مش عايزة اعمل كدة تانى

النهاردة حد عزيز عليا واجهنى بحقيقة كنت عرفاها بس ماكنتش معترفة بيها... حقيقة انى انسانة متشائمة و غاوية اشيل هم الدنيا فوق دماغى و اعد احط كل المشاكل فوق بعض لحد ما يعملوا عقدة فد كدة و ساعتها ابتدى افكر فى حل للمصيبة اللى أنا شايفاها مصيبة مع انها شوية مشاكل عادية اتجمعوا على بعض.. حقيقة تانية واجهنى بيها حد تانى غير الأولانى بس برضه عزيز عليا هى انى غاوية اعيش تحت عناوين كبيرة و بترن لما الواحد يسمعها يعنى مثلا زى " محدش فاهمنى" " انا مختلفة و عشان كدة وحيدة" " مشاعرى بتروح على الفاضى" " الناس واخدينى كأنى مسلم بيا و كأن مش من حقى اغلط " و كلام كتير شبه دة..جايز يكون الكلام ده جزئيا صح و بيحصلى فعلا بس مش للدرجة اللى تخلينى احطله اسم و اعتبره حقيقة و مشكلة كبيرة فى حياتى و اعيش فى نكد معظم الوقت. لما الاتنين واجهونى مش هانكر انى مصدقتش من اول لحظة و عاندت معاهم و مع نفسى قبل ما اكتشف ان دى عيوب فيا فعلا..... أنا مش عايزة اعمل كدة تانى

انا بجد لما فكرت و حسبت الأمور مع نفسى لقيت انه صحيح عندى شوية مشاكل بس المشاكل دى مش سبب كافى انى ابقى كئيبة و مضايقة على طول و معرفش اتمتع بحياتى..و الأهم من ده هو انى لقيت فى حياتى حاجات كتير حلوة تستاهل انى افرح و احمد ربنا عليها ..انا فى الآخر وعدت نفسى انى مش هاعمل اللى كنت بعمله دة و انى هاخد كل مشكلة لوحدها و ابسط الأمور شوية, و انى هاتعلم يعنى ايه اتعشم فى ربنا خير.. و ازاى ابقى متفاءلة شوية...
ادعولى انى اقدر انفذ الوعد...و بس ملاحظة اخيرة:
انا مش نكدية ..و بجد بكره النكد

