انا و البكاء

السلام عليكم

أفتكر زمان و انا صغير اني لما كنت باغلط في المدرسة أو مش باعمل الواجب كان في عقاب من الاتنين, يا اما الضرب أو ان انا أقف و أرفع ايدي في اخر الفصل...
بصراحة أنا كنت بحب العقاب التاني, لأني بحس ان انا مميز عن باقي اللي موجودين في الفصل, انا واقف و هما كلهم قاعدين مخنوقين, انا مريح دماغي و هما مركزين مع الاستاذ اللي بيشرح..

بس العقاب الاولاني كان بالنسبالي جحيم, لاني من النوع اللي مش بعرف اظهر مشاعري, سواء حزن او خوف او حتي حب
العيال اللي كانوا معايا كانوا يقعدوا يتنططوا من لسعه العصايا و يعيطوا و يترعبوا من منظر زمايلهم و هما بيتضربوا..
أما انا كنت ببقي مرعوب بس بحاول معرفش حد, كنت ببتسم ابتسامه لسه بتترسم علي وشي لحد دلوقتي لما اكون قلقان..

و كان لما يجي عليا الدور علشان اتضرب, كنت بفتح ايديا الاتنين و ابعدهم عن بعض, و كنت أغمض عيني علشان ماسحبش ايدي قبل ما العصايا تنزل, علشان محدش يقول دا خايف..

و ف مرة
كنت عملت حاجة مش فاكر هي ايه
بس المدرس حلف انه هيفضل يضربني لحد ما اعيط
و ابتدا فعلا يضربني علي ايدي اليمين ثم الشمال ثم اليمين
و هو كان متنرفز و كانت العصايا بتوجع ايدي بجد
بس برضه مكنتش عايز اعيط
علشان محدش يقول دا محمد بيعيط
المهم, فضل يضربني جامد قوي لحد ما بقي ينهج و في الاخر لما تعب خالص
قالي عيط علشان انا حلفت
ماردتش عليه
عارفين ليه ماردتش
علشان انا كنت بعيط فعلا و مش عارف اتكلم من العياط
بس انا مش باعرف اعيط بدموع و لا بصوت
مجرد احساس بالانقباض في صدري

في النهايه يعني دخلت مدرسه علي صوت الضرب
و عرفت الموضوع و قعدت تقولي عيط
و قاعدت تضحك كده ليا مش عارف ليه
المدرس قالها انا حلفت
قالته مايجراش حاجة ممكن تصوم 3 ايام
و وجهت الحوار للعيال اللي في الفصل و قالتلهم ان ربنا سمح
اننا نرجع عن قسم مع صيام 3 ايام
بس المدرس ابن اللذين مارضيش برضه
و قاللي افتح ايدك
انا اتنرفزت منه جدا
علشان هو طلع حيوان و مابيفهمش
و ده خلاني احلف اني مش هاعيط
ضربني كام مرة كمان
بصيت للمدرسه في عينيها و كنت بجد نفسي اقولها الحقيني
هيا متهيألي فهمت و راحت معيطه
و راحت واخداني في حضنها و هي بتعيط
انا وقتها بس عيط بدموع

علشان حسيت ان في شخص ما همه امري
شخص بيبكي عليا
حسيت انه هانت عليا نفسي و ما هانتش علي غيري


و انا لحد دلوقتي اكتر شيء بيحسسني اني عايز ابكي
هو اني الاقي حد بيبكي عليا
او حد يهمه امري فعلا
و علشان الحد ده مش موجود كتير
او يمكن ابدا
مش فاكر اخر مره باكيت فيها امتي

مش عارف

عمرك سألت نفسك
ايه أكتر حاجة ممكن توجعك؟؟
أيه أكبر هم ممكن يبعد عن عينيك النوم؟؟

أنا عايز أجاوب اجابه شخصية علي السؤال ده...
أكتر شيء بيرعب البني ادم و يجيبله الهم
هو المجهول
هو انه يكون مش عارف
مش عارف في ايه
أو مش عارف هيكون في ايه

لما يكون الجواب علي كل الاسئله هو مش عارف
اما تكون كل التوقعات مطموس معالمها
و يكون في جزء ناقص من المعادله مش عارفينه

لما يكون سؤال بسيط و صغير مش عارفله اجابه..
السؤال هو:: ايه اللي بيحصل؟؟
هو في ايه؟؟

