السلام عليكم
صعب انك تعيش وسط عالم طويل و عريض و حاسس انك لوحدك, حاسس ان مقاس العالم ده واسع عليك قوي و انك علي مدي بصرك مش شايف حد قريب منك, و تحس ان الناس أطياف, أشباح, مهما تزعق و تقول ولا هما هنا.. يا ناس انا بحبكم... يا ناس انا عايزكم .... يا ناس بصولي شوية ... ولااااااا هما هنا... كل واحد مشغول في دنيته. ماهو ليه حق هيفكر في مين ولا مين في الدنيا السريعة ديه اللي لو نام فيها هتروح عليه... ماهو لازم بقي يبص لنفسه ...
طب و بعدين.. انت كده هتموت مالوحدة, لازم تعيش وسط الناس و تحس انك موجود,, قصادك حلين بيكملوا بعض:
يا اما تبقي شيء يهمهم و يشدهم اليك بدافع مصالحهم برضوا
يا اما تخلق لنفسك جواك ناس
فيها ايه لما تخلق اهلك زي ما تحب يكونوا ؟؟
اخلق اخواتك اللي انت عايزهم ؟؟؟
ربنا خلقك و خلق الكون
و اختص التكوين من عدم لنفسه
بس اداك مساحة تتمتع فيها بالخاصية الالاهيه اللي هي الخلق من عدم
المساحة ديه هي عقل ... خيالك
ايه المانع انك تستغل ده و تخلق لنفسك العالم اللي نفسك تعيش فيه ؟؟
اهتم بقي بالتفاصيل و ارسم كل حاجة علي زوقك
و عيش في العالم اللي انت خلقته
شوية .. و هتلاقي العالم اللي انت خلقته .. اللي نفسك تعيش فيه .. موجود قصادك في الحقيقة مع اختلاف الادوار
هتلاقي اهلك اللي نفسك فيهم في ناس تانيين
و اصحابك في ناس تانيين
و رزقك هتلاقيه
و مظهرك
و حبك لنفسك
و حب الناس ليك
هتوصل بقي لشيء اسمه
الرضا
ايوة هو ده الرضي
اوعي تفتكر ان الرضي ده يعني ترضي باي حاجة
لا مترضاش غير باللي انت عايزة
و اللي مش عايزة و مقدرلك
ابعد عنه و استخدم خيالك
اخلق اللي انت عايزة
و ارضي بيه
انسي بقي انك وحيد
متقلش كده تاني
انت عبد في الكون
و اله جوه نفسك
و لو مش مصدقني
اسأل نفسك
هي روحـــــك ديـــه مــــصــــدرهـــا ايـــــه ؟؟
هناك تعليقان (٢):
الفكرة اللي عايز توصلها جميلة وان كانت بعيد عن الواقعية شوية وأنا مش برجح فكرة اللاواقعية أوي وان كنا بنحتاجها سعات..بس في ملحوظة..مش صح أبدا ً تقول أنت اله..زي العنوان..وزي كذا جزء جوا الموضوع..أنا عارف انت عايز تقول ايه من موضوعك..بس حتي الانسان مش اله نفسه أبدا ً..النفس والعقل والروح والخيال وكل شئ هو ملك لله...انت مجرد أمين علي كل دا
السلام عليكم
أنت معاك حق في نقطة ني مكانش يصح أقول " أنت اله " .. الأهم ان أنت فهمت وجهه نظري ..
بس مساحة الخيال اللي ربنا اعطاهلنا لو استعملناها صح هتساعدنا كتير في حياتنا, لأن مش كل شيء هيجرالنا هو اللي احنا عايزينه, يبقي نرضي بحكم ربنا و في نفس الوقت نرسم في خيالنا الصورة اللي عايزينها .. نعيش بيها شوية ..
مثلا المرض, المريض في أشد حالات الألم لو حاول يخرج من الحالة بأنه يتخيل انه سليم و معافي و انه ناله الشفاء, ده هيساعدة اكتر علي انه يستحمل ابتلاء ربه .. ده لو فعلا قدر يبعد عن الألم بخياله..
علي العموم .. كلها أفكار .. و كلها خيالات .. و طرق نتعامل بيها مع نفسنا علشان نعيش .. و في الاخر الدنيا مش بتبقي لحد .. كلنا فيها زوار .. و شكرا علي ردك
إرسال تعليق