مين أكتر ؟؟؟؟

سألت نفسي انا مرة سؤال
مين هو اللي بيكسب اكتر
واحد بيدور عالحلال
ولا واحد بيبص علي أكبر

لقيت الأول كسبان كسبان
علشان طول عمرة راضي
و التاني تعبان تعبان
علشان علي طول مش فاضي

هو يعني ايه اسرة ؟؟

سؤال بجد أنا مش عارف جوابه
هو يعني ايه اسرة؟

يعني ايه أب و ام؟

يعني ايه أخوات ؟

أنا معرفش, اصل انا عايش في بيت مفكك, كل واحد في وادي, و ماحدش واخد باله من حد

أصل واجب الأب مش الفلوس و بس
و الام مش واجبها النظافة و الأكل و الصحة
في حاجة أسمها
الـــــــتــــــــــربــــــــــيــــــــــة
و ده أكيد أهم واجب من واجبتهم

أنهم يربونا
و التربية ليها أوجة مختلفة و ليست فقط تعني التوجيه, بل تحمل معاني اخري كثيرة

منها التشجيع, و المساندة, و المشاركة في الفرح و الحزن
و لكنك لا تجد ذلك في بيتنا

لا تجد الا السكون و الصمت أو الزعيق و الشخط
أو دوشة التلفزيون علي القنوات المتخلفة

اللي فيكم أب أو ناوي يكون أب, يا ريت يا ريت
يعرف حاجة واحدة
حاجة عمري ما هنساها لو ربنا رزقني بعيال
أن واجبنا مش نكبرهم بس
واجبنا نسعدهم و نساعدهم

يلا, كلها كام سنة الواحد يقضيها و بعدين يخرج يروح بيته الحقيقي
و هناك أكيد هلاقي طعم الحياة و طعم البيوت
أصلي مش لاقيها دلوقتي
ولا اخواتي لاقينها
ولا ابويا و أمي

الخروج من عنق الزجاجة

السلام عليكم
بعد ما خلصت الثانوية بتاعتي, و خلصت فترة الفضي و الملل و الزهق, و سافرت و رجعت, و خلاص خلصت الاجازة المملة
جه الوقت عشان ابص لقدام و أشوف دنيتي هتمشي ازاي, و جه الوقت عشان اقعد مع نفسي كده و ازبط دماغي
أنا عايز ايه؟ و هعمله ازاي؟ ديه اهم الاسئلة اللي هسألها لنفسي ان شاء الله لما اقعد معاها
و أنا ليا طقوس خاصة لما بقعد مع نفسي, بدلع نفسي من الاخر
أعمل شاي و اسمع مزيكا و اقعد في حته بحري
و اروق نفسي علي الاخر
ان شاء الله هعمل كده, بس بعد ما أخلص دور البرد اللي انا واخده من ساعت ما رجعت من اسكندرية

عروسة و عرسان

عـــروســـة و عـــرســـان

لما تكون عايش في القاهرة, و بتصحي كل يوم علي صوت العربيات و الزحمه و ريحه الحرايق بتاعت الزبالة و صوت الخناقات في الشوارع, و تحس انك مش طايق نفسك و قرفان من حالك, هتكون متأكد مليون في المية انك في مصر و هتكون متخيل ان مصر كلها زباله
بس اللي انا أكتشفته بجد, ان القاهرة ديه زباله اه, بس في مدينة تانية رائعة الجمال, حتي في الزحمه و الدوشة, و خصوصا في اهلها
أسكندرية مدينه الجمال, عروسة و أهلها عرسان, البلد تحفه و أهلها ناس جدعان قوي و يساعدوك اوي و يسموك قاهراوي و يتريقوا عليك بس يحبوك, و يخافوا عليك جدا و يحاوطوك لو كنت في البحر

أنا قضيت ال3 أيام اللي فاتوا في اسكندرية, كنت قاعد في أبو قير, أكتر مدينة حبيتها في الاسكندرية, من المعسكر الحربي لطسن, و من البحر جوة للقطر, و اهل ابو قير جدعان جدا الا البياعين, يمصوا جيبك, الاسكندرانية تجار درجة اولي
طفت اسكندرية من أولها لاخرها, زرت المعمورة, و ميامي, و محطة الرمل, و السيوف, و الكورنيش, و شارع 45 , و رحت جرين بلازا, شفت طسن, و ستانلي, و التجاري, و القلعة

