كايرو...شيكاغو

السلام عليكم
النهارده حصلت حاجة غريبة جدا قصاد عينيا, و مش عايز أقول مدي الدهشة اللي انا كنت فيها, و قد ايه انا ماكنتش متصور ان اللي انا شفته ده ممكن يحصل في مصر و فين في القاهرة ( مدينة ال100 ألف مجند ) و كمان في شارع الهرم السهران بالتحديد...
اللي حصل أن أنا كنت قاعد مع واحد صحبي علي قهوة, و كنا خلاص قايمين نمشي سمعنا صوت صويت و عربية طايرة في الشاعرع بتخبط في الناس اللي ماشية و العربيات اللي واقفة.... و للوهلة الأولي أفتكرنا أن واحد خبط واحده بعربية و جري علشان محدش يمسكه, أنما الحقيقة حاجة تانيه, حاجة فاجرة علي رأي صاحبي اللي كان معايا...

اللي حصل هو أن صاحب العربية ركن عند راديو شاك اللي بعد الطالبية علشان يشتري حاجة, و ساب في العربية مراته و بناتهم ( بنتين زي القمر ), و الغلطة اللي الراجل عملها هو أنه ساب مفتاح العربية في الكونتاكت و قال انه مش هيتأخر, الست و هي قاعدة لاقت واحد غريب ركب العربية و دورها و طلع بيها علي أقصي سرعة يخبط في الناس و في العربيات اللي قصادة, و الست طبعا قعدت تصوت و تقول حرامي بس محدش عرف يعملها حاجة في الشارع و توسلت اليه انه ينزلها هي و عيالها و ياخد هو العربيه بس هو رفض و طلع حقنه من جيبه و قالها ان الحقنة ديه فيها فيروس سي و لو مابطلتش صويت هيحقن حد من عيالها بالحقنة, بس طبعا هي قعدت تصوت بهسيتيريا جوة العربية و هو فضل سايق و مش عايز ينزلها...
المهم الست لما لاقت انه مافيش فايده راحت ماسكه بناتها الاتنين و فتحت باب العربية و نطت منها و سابت العربية باللي فيها, الناس طبها أتلمت علي الست و هي حكتلهم الحكاية طبعا و هي في حالة هيستيريا قوية..... الناس جريت ورا العربية علشان تحاول تلحقها, و اللي قديكمل كمل و اللي تعب رجع, المهم عرفوا شويه تحركات الراجل مشي بيها... و لما جه جوز الست و عرف اللي حصل ركب و اطمن علي مراته و أولاده, ركب موتوسيكل مع واحد و راحوا يدوروا علي العربية...

الناس كلها كان صعبان عليها الست و أولادها, بس أنا كان صعبان عليا الراجل أكتر بكتير, أصل الست شافت اللي شافتة و الحمد لله ربنا نجدها, أنما الراجل و هو جي كان مرعوب علي مراته و أولادة, بس لما أطمن عليهم تحول كل الرعب ده الي غضب كاسر يفترس كل من امامه بلا رحمة, و أنا في اعتقادي أن الراجل جري يدور علي العربية علشان يمسك الراجل اللي سرقها, مش العربية, و أنا لو منه كنت عملت كده, دورت علي الحرامي ده ولو في اخر الدنيا و قطعته بايديا...

الغريب بقي, أن الناس اللي اتلمت كان عددهم أكثر من 100 واحد, يعني 100 موبايل موجود, و 100 مكالمة أتعملت للنجدة و مافيش حد بيرد علي التليفون, و لما حقك مش عارف تجيبه بالقانون, أكيد هيبقي ليك تصرف تاني..
الله يكون في عون الراجل و مايتحكمش علي هيعمله في الحرامي لما يمسكه..

نصيحة مهمه جدا: أوعي تسيب المفتاح في العربية لما تنزل, خليها خطوة ثابته عندك و أنت بتركن, مور و بطل العربية و خد المفتاح في ايديك و بعدين أنزل.... و أدعي دايما أن ربنا يحفظك و يحفظ من تحب.. و كمان أتفرج علي أفلام أجنبي كتير علشان تعرف ايه اللي مكن يحصلك لو رحت شيكاجو...قصدي القاهره...