المواجهة الأولى

أول و يمكن أغرب مواجهة ليا مع عالم المجانين حصلت و أنا صغيرة أوى , مش فاكرة امتى بظبط , يمكن فى فى ثالثة أو تانية ابتدائى و يمكن قبل كدة كمان ..برغم ده أنا فاكراها زى ماتكون حصلت امبارح...
وقتها أنا كنت ساكنة فى الجيزة و كنت بروح مدرستى مشى مع بابا أو عمى . كنا بنمشى شارع طويل فاكرة كل حاجة فيه لحد النهاردة. الشارع ده كان فيه محلات فكان دوشة بليل, لكن الصبح كان هادى بطريقة غريبة ماتسمعش فيه غير صوت القطط و الكلاب.. المقدمة طولت مش كدة ؟؟ طيب ندخل فى المواجهة نفسها قبل ما تزهقوا ولا تناموا منى ....فى الشارع ده أنا شفت واحد من أغرب المشاهد اللى قابلتها فى حياتى.. ست... لا هى شابة ولا عجوزة لكن معرفش سنها اد ايه لأنى عمرى ما جتلى الجرأة انى أقرب كفاية عشان أعرف مع انى شفتها أكتر من مرة.. الست دى كانت بتلبس اللى عمر ما أشهر مصمم أزياء قدر يبتكره, كانت دايما لابسة طرحة سودة قديمة, أكيد هاتقولوا يااااااا سلااااااام طرحة سودة مرة واحدة.. ايه يعنى الجديد ؟؟ معلش اصبروا حبة و انتم تعرفوا... بعد ما ننزل من منطقة الطرحة السودة هنلاقى اللى أنا اقصده , حاولوا تخمنوا أغرب حاجة ممكن انسان يلبسها و ما تتخضوش من اللى جاى ... الست دى كانت بتلبس قطط .. أيوة قطط .. مش قلتلكم ماتتخضوش .
بس ماتقلقوش , القطط عايشة و آخر تمام . هدوم الست دى كانت عبارة عن حاجة كدة شبه الجلابية مبهمة المعالم و فى كل حتة فى الجلابية دى متعلقة حبال و شرايط و كل شريط ملفوف حولين قطة و معلقها من وسطها فى الجلابية, قطة عايشة و بتنونو .. أه والله بتنونو ... تخيلوا واحدة ماشية و على جسمها أكتر من عشرين قطة مربوطين فى هدومها , اللى نايمة و اللى بتخربش و اللى بتنونو.
الست كانت طول النهار تلف فى الشوارع بقططها تدورلهم على أكل و شرب و تأكلهم قبل ما تأكل نفسها , و لما تتعب من اللف كانت بتعد على الرصيف و تتطبطب عليهم زى ماتكون أم بتنيم ولادها.. متخيلين المنظر ؟؟ و الله أنا ما كنت عارفة أخاف منها ولا أخاف عليها و على قططها من قسوة الشارع.
طب مين الست دى و ايه حكايتها ؟؟ الله أعلم بعباده.. كل اللى سمعته كان طراطيش كلام كدة, مرة يقولوا انها كانت متجوزة و عندها ولاد كتير بس ماتوا فى حادثة أو بعيا, و مرة يقولوا ان جوزها أخد الولاد و طردها فى الشارع , و مرة تالتة يقولوا انها كانت غنية و جميلة بس ماتجوزتش ولا خلفت فا اتجننت من الوحدة.... أنا معرفش الحقيقة فين فى دول ولا أذا كانت فيهم أصلا, أنا أعرف بس انها عملت القطط دول ولادها.. تأكلهم و تنيمهم و تدافع عنهم بشراسة لدرجة انك تحس انها ممكن تاكل اللى يقرب منهم أو يئذيهم. كل دة برغم ازعاجهم و نونوتهم و قرفهم و خربشتهم..متهيألى لو كل أم أو أب عاملوا ولادهم كدة الدنيا هتختلف كتير...
يالا كفاية كدة النهاردة عشان شكلى تعبت أعصابكم و صدعتكم بنونوة القطط .. أشوفكم فى المواجهة التانية ان شاء الله.

في حديقتي زهرتان

في حديقَتي زهرتان, تؤنِسان نظراتي و تلوحان لي في الذهابِ و الاياب, اخشي عليهما من كل مارٍ و احفظهُما من كل عَين, فأحجب عنهما نظرات الماره و اخفيهما وراء سياجٍ عظيم لا تخترقه النظرات .... و لكني وجدتُ انه بحجبهم عن نظرات الماره, أحجب عنهما نور الشمس, فتموت الالوان فيهما و تنطفيء ارواحهما .... لذا قررت أن أعلن عن وجودهما, و لكن للشمس فقط, فقد قررت أن اضعهُما في أعلي الاعالي حيث الشمس ساطعه تُغذي ارواحهُم, و في نفس الوقت لا يراهم من هم مارون في الاسفل ....

ألستُ بمنّاعٍ للخَير ؟؟؟

-------------------------------------
اذاً
وان مت ظمئانا فلينهمر القطر

مواجهات مع عالم المجانين

المجانين أنواع ,منهم اللى سايقين الهبل على الشيطنة و عاملين فيها مجانين أو بيتصرفوا زى المجانين عشان محدش يحاسبهم على أى حاجة بيعملوها .. و دول للأسف الشديد كتروا أوى حوالينا اليومين دول. و منهم المجانين اللى بجد, قصدى المصابين فعلا بمرض نفسى بيخليهم يعملوا تصرفات غير عقلانية و غير منطقية, دول فعلا اللى ماينفعش يتحاسبوا و ربنا يشفيهم و يعينهم على اللى هما فيه. أنا بقى لسوء – أو يمكن لحسن – حظى اتعرضت لمواقف حطتنى في مواجهات مع النوعين . و هنا أنا هاركز على النوع التانى , يمكن عشان النوع الأول مش حاجة غريبة علينا و كلنا اتعاملنا معاه كتير.