و أحسن مكان حبيته القلعة, و خصوصا لما تقعد علي المصدات و في وشك البحر من غير سور, و الموج يخبط في المصدات و ينط و يعلي و يغرقك انت و اللي حواليك, ولا التنطيط علي المصدات,و الكابوريا اللي تطلعلك و تختفي في ثواني
ولا منظر مراكب الصيد بليل, متعرفش تفرق بينها و بين النجوم في السما, ولا صوت الموج لما بيقلب و منظرة من بعيد, ولا ساعت الفجر لما يأذن و يرج البحر من الجوة يرد وراه الله أكبر, و يا سلام علي انعكاس نور المباني علي سطح الميه و الموج بيتحرك, تحس ان في سمك بينور بيعوم في البحر

ولا كلام الاسكندرنية اللي هموت و اتعلمه و اخد عليه, يقولك الولا محمد, و لما حاجة تعجبه يقولك الييسطه, و يقولك هناكلو و نشربو و نلعبو, و لا التريقة الاسكندراني يا خبر ابيض, دمهم زي السكر, ولا المقالب

و الاسكندرنية بقي تحب تسمع حكاويهم, و كل واحد يحكيلك علي مغامراته في البحر, وفي اسكنرية البلد, و الخناقات, و المصالح

أنا بجد قضيت كام يوم في الاسكندرية رائعين بمعني الكلمه, و قشيت أحسن وقت مع نفسي, و رجعت جيوبي فاضية و مستلف كمان, بس اتبسط

بــنـــات

مخلوقات غريبة اتوجدت مع وجود الكون, مش مفهومة مش معروف ملامحها, كل ما نعرفه عنها أنها مطلوبة و محبوبة و وجودها اساسي في الكون, و من غيرها مش هتستمر الحياة
و بيها ممكن تنتهي الحياة, هذه المخلوقات الغريبة تعرف بأسم ( البنات ), و أحيانا بأسم ( الستات) و كلنا نعلمهم جيدا أو تكمن المشكله في اننا نظن اننا نعرفهم جيدا و لكننا لا نعلم عنهم أو عن عالمهم سوي القليل من القليل
هذه المخلوقات الغريبة اقتربت منا بشكل خطير فاصبحوا امهاتنا و اخواتنا و زملاتنا و اصحابنا و زوجاتنا و انتيماتنا, و اصبحوا جزء منا في غمضة عين, و ظلوا يقتربون منا حتي اصبح منهم من يشبهنا كثيرا و يتصرف مثلنا كثيرا

كل واحد فينا في حياته بنت أو أكتر, مش لازم تكون صحبته, ممكن اخته او امه,و عمرك ما تصدق نفسك لو حسيت انك فهمت البنات, فهم معقدين للغاية يحبون و يكرهون في غمضه عين, يطلبون و يعطيون, يرضون و يسخطون, و اسرع ما يفعلونه هو أنهم يتغيرون

فتلك المايصة كانت محجبه من قبل, و تلك الهايفة كانت متعقلة من قبل, و تلك العدوة كانت محبوبتك من قبل, و تلك الشمطاء كانت ام مربية من قبل

اكثر ما اتعجب منه فيهم, انهم غالبا ما يتغيرون من أحسن الي اسوأ, فمثلا المحجبة تخلع الحجاب و هي تظن انها بذلك تتحسن أو تتجمل, و من كانت علي اسس تتركها فتصبح كما تريد ان تكون ( روشة ) و كثير منهم يندمون علي ما يفعلون و يرغبون في العودة لما كانوا عليه ماكان من الأول

و العجب ايضا اني مع ما أري فيهم من تناقض و عيوب, أحبهم و أحب رؤيتهم ( و ده مش معناه حاجة غلط) و لكني احب تواجدهم في حياتي, و ليت كان لي أختا

مصر اللي في عينيا

مصر اللي في عينيا
اللي واعي عليها في بالي
ســـألــتــهـا سـؤالـين
ردت و أنـــــا مـــالـي

أنا كنت عروسة منورة في يوم جميل
كان في دمي بيجري ألف نيل
شبك مسمار في طرف فستاني الطويل
و قدامكم اهه انتوا شايفين حالي

