الاثنين، يوليو ٣٠

شوف بقينا فين

أنا مش عارف اقول ايه ولا ابدأ ازاي
بس أنا ماكونتش متخيل اني ممكن اوصل للدرجة ديه من الفضي, الفضي يعني أنا فاضي مش ورايا حاجة ولا بعمل حاجة
زمان كنت علي طول مشغول, كنت علي طول بقرأ و بتعلم و أنزل و ألف و أشترك في حاجات كتيي و أعمل حاجات كتيير, دلوقت يانا فاضي جدا

انا من كتر الفضي بقيت مقضي النهار نوم, و طول الليل قاعد علي القهوة :) زمان كنت طول النهار بشتغل و طول الليل لعب كورة
أنا مش عايز ارغي ولا أتكلم, أنا عايز بس أعرف انا ليه باقيت كده ؟؟
أنا لما بحاول أعرف الاجابة بفتكر الثانوية العامة الهباب و اللي عملته فيا, انا في الثانوية العامة وقفت حياتي كلها عشانها و في الاخر مخدتش حاجة منها, سبت كل الحاجات اللي انا كنت بتعلمها و ركزت في الثانوية العامة بس, مع ان في ناس كتيير كانت بتعمل كل حاجة و في نفس الوقت تفوقت في الثانوية العامة.
السؤال دلوقتي
هل هو سوء تنظيم وقت مني؟
ولا نصيب ؟
و لا غباء مني ؟
أنا بجد محتار, عايز أعرف انا بقيت كده ليه و ممكن أرجع زي ما كنت ولا لأ ؟ ؟ ؟ ؟ ؟ ؟ ؟ ؟

هو في ناس لسة معتقدة اني مميز بس انا مش عارف انا مميز في ايه ؟؟
زمان كنت عارف انما دلوقتي لأ ... أنا اه طيب و بحب الناس و ساعات دمي بيبقي خفيف و لما بحط دماغي في حاجة بنجزها بس برضة أنا مش عارف هكمل تعليم فين و مستقبلي مبهم
أنا مش قدامي حاجة غير اني استني الجواب, بس هو هيجي امتي ؟؟

دعاء مواطن مصري مطحون


دعاء مواطن مصري مطحون
اللهم أنقذنا من نرفزة الزملاء..
وغباء الأصدقاء
ومفاجأة الأعداء
اللهم ارحمنا من استبياع الجيل الجديد..
وحرائق السكة الحديد واستقصاد كل مدير..
ونداله القرايب الصغير منهم والكبير
اللهم أغثنا من كل عميل..
ومن فواتير موبينيل اللهم أرحمنا من تشريفه عربيات المسئولين،
وزحمة الشوارع في كل حين وسحب الرخص في كل كمين..
من الغلبان مش م المتين
اللهم اهدى لنا سواقين الميكروباص
ومدير الشركة الباص
اللهم ارحمنا من الشئون القانونية وشئون العاملين
واللي بيقفوا فـ وسط الشارع فجأة وبدون إشارة يمين
اللهم قنا شر الكليبات..
وشر شلل البنات..
ولؤم الستات
وغباوة الحموات
والميني مم تشارج كافيهات..
وهيافة الصحف والمجلات
وقطع الحرارة فجأة عن التليفونات
وقت الزنقات والمدارس اللي بتطلب تبرعات بالألافات ووقوع السيرفر وقفلة السايتات
اللهم ارفع مستوى الفريق القومي..
لمستوى أنبى والحدود.. أو حتى مستوى أسمنت أسيوط
أو أرسل يارب عليه صاعقة.. بدل ما يخلونا نموت..
اللهم سدد أقساطنا..
وضلل عنا مآمير الضرايب اللهم ارزق جيل الوسط عقود عمل في ليبيا وقطر
اللهم افتح لجيلنا القديم الطريق الفسيح
حتى ننظف انتخابات البلد من لعبة المراجيح
اللهم ارحمنا من الاكتئاب مرض العصر والشباب
واحمي يارب سماء مصر من سحابة الهباب
واكفنا شر صاحب الدقن الكداب وصاحب تصريحات النصاب
اللهم ارزق كل بنت بعريس هدية..
وكل شاب بوظيفة وشقة وعربية
اللهم أحرق الـ0900
واضرب الحرامية بالحرامية
ونجح أي طالب في أي كلية
حتى ولو كان في التربية الموسيقية
(من غير زعل)
اللهم أمين
اللهم أمين
اللهم أمين أمين يارب العالمين

السبت، يوليو ٢١

عمري


أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

الثلاثاء، يوليو ١٧

الليلا دي

تضاربت الاراء علي ألبوم عمرو الجديد, ناس بتقول أنه أوحش ألبوم عمرو عمله و ناس تانية عاجبها الألبوم جدا
أنا عن نفسي حابب الألبوم جدا و خصوصا الاغنيات ديه
الليلادي
نئول ايه
حكايات
خليك معايا