ماظنش انها معلومة جديدة عليكم انه خلال السنين الاخيرة قامت مستشفيات المجانين الحكومية باطلاق سراح الكثير من ساكنيها لعدم وجود أماكن كافية بالمستشفيات – ايه ده ؟ المجانين كتروا أوى يا جدعان – و عدم وجود الموارد الكافية للانفاق عليهم , او بمعنى أصح عشان مش عايزين يصرفوا عليهم تانى و كفاية اوى لحد كدة ولا هو أكل و مرعى و قلة صنعة على رأى المثل الشعبى . المهم يعنى المستشفيات دى طالبت أهالى المرضى باستلامهم و رعايتهم بمعرفتهم بقى بعيد عن المستشفى , أما المرضى اللى مالهمش أهل أو اللى اهلهم رفضوا استلامهم فتم اطلاقهم فى شوارع مصر المحروسة هائمين على وجوههم لا يلوون على شىء – ماهو فى حاجات ماينفعش تتقال غير بالفصحى – يخبطوا فى خلق الله و خلق الله تخبط فيهم و كل واحد و نصيبه بقى. أنا عن نفسى كان ليا نصيب مش قليل من التخبيط اللى من النوع ده من قريب و من بعيد و برده سمعت حكايات ليها العجب عن التخبيط اللى اتعرضله ناس أعرفهم فحبيت احكيلكم عليها عشان أشهدكم معايا على جنان الدنيا و اللى بيحصل فيها...قريب ان شاء الله هاحكيلكم أول مواجهة ليا أو أول خبطة فى حياتى.

قلبه علي لسانه

السلام عليكم

تجربة غريبة جدا مرت عليا النهاردة, اتطلب مني اذ فجأة اني اروح ابوس ماما و اقولها سلامتك ( علشان عيانه شوية ), عادي جدا الطلب بالنسبة لاي حد بس انا استتقلته قوي ( مش علشان مش بحب امي ) بس حسيت اني مش هعرف ... المهم مع الالحاح قررت اني اروح .. و روحت هزرت معاها شوية .. و بعدين سألتها " هو أنت لسة عيانة ؟؟ " ... قالتلي "يعني قريبت أخف" ... خلاص قررت اني هبوسها و اقولها سلامتك .. و هوب معملتش اي حاجة و فضلت واقف .. و بعدين مشيت ...

قعدت أفكر شوية كده, ليه ساعات مش بنعرف نقول الكلمة الحلوة ؟؟؟ ليه مثلا تبقي ناوي رايح تصالح حد و ترجع في كلامك؟؟ و ليه كلمة بحبك بتتأخر كتير قوي ؟؟ و ليه انا أسف صعبة ؟؟ و ليه بتستصعب تقول يا حبيبتي او يا حبيبي ؟؟

السؤال جابني لسؤال, ليه ساعات ممنوع اننا نقول بحبك و ليه ممنوع اننا نتصارح طول الوقت بالحب و المعزة و التقدير, ليه بقي الكلمة الحلوة ليها معنيين ؟؟ ( مثلا واحد بيقول لزميلته انت انسانه ذكية يبقي كده الواد عينه منها و بيلف عليها )...

نفسي اقدر اعمل زي ما جاهين بيقول:" انا احب أقول الشعر في الحلوين .. و الحلو أقوله يا حلو في عيونه", نفسي طول منا ماشي اللي في قلبي يبقي علي لساني.. هفضل اقول بحبك - بعزك - سلامتك - انا اسف - سامحني - نفسي نفضل اصدقاء - و كلام كتييير عايز يطلع.. بس محبوس جوة علشان حاجة انا مش عارفها ..

