلها, يا اما رجاله قوي هتحبها و عمرك ما هتحاول تخسرها,و يا اما عيال قوي و دول يا اما هتساعدهم أو هتكرهم

اللهم اني اسألك ان تهدني الي الصواب و الحق
و ان تهدني الي ما تحبه و ترضاة
و ان تغفر لي سيئات اعمالي

العقول ما بعد منتصف الليل

الساعة الثالثة بعد منتصف الليل, اغلقت المحلات أبوابها, و سكن الناس بيوتهم, و انتشرت الكلاب و القطط في الشوارع, و أغلقت الأرض عيونها علي يوم مضي, و يبدوا لك أن اليوم انتهي.
لكن في الحقيقة, أن ليلنا هو نهار و سكوننا حركة, و نومنا هو يقظة لهؤلاء الذين يطلقون علي انفسهم , ( عفاريت الليل), و ما أدراك من هم
عفاريت الليل.

عفاريت الليل,شباب ختموا عقولهم بختم الالغاء, و طبعوا علي وجوههم بسمه زائفه, يحسبهم الجاهل سعداء, و لكنهم في الحقيقة هم التعساء, فهؤلاء حرمهم الشيطان من نعمه اعطاها الله لنا, و هي نعمة العقل, فاصبحوا بلا عقل و بلا هدف و بلا ذاكرة و بلا حياة وبلا مستقبل, و خرجوا من عالمنا الذي نعيش فيه و دخلوا عالم الليل.

كان لي تجربة شخصية بينهم, أود أن أحكيها, ليس لأظهر الصورة الحقيقية لهذا العالم, و لكن لاوضح لهؤلاء اصحاب النظارات و الأقلام و الكتب, هؤلاء من لا يعلمون عن عالمنا سوي انه صفحة في كتاب اطلعوا عليه و حفظوة, هؤلاء الذين يظنون أن الحياة حلوة, و ان ( الدنيا لسة بخير ),أريد أن أوضح لهم أنهم لايعلمون و لا يفهمون, و انهم بحاجة اما لخبرة شخصية و تجربة يخوضونها, او أن يستعينوا بمن حولهم ليستمروا في الحياة .. .. ..

للسهرة في شارعنا أصول, كافيتيريا و شيشة و ضحك و طاولة, و لكن بعدما تدق ال ثالثة, يدخل شيء جديد في اصول السهرة, و هو الحشيش الذي يأكل العقول و يجعل من العاقل مجنون, و عندها يبدأ الليل الحقيقي, ليل المصائب
و يزحف جيش ال اللصوص علي شارعنا, فتجد جميع أنواع السوابق تمر من امامك مر الكرام احيانا, و احيانا تفرض نفسها عليك من دون اذن, فتجد نفسك جالس معهم, مستمع لاحاديثهم و بطولاتهم علي حد قولهم.

رأيت ما رأيت من جرائم, سمعت ما سمعت, من قصص, جرائم اغتصاب, و سرقة, و تعاطي, و اتجار, و مشاجرات,و ليس من الغريب ان تجد نفسك تفكر معهم و تتناقش في حلول لمصائبهم, و ايضا من السهل ان تجد انهم وكلوك بمهمات شيطانية و تجد نفسك توافق و انت مستغرب من تصرفك,و لكنك لن تجد وسيلة لتمنع نفسك من الموافقة, فما يطلبه منك يشبه الامر . . .

و الغريب ايضا انك تفكر اكثر من مرة في الاقلاع عما تفعلة من جلسات مع الشياطين, و لكنه يتحول معك الي ادمان, ادمان سماع هذه القصص الغريبة و العجيبة التي لا تراها حتي في الافلام, و لكن ما تسمعه و تراه يجلب لك قلقا كبيرا يعيش معاك ليل نهار, و هو قلق علي كل من تحبهم, و كل من تهتم لامرهم, فتجد نفسك مريض, تشعر طوال الوقت ان هذا او هذه سيحدث معهما كما سمعت. . .
و لكن في الوقت نفسه, تكون قد تعلمت امرا مهما, هو ان في كل منا خير و شر, فهذا المجرم, اجد عنده شهامة عظيمة و انتماء كيف لا نستغلها في خدمة الخير,و كيف لا نراها من بين كل ما عنده من شر.