و علي فكرة أنا مش عمراوي أنا منايري بس الألبوم عاجبني برضة

جبت ؟؟؟

77%

الرقم اللي فوق ده بيمثلك ايه؟؟؟؟

أنا بقي بيمثلي نتيجتي في الثانوية العامة المصرية الحديثة
فضيحة بجلاجل

بس و الله هـــــي أكتر واحدة فاهماني و رأيها كان أكتر رأي يهمني, و الحمد لله ربنا هداهالي
ربنا يقدرني و أسعدها

متسئلوش هي مين

الاثنين، يوليو ١٦

أنا خايف

مرعوب و الله

بكرة في الفجر نتيجة الثانوية العامة هتطلع, و ده معناها ان الفجر مش هيطلع بكرة عشان انا مستني النتيجة بتاعت حضرتي لأن الباشا في ثالثة ثانوي و قطم وسط أهله بقاله سنتين مطلع عنيهم ليل و نهار و هو نايم و هو صاحي مالاخر لو ما اتجدعنش السنة ديه يبقي خسارة فيه اللقمة اللي بياكلها و خسارة فيه النوم اللي بينامة هنسيبة و نبص بقي لاخواته يمكن حد يفلح فيهم من بعده, و لا عن ما حد فلح خالص


لأ و كمان ايه السنة اللي فاتت خسع و جاب 83% و قال ايه كمان مكمل علمي رياضة يعني قفلها في وشة و حرم نفسة أنه يبقي محترم و هيعيش طول عمرة مهزأ ولا هتقوم له قومة لو ما عملش حاجة السنة ديه

عشان كدة انا مرعوب
أنا حكايتي حكاية مع الثانوية العامة ديه, و اللع العظيم تعبت و تعبت جامد قوي كمان بس أعمل ايه ده نصيبي, انا متأكد أنا خرفت في الامتحانات السنة ديه و هجيب مجموع زي الزفت و بعترف اني ما ذاكرتش السنة ديه خالص, بس لما الواحد يكون تعب في حاجة و في الاخر ماتجيلوش و تروح لناس كان شاكك انهم حتي يحلموا بيها, أكيد الواحد ده هيجيلوا احباط و هيبقي مش مستعد يتعب تاني و ها انا هنا

ربنا يستر

الأحد، يوليو ١٥

أفتتاح المدونة

السلام عليكم و رحمه الله و بركاته
بيني و بينك, ده اسم المدونة اللي ان شاء الله, هشتغل فيها, و الواضح من الأسم أن كل الكلام اللي انا هكتبه هنا هيكون بيني و بينك يعني من صاحب لصاحبه

أنا عملت المدونة ديه لأني محتاج لمساحة أكتب في ارائي في كل حاجة, في السياسة و العلم و الدين و الرياضة و كل حاجة, و حتي عشان أكتب رأيي عن نفسي و عن مشاكلي الخاصة, و حابب تكون المدونة ديه هي "عالمي الصغير " اللي بتكلم في مع نفسي و اسمع صدي صوتي من غير ما حد يحجبه
في الأول أنا كنت بدون في كراسة أو كشكول, بس انا حسيت ان ده مش كفاية, انا مش هستفيد حاجة لما اكتب و أقرأ لنفسي, لازم الناس تشوف انا بفكر ازاي و دماغي ماشيه ازاي و احاول اني أوصل أفكاري للناس

دورت في مدونات كتيرة جدا عشان الاقي نماذج اتبعها, و بصراحة في مدونات كتيير عجباني جدا و خصوصا المدونات اللي عاملينها طلاب في الجامعة, لأنها بجد بتعبر عن حال البلد, قرأت لمدونين كتير ولاد و بنات و أعمار مختلفة و حسيت ان كتير منهم قريب من تفكيري و ممكن يفهموني لأني من النوع اللي مبيتفهمش بصراحة, من صغري و أنا كدة عامل زي زعيم العصابة بتكلم قليل و بفكر كتير عشان كدة محدش بيفهمني أو محدش بيعرف يقرأني

في البداية أنا كنت عايز ادون باللغة العربية بس أنا فضلت العامية عشان أعرف أقول قشطة و كوول و الكلام دة, و بما أنب بكلم أصحابي فأنا مش هقولهم كيف حالكم و هقول ازيكم يا عيال و كده يعني.

أنا بقي حابب أعرفكم بنفسي
الأسم: محمد سعيد
السن: 17 و 1/10 هدخل الــ18
الدراسة: أنا مخلص ثانوية عامة و حاليا مستني التنسيق و هبقي أحكيلكم علي الثانوية العامة بتاعتي
أنا نفسي أتعرف علي مجتمع المدونين و يا ريت الاقي فيه اللي انا بدور عليه, و لو ملقيتش هدور في حته تانيه لأني بجد عايز اتكلم بس الكلام بيني و بينك