يخرب بيت البلد دية

السلام عليكم
انا هدخل في الموضوع علي طول علشان الكلمتين واقفين بقالهم كثير..
أنا مش لاقي لازمة خالص للكلية..

يعني لا علم ولا دكاترة ولا مناهج ولا طلبة
ولا حتي صحبه
ولا أي حاجة
صحراء جرداء مملة و خنيقة

كفاية المشوار الممل من الهرم لحلوان, المشوار القميء, المشوار اللي عبارة عن شرذمة من الرتفعات و المنخفضات.
نفسي اروح الكلية بس كل مرة اخد القرار اسأل نفسي أروح لييييه, مافييش اجابة خالص.
طيب اروح لييه.؟؟

لو علي المذاكرة هما الملزمتين اللي في الاخر بيقضوا الغرض و بيجيبوا امتياز, علشان الامتحان بيجي بالنص من الملزمة علشان الكوسة اللي مزروعة في انحاء الجمهورية..
معلش بقي انا اتعصبت عليكوا بس من غلبي..

المجال بتاعي رائع بس الدراسة مقرفة
تصدقوا اني بذاكر مع نفسي في البيت بعيد عن مناهج الكلية
بس بذاكر نفس المجال
و مستعد اقف قصاد أحمر طالب بيجيب امتياز و اوريله انه مش عارف اي حاجة في أي حاجة..
ولا الدكاترة يا عيني عليهم
فعلا هما دول اللي ماسكين اقتصاد البلد
علشان كده حالنا طييييينة

يخرب بيت البلد ديه
مش قصدي مصر الجميلة طبعا
انا قصدي ما هي عليه
و أقسم الا تبقي هكذا
انتظروني ... او اسبقوني

أرحموا عزيز قوم ذل

السلام عليكم

امبارح حصل شيء لم يكن علي البال ولا عالخاطر, امبارح عرفت كم انا ضعيف و مكتوف اليدين امام غلبة الرجال, امبارح عرفت قد ايه كل من أحبهم في خطر و لست بقادر علي حمايتهم, امبارح عرفت كم هو صعب أن أري الظلم بعيني و لا يسعني الا البكاء..

امبارح حوالي الساعة الرابعة صباحا سمعت صوت صياح في الشارع و فورا عرفت انها خناقة, فرحت كعادتي ابص من الشباك علشان أعرف اذا كان حد ليا في الخناقة, و للأسف كان ما كنت اخشاة, أبو عمار صاحب القهوة اللي بقعد عليها بيتخانق مع امين صاحب القهوة التانية علي ايه انا مش عارف لحد دلوقتي و اوعدكم اني لما أعرف حبلغكم...
المهم, اشتعلت الخناقة و لم ابو عمار صبيانه و دخلوا القهوة و قفلوا عليهم, و عم امين و صبيانه قاعد يخبط و يرزع في الباب عايز يكسره, و فجأة خرج أبو عمار و صبيانه بيحدفوا ازاز البيبسي علي امين و صبيانه, كانت اشبه بمعركة منظمه لم اري فيها الا هذا الجزء الصغير, و لكن يبدوا انها كانت اكثر اشتعالا.. المهم جت الحكومة, و فضت بين الفريقين و اخدت ابوا عمار و امين...

ما فات ليس هو ما اقصد الحكي عنه, اللي فات كله شيء عادي و طبيعي انه يحصل لما يكون في ناس بتتخانق, ان الحكومة تيجي تلم الناس و تنظف الشارع... م ا هزني و اطار النوم من عيني هي مشهد قبض الحكومة علي ابو عمار..
أبو عمار راجل عمره يتعدي ال 50 و من أول ما الحكومة دخلت الشارع و هو واقف يبص من بعيد لحد ما البوكس جه جنبه و نزل الظابط و ابو عمار بيبص عليه و يقوله لازم تسمعني يا باشا.. كل ده و انا بتفرج علي المشهد من الشباك و كلي خوف علي ابو عمار ( العادي يعني ), لكن اللي حصل هو ان الرظابط نزل ضربي ف ابو عمار و صبيانه, أبو عمار معروف في المنطقة بزعامته و جدعنته و عزته بينضرب من عيال في سن ابنه. المشهد هزني كثيرا و انا انظر لرجل كان يمثل شيئا كبيرا بالنسبه لي و هو يهان اهانه الكلاب..