كنت أود أن أحكي بعض القصص عن هذة الحياة الغريبة, و لكن سأجعلها في المرة القادمه ان شاء الله .

واحد من الناس

في موقع جريدة المصري اليوم, قرأت هذا النبأ: العثور علي أيمن إسماعيل «المسجون» في قضية أيمن نور مشنوقاً داخل زنزانته
عثرت إدارة سجن استئناف القاهرة صباح أمس، علي جثة أيمن إسماعيل، المتهم في قضية تزوير توكيلات حزب الغد، معلقة علي باب زنزانته. قالت مصادر ـ رفضت ذكر اسمها ـ إن الضحية كان يقضي مدة العقوبة «٥ سنوات» بتهمة الاشتراك في جمع التوكيلات المزورة لحزب الغد بصحبة ٣ مسجونين، استيقظوا من نومهم صباح أمس، وجدوه مشنوقا من ملابسه في باب الزنزانة.

و عندما انتهيت من قراءة الخبر تذكرت فيلم واحد من الناس بتاع كريم عبد العزيز و منة شلبي و حبيبي محمد شومان, و افتكرت ال 3 شخصيات اللي اتشنقوا في الزنزانة خوفا من انهم يتكلموا

يا تري في فعلا رابط, ولا انا بهييس ؟؟؟؟؟

عذاب الضمير

من ساعت ما كنت صغير و انا في دماغي ان انا 3 اشخاص في بعض
أنا: و ده اللي هو الجسد و الرغبة و الرفضو الاحساس
النفس: تطلب فوق الحاجة دايما, و هي اللي بتطلب المعاصي
العقل: و هو اللي بيدلني و يوازن بين مطالبي و رغباتي, و بين اللي ليا و اللي عليا
أما بقي الحكم و القاضي بعد ربنا سبحانه و تعالي, هو الضمير, و ده اللي بيحاكمني اذا اذنبت و بيهاديني اذا اصبت
فاحساسي بالرضا في اي وقت بيكون نابع من رضا ربنا عني و بالتالي رضا ضميري عني, و احساسي بالسخط أو بالحزن, اكيد بيكون نابع من سخط ربنا عليا و بالتالي سخط ضميري عليا . .

و عذاب الضمير بيكون انواع, اما بالتأنيب و الندم علي الفعل, او بالاحساس بالزهد في الحياة و انتظار الموت, أو بيكون بالاحساس بالاحباط و الفشل, و دية ادوات الضمير للتعذيب, بيستعملها اذا رجحت كفه النفس عن العقل, و مشيت ورا رغباتي, و عمر الضمير ما بيظلم, لانه امر بيد الله العادل. .

أول مرة أخش جامعة

السلام عليكم

النهاردة عملت حاجة جديدة في حياتي, رحت أقدم ورقي في الجامعة ( جامعة حلوان ) (كلية تجارة ) و قلنا ماشي
رحت طبعا تايه مش عارف اعمل ايه ولا اروح فين, و الناس كلها تايهة زي, وكل شوية اتعرف علي واحد و نتوه من بعض في طابور و ماشفش وشة تاني
و كل حاجة لازملها طابور

طابور عشان أخد ورقة الكشف الطبي
و طابور عشان أكشف نظر
و طابور عشان أكشف أسنان
و طابور عشان اودي ورق الكشف
و طابور عشان اطلع اذن دفع
و طابور عشان أدفع
و طابور تاني عشان استلم الوصل
و طابور عشان اسلم الوصل و اخد ايصال بالدفع
و لسة كمان طابور أول يوم في الدراسة عشان أستلم الكارنية
فعلا الطابور مشهد حضاري, بس مش في مصر
كل الحوار ده اساسا مش محتاج 5 دقايق في شباك واحد تقف طابور محترم لو كل الموظفين بيشتغلوا بزمة, و تقف في شباك واحد تخلص الحاجات ديه كلها, و تعمل الكشف و السلام عليكم

ما علينا, المهم حظي النهاردة و أنا رايح الصبح كلي أمل
أن النهلردة يوم امتحان الملاحق
فا شوفت افشل طلبة موجودين, فيه واحد مبلط بقاله عشر سنين مسك وداني خلاني اكره الكلية قبل ما ادخلها
بس أنا هنسي كل الكلام ده
و افكر في حاجة واحدة

أنا عايز اتعلم