يا تلحق يا متلحقش

فكروا معايا كده
لو انت بتجري بأقصي سرعه عندك, و مرة واحده جه حد شبك ايده في ايدك و بيجري معاك, أنت أسرع منه بكتيييير, و مع تشابكه معاك هو قلل سرعتك شويه و انت زودت سرعته شويه و وجدتوا سرعه وسط مابينكم انتوا الاتنين و بكده بقي في ترابط تام ما بينكم, لأنه لو هدي سرعته اكتر من كده هيعطلك و لو انت سرعت اعلي من كده هو هيقع...
طيب فكر معايا كده, لو مره واحده هو ساب ايدك, اندفاعك هيبقي أعلي من سرعتك الحقيقيه فا هيحصل تخبط و تلغبط و ممكن تقع كمان, زي ما بيحصل لما انت بتنزل من اتوبيس و هو ماشي بييبقي جسمك مندفع و سرعتك الحقيقية صفر فابيحصل اضطراب و لو ما حاولتش تظبط سرعتك مع اندفاعك هتقع..

و هذا ما يحدث في سباق الحياة, ناس بتشبك ايديك في ايديهم علشان تقطعوا مشوار الحياة مع بعض, و فمرة واحده يسيبوك و انت مندفع أقصي اندفاع فتلاقي نفسك بتقع و لما هتقع محدش هيسمي عليك, هيبقي قدامك خيار واحد بس, أنك تزود سرعتك علشان تساويها مع الاندفاع, تجري باقصي ما عندك في سباق الحياه, تشتغل و تبني و تعمل و ماتضيعش وقتك و تحاول و تجاهد انك ما تقعش, لأن الوقوع طعمه مر, و في الزمن الغريب ده, مافيش وقت للحزن و البكاء, يا تلحق يا متلحقش...
يا رب ألحق