أرحموا عزيز قوم ذل....
ده أقل قول انا ممكن اقوله... ربنا يكون في عوننا

اسعي و انا أسعي معاك

السلام عليكم

كان في شكوي كده سمعتها من واحد صاحبي..
بيقول اني دايما بتكلم علي الحاجات الكويسة اللي فيا, و علي المواقف اللي كنت فيها جدع و طيب و محترم و.. و...و بطلع دايما الواد المش عارف ايه اللي مفيش زيية اتنين...
معاك حق يا صاحبي, انا عارف اني دايما برسم صورة ليا عند الناس, غالبا ما بتبقي متعارضة مع الحقيقة, مش معني كده ان انا بضحك علي الناس, انما هما اللي بيحطوا في دماغهم دايما ان انا كويس 100% و مش بيحاولوا يدوروا علي الجانب الوحش فيا.. و ليه يدوروا, هما شافوا مني حاجة وحشة؟؟

ما علينا, من ضمن الحاجات اللي فيا و بتنرفزني, هي ان انا بستسلم بسرعة و مش بقاوح علي حاجة, يمكن علشان مش بحب أحس ان أنا مهزوم و مش بحب اشوف نظرة أسف في عين حد عليا..و ده سبب اني بسيب حاجات تروح مني كتييير و حاجات تانية مش بسعي لها من أصله..

بس ده لازم لازم لازم يتغير, لازم أصر علي كل تحدي اخوضة, لازم أصر علي النجاح و الفوز, لأني لو خفت أني ابقي مهزوم في نظر الناس هبقي مهزوم فعلا, انما لو عملت اللي عليا و اتهزمت هكون في نظر نفسي منتصر..
أن شاء الله ده هيتغير..

عاوز توصل لايه ؟ ؟ ؟

نكمل بقي كلامنا
أنا لست بمغرور أو متكابر, و مش واخد قلم في نفسي ولا حاجة, أنا كل الحكاية أني متأكد ان عندي طريقة تفكير مختلفة عن كثير ممن حولي, طموحي يتعدي طموحهم و افكاري تهشم افكارهم اذا ما تقابلوا, و لذلك عندي الثقة انني مميز عنهم, مميز بطموحي و خيالي الجامح لا أغلق بابا للتفكير ابدا, فكل الابواب مفتوحة امامي و لي كامل الصلاحيات للدخول فيها و اللعب في جميع المناطق..مش محدد نفسي في منطقة معينة زي ما اغلب الناس اللي حواليا شايفهم محددين نفسهم و مش عاوزين يخرجوا عن النمط..
ميهمنيش اللي انا فيه ده صح ولا غلط ( أقصد الاختلاف ), كل اللي يهمني ان ده أنا و مستحيل اتغير لأن ديه عقيدة بالنسبه لي, مهما الظروف حاولت تغير اتجاهي في الحياة و طريقتي في اللعب, عمري ما هاكون غير كده, ده امر مسلم به ولا رجعه فيه..ان شاء الله

كثيرا تمنيت ان اخرج من نفسي ليوم واحد لأري نفسي من عيون شخص اخر, علشان اعرف عيوبي و مميزاتي, و طالما ده مستحيل يحصل فقررت اني اكون ما انا عليه, و من يرفضني فلينصحني و يوجهني و من يتقبلني فليحمسني و يزيدني..و هذا ما كان و ما سيبقي علي الدوام..ان شاء الله

أنا مش هحدد انا عاوز أكون ايه, انا همشي زي ما أنا ماشي, و لو ان خطواتي بطيئة الا اني علي يقين اني وقت ملاقي الطريق واضح قصادي هتكون خطوتي تساوي عشرين خطوة من خطوات من حولي..ان شاء الله
لست بعظيم ولا اله كما قلت مسبقا, و لكني مختلف ( يمكن متخلف ؟؟!! ), و طالما انا مختلف فاكيد مصيري مختلف, يا اما نحو الاحسن او الاسوأ, و لكني واثق اني لن اكون نسخة ممن حولي, سأكون أحسن منهم مليون مرة, أو أسوأ منهم مليون مرة.. مخاطرة غير محسوبة, و ليكن الله في عوني..

يا من أدرتم الوجه عني, أعلموا أني من سيرد وجوهكم الي, أعلموا أنكم فعلتم ما لن تحبوا ان تفعلوه, اني ماضي و انكم لراجعون, اني ماضي و انكم لراجعون, ان مددتم يد العون تجدون يدي أسرع, و ان مددتم يد الغدر تجدون ربي أقدر, و ان عانقتم ذهب الأرض فأني معانق نجوم السماء.. علي فعلتكم انتم نادمون؟؟ قد كان ما كان, و ليكن ما سيكون.... أن شاء الله

عاوز توصل لايه ؟ ؟ ؟

عاوز توصل لايه ؟ ؟ ؟

سؤال و ما زال ماجاش عليه الرد, بسأله لنفسي كل يوم و كل ساعة بقعد فيها مع نفسي, أنا عاوز أوصل لايه؟؟:
ساعات القي طموحي واقف عند بيت و زوجة و أولاد؟
و ساعات القي طموحي عدي السبع سموات؟
و ساعات القي ماليش طموح اصلا و مش عاوز حاجة؟