و بالتالي بتسأل نفسك
طب أعمل ايه ؟؟
و برضوا مافيش اجابه

في الحاله ديه الواحد يتصرف ازاي؟؟
برضه مش عارف

طيب يعمل ايه؟؟
مش عارف

هل هي مسأله وقت؟؟
ولا الرساله اتبعتت بس انت مافهمتهاش؟؟
مش عارف برضه

طيب مين يعرف؟؟
هي تعرف؟؟
مش عارف

طب أنت تعرف؟؟
أكيد لأ

امال مين يعرف؟؟
مش عارف
مش عارف
مــــــــــــش عـــــــــــــــــــــااااااااارف

كـلـمـة و هـاقـولهـا

كـلـمـة و هـاقـولهـا
و اسمحيلي
سيـبـيـني اكملها
و اعذريني
علشان يمكن هتوجعك
بس أكيد هترجعك
هترجعك لنفسك تاني
و تعرفي اني ابدا مش أناني
هاقولها و كل ماشوف حد هاقوله
ان كان حبيبك عسل ماتلحسوش كله
ايوة بحب سيادتك جدا
بس كفاية عليكي الكلمه
أحفظيها
و حاوطيها
هيجي اليوم و هسألك عليها
وساعتها هتقربي و هاقرب
و لما حد يسألني عمري ما هتهرب
دي حبيبتي و حته مني
مش هبعد ولا تبعد عني
صنتها زمان و هافضل اصونها
حاميتها من نفسي و بعدت عنها
دلوقتي بقينا كتاب مكتوب
صفحاته مابتتفرقش
الغلاف للصفحة مخطوب
ترقيمهم ما بيتغيرش
اما الان يا حبيبه القلب
ان قربت ركبني الذنب
اه منك يا شيطاني راقدلي
أبعد عني يا أبن الكلب

كلمه بسيطة و بس خلاص
مين بين كل بنات الكون
الحلوين الجمال
اللي جمالهم فوق الخيال
و ان قربت تنول المحال
بعدت انا عن كل أحتمال
سبتهم و اخترت ....ال

كنت أنا

السلام عليكم
من كام يوم كنت بدعبس علي شوية حاجات قديمة عندي, لاقيت شوية الصور دول
و شدوني جدا, و قررت اعملها سكان و افكر فيها شوية..

يا تري وقتها كنت بفكر في ايه؟؟؟؟
ناس كثيرة بتقول اني ماتغيرتش عن زمان قوي, علي الاقل في تعبيرات الوجه
نفس الأبتسامة و نفس النظرة
يمكن نفس طريقة التفكير كمان
أنا نفسي مش حاسس أني أتغيرت
نفس الدماغ المزدحمة بالأفكار
الناس بتفتكر اني علي طول حزين و كئيب
انما أنا يمكن أكثر بني ادم بضحك
بس ضحكي لنفسي و في نفسي
ممكن ابتسامه صغيرة علي وشي
معناها أني ميت من الضحك

هو أنا عامل كده ليه؟؟؟؟
من زمان و انا مش بحب اتصور
في طبيعتي مش بحب اظهر كثير
و بميل للعمل في الكواليس
و كان زمان لما يحبوا يصوروني كنت ابقي مش عارف أعمل ايه
يا تري اضحك, ولا ابص علي العدسة, و لا ما أرمش
المهم هما كانوا بيقولولي افتح عينيك
و اضحك
و ديه النتيجة

وشي بيقول ايه ؟؟
الصورة ديه من أكثر الصور المعبرة
و بتوضح معاني كثير جوايا
الصورة مفيهاش غير
طفل صغير, و ناس غريبة عليه, و بحر, و نظارة
و عين مراقباه و بتبص عليه
--------------------------------------------
معلش دوشتلكوا دماغكوا بيا
بس أنا كنت عايز أتأكد من طبيعتي
هل أنا أتخلقت كده, ولا الدنيا هي اللي عملت فيا كده
و لاقيت اني أنا أتخلقت كده
و ديه طبيعتي
العيب اللي هعرفة و هتأكد منه هو اللي هغيرة
انما عمري ماهغير شيء مش عيب ولا حرام
هضحك وقت ما أعوز أضحك
و هزعل وقت ما أعوز أزعل
و هغضب علي طريقتي
و ههزر علي طريقتي
و هلعب علي طريقتي
و ده انا و مش هتغير

--------------------------------------------