أنا كنت أم لكل مصري محترم
كل ضحكة مرسومة في قلب و حيطان الهرم
كان ليا شعب زمان مشهور بالكرم
و دلوقتي بقي يشحت بالليالي

أنا كنت شمعة منوره فوق حطينكم
كنت بتحرق كل ثانية علشانكم
فكرت مرة انطفي و أشوف أنواركم
انطفي نوري و شكله مش والع تاني

معرفتش أرد بس كنت معذور
هي ديه اللي شفتها لما شفت النور
وعيت علي الدنيا و هي بيت مهجور
بتــضلم بالــشهــور و تــنــور ثوانـــي

بتنوري يا مصر لما بتبصي عليا
بتراعيني و بتضللي حواليا
عمري ما حسيتك حقيقة بين ايديا
بس اتمنيت ديه تكون مصر اللي في عينيا

بتوع البنات

السلام عليكم
نوعين من الرجالة أنا بأكرهم

بتوع البنات
و الرجالة العيال

و أكترهم بتوع البنات, اللي هو يبقوا قاعد مع رجالة و في بنات, يطنش الرجالة و يلاغي البنات, دول أنا بأكرهم بغباء و دول بيبقوا حاجتين اما عندهم نقص, يأما بيحبوا يعطوا, و يعطوا يعني يصاحبوا بنات كتير
النهاردة كنت قاعد مع ثلاث عطاطين و ثلاث بنات و أنا
المهم كل اما اتكلم مع راجل فيهم يرد كدة و كدة و يروح محول لواحدة من البنات

هو ده اللي انا باقول عليه, انا بحترمك تحترمني مش عشان بنات قاعدين خلاص اقوم انا
و أنا بقي لو حبيت أعط هعط جامد قوي بس انا بعرف الأصول
وداعا لزمن الرجولة و الاصول في زمن العيال دول

هو أنا كدة لية

السلام عليكم
سؤال عمال يلح عليا مجنني
هو الناس كدة ليه؟ و أنا مش كدة ليه ؟
طب هو أنا اللي غريب ولا هما ؟
طب أنا الصح ولا الغلط ؟
طب هو انا زيهم و مش واخد بالي ؟

ليه أنا براعي شعور الناس و قليل اللي بيراعوا شعوري
لية انا بحب و بعشق اساعد الناس و مش بلاقي حد يساعدني الا قليل
لية انا بصاحب بجد و ماليش اصحاب بمعني اصحاب
ليه انا بضحي و محدش بيضحي عشاني
ليه انا مخلص و محدش بيخلصلي
ليه انا طيب و محدش بيتعامل معايا بطيبة
ليه انا واضح و الناس حواليا طشاش
ليه انا بحمي الشعيف و ساعت مضعف الاقي نفسي لوحدي
ليه انا بشيل هم الناس و محدش بيشيل همي
ليه انا بعمل خير و محدش بيحس بيه
ليه انا اللي دايما بتصل اطمن علي الناس و قليل جدا اللي يتصلوا بيا
ليه أنا بساعد نفسي و اللي حواليا بيعجزوني
ليه انا مع كل ده بضحك
ليه انا مش بعرف اعيط
طب ليه مبكلمش و مبحكيش
طب ليه اقرب الناس ليا ( بيتي ) مش عارفين عني حاجة
طب ليه اتسند علي حد و اقوي نفسي بية و الاخر اكتشف اني بتحامي منه مش فيه
ليه لما بخاف من الناس بتحامي فيحم
ليه لما بتحامي في الناس بخاف منهم
نفسي أعرف انا ليه مش باكل و مش بنام
طب ليه مش بشكي لحد المي
طب ليه اقرب واحد ليا أنا مش عارفه
طب ليه انا مش بفهم نفسي
طب ليه انا كل حيلتي لساني
طب ليه انا شايل الهم
طب ليه شكلي عيان
طب ليه شكلي حزين
طب ليه لما بستريح لحد بتتبني قدامي حواجز عنه
طب ليه اخر واحد بفكر فيه نفسي
طب ليه انا بشرب شيشة مع اني مكنتش بطيقها

السؤال دلوقتي هو امتي
امتي استريح و بالي يرتاح
امتي كده احس الدنيا حلوة قوي ( هي حلوة بس دلوقتي ), و امتي اضحك علي نفسي عشان كتبت البوست ده ؟