انما في الحقيقة, أنا عارف انا عاوز ايه, بس بشكل مجمل غير محدد المعالم, أنا عايز اسيبها و أنا عامل حاجة, مش عاوز اجي و أخرج زي ما أنا ( أنا بتكلم طبعا علي الدنيا ), عاوز اسيب بصمتي في الدنيا, انما تحديدا ايه, ده اللي انا بدور عليه, و ده اللي انا عاوز اعرفه...
أيه اللي ممكن أعمله علشان اسيب بصمتي في الدنيا, ليس لدي عقل العلماء لأكون منهم و أترك علوم ينتفع بها, و ليس لدي عقل الحكماء لأنتسب اليهم و اترك تراثا من الاقاويل و التوجيهات, و بالتأكيد لست لاعب كرة ماهر أسعي لاحتفاظ مصر بكأس العالم مدي الحياة...
اذا من انا وكيف و ماذا؟؟؟
قرأت سير ذاتيه كثيرة يتكلم فيها اصحابها عن انفسهم, ولكني لم اجد اي اجواب لتساؤلاتي, وجدت اكثرهم عامل فيها اله و الباقيين بيثبتوا انهم لم يسعوا لما هم فيه, و مع ذلك صدقتهم, ان صعب جدا انك تسعي انك تكون شيء معين او تضيف شيء معين و محدد, انما انت بتفضل تبحث عما تقدمه و مع مرور الزمن تتضح الاجابه شيئا فشيئا...هذا ما وصلت اليه و ليكن ما سيكون..
و لكن في بعض الاحيان, يستفزني شبابي فانتفض انتفاضة رفض لما انا فيه من حال, مهما كان ما انا عليه فانه يزعجني احيانا فأبحث عن ما هو أقوي و أحسن و أغني و أجمل, و القي نفسي عايز أكون رجل أعمال كبير و معايا ملايين الدنيا علشان اعمل بيها كل اللي انا عاوزة.... و ساعات اقول اني عايز ابقي رئيس الجمهورية ديه و يكون معايا قوة لا مثيل لها أعمل بيها اللي انا عاوزة....و ساعات بتمني اني اكون ابو تريكو ولا عمرو زكي تهز قدمي مدرجات القلوب....و حاجات تانيه كتير انا لو فكرت فيها دلوقتي هموت من الضحك...

نكمل بعدين علشان ورايا مشوار ضروري

يوم بالدنيا

السلام عليكم

يوم صاخب من ايام عمري المعدودة, يوم وقف فيه قلبي اربع مرات ثم ارتعد فرحا, و ارتعد خوفا مرة ثم اطلق صيحات الحماس..
الساعة العاشرة و النصف مساء الخميس, القهاوي منورة و الناس ملو الشوارع مستنيين ماتش الكوت دي فوار, محدش كان بيأمل ان احنا نكسب, الناس كلها متوقعة الهزيمة او التعادل و ضربات الترجيح.. بس فعلها المعلم و اولادة, كسروا شوكة الكوت ديفوار و بهدلهم, دلوقتي نقول من غير شك احنا غلبنا الكوت ديفوار و قلعناهم هدومهم...
بجد السعادة اللي شفتها في الشوارع متتوصفش, ناس غلاااابة و فرحانين بالمنتخب اللي بقي الحاجة الوحيدة فعلا اللي فالحين فيها, الحاجة الوحيدة اللي الحكومة بتفرح بيها الشعب..
امبارح سمعت واحد بيقول: المفروض الحكومة تدي مكافئات للعيبة مليون دولار مش جنيه
واحد رد عليه: يعني الحكومة تجيب منين
قاله: يلموا من اعضاء المجلس, كل واحد نص مليون دولار
........الناس سعيدة بالمنتخب لدرجة انها مستغنية عن فلوسها اللي لاهفينها ممثلين دوائرهم في المجلس..حاجة غريبة..
ما علينا..المهم ماتش البطولة, لما نكسب ان شاء الله نتأكد ان الحاجة الوحيدة اللي فالحين فيها...هي.....الكوووووسسة...هممم.الكووورة

من غير عنوان

بقالي فتره كبيرة بعيد عن عالم التدوين..انشغلت بالمجله ثم الدراسة و حاليا بالاجازة و بجد حاسس بوحدة غريبة جدا, كنت زمان اي حاجة نفسي اتكلم فيها علي طول اكتب بيني و بينك و الناس متابعاني و بترد عليا و كتير جدا استفدت من ردودهم و صححت مفاهيم جديدة كانت خطأ عندي..

بس مش ده اللي انا عاوز أقوله دلوقتي, انا عاوز أقول اني من النهارده مش هبطل كلام و هقول اللي انا عاوزة, انا بسكت كتير و مش بتكلم و باخد جنب لما بكون زعلان او متضايق, تبص في عينيا تقول ده بارد و انا من جوايا مولع حرايق, اخطي خطوة وراها الخطوة و كل مرة اقول انا فايق, يدوبك عيني تغيب عن صحبي الاقي البيه في العوج سايق, يضحك هو يعيش اللحظة وانا بسكوتي المر دايق ... يلعن أبوهم سكوت مفيش, من النهاردة انا عقلي رايق......