طيب لو انا ماقولتش لصحبي اني بحبه, هو يعرف منين, و لو مقاليش انا هعرف منين ان شاء الله ؟؟؟

نفسي اكسر الحاجز ده و أقول

بس هل ده صح ؟؟

شخبطات

قبل اى حاجة عايزة أشكر محمد أوى على تقديمى لبينى و بينك ... بجد مش عارفة أرد على كلامك يا محمد و مش عارفة أقولك ايه غير ان الاحترام و التقدير متبادل و شكرا أوى أوى أوى..عارفة ان دة مش كفاية كرد على اللى قلته عنى بس فعلا مش عارفة كلامك دة ممكن يترد عليه ازاى.

بعد كدة بقى عايزة أقدم نفسى بنفسى ليكى يا بينى و بينك... أنا بنت مصرية, مش أميرة على أرض الواقع لكن يمكن نفسى أكون أميرة فى عالم الأساطير ( و على فكرة انت اللى طلعتها فى دماغى يا محمد), مش أميرة يعنى بنت ملك ولا عايشة فى قصر ولا أحسن من حد غيرى..لأ , أميرة يعنى ليا العالم بتاعى اللى ماشى بطريقة مختلفة عن العالم الواقعى اللى عايشة فيه , عالم هادى و مليان سحر و خيال زى عالم ألف ليلة و ماه برى اللى حكيلك عنها قريب ان شاء الله. عالم أبقى أميرته مش عشان أحكم و أتحكم لكن عشان أمشيه بقانون الأساطير اللى هو مافيش حاجة اسمها مستحيل و فيه أقدر أعيش قصة بتاعتى أنا... كفاية سرحان بقى و نرجع لأرض الواقع...
فى أرض الواقع أنا مشخبطا تية كبيرة, مافيش حاجة بتقع بين ايديا و تسلم من شخبطتى.. كتابة على رسم على خطوط مالهاش معنى .. كل أنواع الشخبطة هتلاقيها فى كتبى و أوراقى و حياتى. أنا عندى اعتقاد ان شخصية الانسان عبارة عن شوية شخبطات اتحطت جنب بعض و بتظهر فى كلامه و تصرفاته وكتاباته و فنه لو كان فنان.
زى ما محمد قاللك يا بينى و بينك , أنا حبيتك من أول مرة شفتك فيها و فرحت أوى لما عرض عليا تبقى أختى أنا كمان , أتمنى انك تسمحيلى أفضفضلك و أوريكى شخبطاتى و أتمنى انها ماتدوشكيش أو تفركش ترتيبك...

أختك الجديدة:
ماه برى

انا عارف نفسي و تلكيكي

مش عايز احبك مش عايز
مش داخل سجنك مش جايز
مش جايز اموت فيكي و فيكي
دا انا اموت فعينيكي من غمزة
أنا عارف نفسي و تلكيكي
هعشق لياليكي من همسة

محمد منير .. دخل حياتي من 6 سنيين .. و بقي صديقي الصدوق .. كل معني جوايا بيطلعة .. كل فكرة بيكلمني فيها .. بصراحة .. منير ده ساحر و حكاية .. أنا كل شوية كده اعلق علي أغنيه و اقعد اكرر فيها .. بتبقي دماغي فيها و ببقي حاسسها قوي ..

الطول و اللون و الحرية .. أغنية روعة في الكلمات و الاداء .. عارفين لما بيكون الواحد نفسه في حاجة بس مستكترها عليه ؟؟؟ بيحبها قوي بس مش متخيل انها ليه ؟؟ رغما عن انفه و مهما يداري بيبان عليه انه عايزها و انه هيموت عليها....

