قبل اى حاجة عايزة أشكر محمد أوى على تقديمى لبينى و بينك ... بجد مش عارفة أرد على كلامك يا محمد و مش عارفة أقولك ايه غير ان الاحترام و التقدير متبادل و شكرا أوى أوى أوى..عارفة ان دة مش كفاية كرد على اللى قلته عنى بس فعلا مش عارفة كلامك دة ممكن يترد عليه ازاى.
بعد كدة بقى عايزة أقدم نفسى بنفسى ليكى يا بينى و بينك... أنا بنت مصرية, مش أميرة على أرض الواقع لكن يمكن نفسى أكون أميرة فى عالم الأساطير ( و على فكرة انت اللى طلعتها فى دماغى يا محمد), مش أميرة يعنى بنت ملك ولا عايشة فى قصر ولا أحسن من حد غيرى..لأ , أميرة يعنى ليا العالم بتاعى اللى ماشى بطريقة مختلفة عن العالم الواقعى اللى عايشة فيه , عالم هادى و مليان سحر و خيال زى عالم ألف ليلة و ماه برى اللى حكيلك عنها قريب ان شاء الله. عالم أبقى أميرته مش عشان أحكم و أتحكم لكن عشان أمشيه بقانون الأساطير اللى هو مافيش حاجة اسمها مستحيل و فيه أقدر أعيش قصة بتاعتى أنا... كفاية سرحان بقى و نرجع لأرض الواقع...
فى أرض الواقع أنا مشخبطا تية كبيرة, مافيش حاجة بتقع بين ايديا و تسلم من شخبطتى.. كتابة على رسم على خطوط مالهاش معنى .. كل أنواع الشخبطة هتلاقيها فى كتبى و أوراقى و حياتى. أنا عندى اعتقاد ان شخصية الانسان عبارة عن شوية شخبطات اتحطت جنب بعض و بتظهر فى كلامه و تصرفاته وكتاباته و فنه لو كان فنان.
زى ما محمد قاللك يا بينى و بينك , أنا حبيتك من أول مرة شفتك فيها و فرحت أوى لما عرض عليا تبقى أختى أنا كمان , أتمنى انك تسمحيلى أفضفضلك و أوريكى شخبطاتى و أتمنى انها ماتدوشكيش أو تفركش ترتيبك...
أختك الجديدة:
ماه برى
ماه برى
هناك تعليقان (٢):
السلام عليكم
اهلا يا ماه بري, و بجد مش قادر اتسني اني اشوف شخبطاتك..
كان عندي مدرس عربي زمان, دايما بيشوفني بشخبط علي اي ورقة قصادي و اعمل عليها اشكال انا نفسي مش بفهمها.. الراجل ده مرة وقف الحصة و شاف انا بعمل ايه , و قعد يقولي انت هتطلع في دماغك حاجات كتير و كلام كتير و قعد يشرحلي كلام غريب.. ان الخطوط القريبه معناها ان في ضغط و كلام كبير كده :D
يا ريت بقي نشوف شخبطاتك شكلها ايه
شكرا يا محمد على تعليقك... انا فعلا سمعت ان كل خط بنرسمه ليه معنى و بيدل على حاجة جوانا و بجد مصدقة ده..شخبطاتى أهى قدامك بس يا رب ماتكونش نكش فراخ D: D:
إرسال تعليق