سؤال تاني معلش
أنا عايز ايه؟
أنا لما بفكر في رحت البال بتخيل اني أب و عندي اطفال ولد و بنت صغيرين و عايش في بيت مش كبير قوي, و ليا صحاب في الشارع بنزلهم, و ليا شغل مليان مشاكل بس انا بتلذذ بحلها

أكيد مش هي ديه الراحة, مش أكيد ان الكلام ده لو اتحقق انا هبقي مستريح
أنا لسة ببتدي الدنيا من الصفر و باقول يا هادي, لا عندي مال ولا واسطة ولا مؤهل من مؤهلات التفوق في المجتمع المصري

يبقي الموضوع مش موضوع مشاعر و أسئلة غبية, الموضوع موضوع عملي بحت
معاك مصالح هيبقي عندك صحاب و احباب, و ناس تخاف عليك, و ناس تهمها انتي, و ناس تساعدك, و ناس تراعي مشاعرك

يا ناس دا انا الوحيد اللي محدش بيتكلم عنه

يا تري انا اللي عامل في نفسي كده, ولا هي الدنيا كدة
يوم فرحان, يوم زعلان, يوم مهموم, يوم مظلوم, يوم منصور يوم مهزوم, و في الاخر يوم اخير ما بعده يوم

زهــقـــان

السلام عليكم

من كام شهر بي كنت مستني الثانوية تخلص و الاجازة تيجي, و كنت ناوي أعمل حاجات كتير قوي, و قعدت أخطط و أدبر و أحوش و أرتب
و الاجازة جت و قلت بقي انا مش هلاقي وقت انام, بس انا دلوقتي مش لاقي وقت اصحي
كنت ناوي اشتغل و ألعب رياضة و اذاكر و اتعرف علي ناس و أتكلم مع ناس و اخرج و أروح و أجي و...و...و...و
و الطبيعي في البلد بتاعتنا ديه, انك دايما فاضي, عمرك ما تبقي مشغول, و لو شغلت نفسك بحاجة تلاقي ان الحاجة ديه باقت عادي و باقت فضي بالنسبالك

انا من النوع اللي بيحب دايما يبقي مشغول, مشغول بمشاكل و شغل و حركة و مرواح ومجي, و مبصدق الاقي أي مسئولية اتولاها عشان اشغل نفسي

بس من الواضح في البلد ديه ان اللي عايز يشتغل مبيشتغلش و اللي عايز يلعب بيلعب, يعني الدنيا خربانة

انا عارف اني محتاج اقعد مع نفسي و ارتب انا عايز اعمل ايه, بس انا قعدت كتير و لاقيتها كلها معقدة و متقفله و مش عارف اخرج من مشكلة من غير ملاقي مشكله

و حاجة تانية كمان, انا زمان كنت باصص لنفسي و كل الناس بيبصولي علي اني هكون انسان مييز, فييييييييييين ده
انا متعطل و اللي معطلني اني مش عارف اخد قرارات محددة اللي هو انا هعمل كذا النهاردة يبقي اعمله

انا محتاج مساعدة من حد, مش عارف ليه انا نفسي في اخت, حاسس ان لو كان ليا اخت كنت هتكلم معاها و احكيلها و هتفيدني
حتي اخواتي اللي لاقيتهم قاعدين في مطروح من غير كوشتينة
طب انا اعمل ايه ؟ ؟ ؟ ؟ ؟

أنا بقيت خبرة

السلام عليكم
و لأول مرة في حياتي أدخل قسم شرطة, من الباب وانا حاسس ان في حاد ماشي ورايا, و كل شوية افتكر الكليبات اللي البالي بالك و ابقي عايز اخلص و أمشي بسرعة

شفت هناك العجب مع أني يدوبك مالباب للظابط النبطشي للمكتب و بس

أنا رحت عشان أعمل محضر بفقدان البطاقة لأن المحفظة اتسرقت و فيها حاجاتي, المهم يعني ديه بعض الارشادات و النصائح عشان لو حصلوكوا زيي و حبيتوا تعملوا محضر

أولا
طول مانت ماشي قول سلامو عليكو لأي حد.. و أوعي تقول السلام عليكم .. يشكوا فيك علي طول
ثانيا
أدخل تاني مكتب شمال بتاع ايه معرفش, هتلاقي ظابط وريله نفسك بس من غير ما تتكلم هيديك ورقتين أوعي تفتكر انم ببلاش, لأ دا انت هتروح تصورهم من المكتبه اللي جنب القسم
ثالثا