بالظبط الشعر اللي بحبه
و الطول و اللون و الحرية
ده مهفهف علي وشي بلعبه
هوصفلك ايه يغمي عليا

يا راجل دا انت واقع و مسحوب من لسانك .. فالاول عمال تقولنا مش عايز تحبها و مش هتدخل سجنها .. و دلوقتي بتقول انها هي اللي انت نفسك فيها و هي اللي انت عايزها ؟؟؟ تيجي ازاي ؟؟؟
مافيش غير انك اخدت قرار تقفل قلبك, بس اكيد يا منير مش هتقدر تستحمل, وقت ما هتيجي تخبط عالباب هتفتحلها قلبك علي طول, اسمحلي اقولك انك واقع يا منير ......

ماه بري ... شخبطات أميرة

السلام عليكم
عارفين لما يكون في حد بتكن له احترام كبير قوي, و يطلب منك طلب صغير قوي, بيبقي نفسك تعمل له اكتر من اللي طلبه بكتير ... طيب و لو طلب منك انه يشاركك في عمل شيء, هيكون احساسك ايه ؟؟؟ اكيد هتكون سعيد و متحمس و حابب تعمل كل حاجة صح و مافيهاش اي غلطه ... و هو ده اللي انا حاسس بيه من ساعت ما عرفت ان الأميرة ماه بري (MahBerry) هتشاركني بالكتابه في بيني و بينك ..

مش عارف اقدمها ازاي لبيني و بينك, انا متأكد انهم هيحبوا بعض قوي, بس برضوا لازم اجمع كلمات اقدم بيها الأميرة ماه بري لبيني و بينك ......... يااه تعبت من التفكير ..:
بيني و بينك, بقالك معايا سنة كامله قابلنا فيها ايام كتير صعبة و ايام كتير حلوة, و كنتي فعلا اكتر حد برتاح لما اكلمه و احكيله, و كنت فعلا بتقدري كل كلمه ليا و كنت بلاقي و انا بكلمك اجابات علي اسئله كتير ... باختصار يا مدونتي العزيزي .. ليكي جانب خاص عندي ... و عايز اعرفك علي شخص هتحبيه كتير .. اسمها الأميرة ماه بري (MahBerry) .. و هي حبيتك من اول ما عرفتك .. و نفسها تحكيلك علي حاجات كتير جواها و حكايات كتير عندها .. و انا واثق انك هتسمعيها و تفهميها .. وواثق انها هتقدرك و يبقي ليكي مساحة خاصة عندها.

بيني و بينك ... اقدملك الاميرة ماه بري (MahBerry) ...

حسن الظن بالله

السلام عليكم
لسة من خمس دقايق كنت بقرأ مقاله كاتبها الداعية مصطفي حسني علي موقع بص و طل, المقال كان بيتكلم عن حسن الظن بالله و ازاي ان حسن الظن بالله بيقرك اكتر من ربك و بيريحك نفسيا و بيخلي عندك أمل مهما كانت الظروف,, أنا احب اني اكتب كام جمله ليا و لأي حد بيقرأ BeniWBenak, جمل أثرت فيا و احب اني افتكرها كل شوية:

- "أنا عند ظن عبدي بي إن ظن خيرًا فله وإن ظن شرًا فله" حديث قدسي
- الإيمان ما وَقَر في القلب وصَدَّقه العمل.. وإن أناساً قالوا إنّا نُحْسِن الظن بالله، وكَذبوا.. لو أحسنوا الظن لأحسنوا العمل
- عبدي، إنك ما دعوتني ورجوتني غفرت لك على ما كان منك ولا أبالي. عبدي، لو بلغت ذنوبك عنان السماء ثم استغفرتني غفرت لك ولا أبالي
- إن الله حليم كريم يستحي أن يرفع العبد يديه فيردهما صفراً خائبتين
- يا ابن آدم لا تخف من ذي سلطان ما دام سلطانى موجود لا يزول لا تخف من فوات الرزق ما دامت خزائنى ممتلئة