املا الورقة و اديهي للظابط, و بعدين هيحولك عالهانم اللي قاعدة جنبه, اديها الورقة هتبصلك بصة استحقار و تقولك 3.5 دمغة, اديهالها و اوعي تبص علي الفلوس بتاعتك هتحطهي فين, عشان عيب, المهم يعني خد منها الدمغات
رابعا

روح للظابط النبطشي و هو غالبا بيكون شخصية غتيتة كده حتي و هو بيهذر, و لو هذر معاك, لازم تضحك, المهم اديلة الورقة هيشخبط عليها ليه معرفش
خامسا

ارجع تاني للهانم, هتكتبلك ورقه ب 2 جنيه
سادسا

روح للظابط النبطشي هيبص علي الورقة و يشخبط عليها تاني

سابعا

ارجع تاني للهانم
هتقطع الورقة بتاعتك و تديك ورقه تانية و هتقولك بصوت راجل

اطلع علي السجل هات ورقة بــ15 جنيه

و لو سألتها: الورقه اسمها ايه

هتقلك: ايه السؤال الغغغغغريب ديه ( قصدها الغبي ), أنت أول مرة تعمل بطاقة ؟

و ده معناه انك هتشتري ورقة بتاعت البطاقة
بس خلاص
ساعة عمال امضي ورق و يتشخبط عليه و في الاخر يتقطع
و طول ما انت ماشي شايف ناس نايمة علي الارض و ناس بتلعب و ناس بتشرب شاي

و ان مسه الضر فذو دعاء عريض

السلام عليكم
قبل أي حاجة أنا الحمد لله كويس و راضي 100% عن حياتي و راضي حتي عن كل ضر اصابني

النهاردة كنت قاعد مع واحد زميلي بيشتكي ان في حاجة غريبة في عينية, هو من النوع اللي مش بيحب يروح لدكاترة زيي, الناس كلها نصحته انه يسيبها و هيا هتشفي لوحدها و أنا كان رأيي ان الانسان ساعات يصيبه شيء لمدة يوم و ممكن يطول شوية و ممكن يعيش معاه طول حياته, فا مش كل حاجة الواحد يجري ورا الدكاترة فيها, روح لربنا الأول قبل الدكتور, ادعي و صلي و اجعي تاني كتيير و اصبر لحد ما ربنا يشاء و يرفع عنك البلاء

بس هل ده تواكل, هل ده تعارض مع الاخذ بالاسباب ؟ ؟ ؟
أنا عن نفسي مروحتش لدكتور في حياتي الا لما بتوصل بيا الدرجة اني ببكي من الألم, و الحمد لله ربنا بيشفيني, بس في حاجات مش بتخف و بتلازمك طول عمرك سواء ان رحت فيها لدكتور او مروحتش, ده كمان ممكن زيارة الدكتور تكون مضرة

أنا سايبها علي الله, اسبوع كويس و كام يوم صعبين و الحمد لله, بس خايف اتسأل يوم الحشر انا ليه سيبت نفسي اتألم

امسك حرامي

أتنشلت

النهاردة حصلي موقف بايخ جدا
كان معايا أخت من أخواتي الكتيير اللي مش جايبينهم أبويا ولا أمي, المهم يعني كنا متأخرين و الميكروباص مصدقنا انه جه فركبنا وسط الزحمة و هب مش لاقي المحفظة راحت فين راحت فين مش عارف

المهم انه بعد الموقف ده ببص ورايا عشان الاقي حد بيجري أجري وراه مش لاقي خالص اللي سرقني فضل واقف, و انا بدور لاقيت واحد بيقولي ان اللي سرقني ركب الميكروباص ده ففاتكرت وقتها ان أختي معايا و أنها ركبت الميكروباص لوحدها فجريت ورا الميكروباص و لحقته بس لما ركزت عرفت أن اللي سرقني هو اللي قاللي ان الحرامي ركب الميكروباص ده

بالصراحة انا مش زعلان علي الفلوس اللي في المحفظة أنا بس عايز البطاقة و مخنوق عشان اتسرقت لأن ديه أول مرة أتسرق
يلا انا لله وانا اليه لراجعون