هجاوب هجاوب

السلام عليكم
انا جاني تاج من غالية (مدونة بكرة أيد أحلي ), و الواضح ان أنا هجاوب هجاوب

لو قالولك اختار عصر من عصور مصر علشان تعيش فيه تختار اى عصر و فى عهد اى حاكم..واشمعنى.؟
هختار أعيش في فترة حكم الملك فاروق, و كنت هحاول أقنعه انه مايسلمش البلد يوم 23 يوليو و كنت هكون مستعد اني اضحي بنفسي لو كان ده هيخليه علي عرشة, و ده لأني مقتنع بليون في الميه أن يوم 23 يوليو هو أسولأ يوم في التاريخ المصري كله...صحيح اني ماعشتش الايام ديه الا اني بنيت موقفي من قرائاتي,و انا كان نفسي البلد تفضل تحت حكم ملك ثم ملك ثم ملك

اول اولويه فى حياتك عيلتك , شغلك ولا اصحابك؟
لحد دلوقتي شغلي, بس لما أتجوز هيبقي أكيد عيلتي..
أما أصحابي فماقدرش أعيش من غيرهم خصوصا ناس معينين

ايه اكتر حاجه بتحبها فى رمضان؟
كنت زمان بحب في رمضان اللمة و تجمع العيلة, بس دلوقتي خلاص, مباقتش احب في رمضان غير ساعة الافطار و الامساك.

اوصف ليا اجمل فطار ممكن تفطره
في بيتي مع مراتي و أولادي, لما أتجوز يعني

لو انت حاكم على مجموعه من الافراد هتكون عادل؟؟
طب هتعمل ايه عشان تتأكد انك حاكم عادل؟
هكون عادل اني ماظلمش حد فيهم لحساب حد, و هتأكد من كده عن طريق اني اسمع من الاطراف كلها, و استشير الناس و اسأل ربي الصواب و اتوكل علية, و بكده هكون متأكد, و أكيد في مقاييس تانية, بس هو ده اللي في دماغي دلوقتي...

اللى بيبوظ الحكام نفسهم ولا الشعب؟
ولا الحاشية المقربة؟
اللي بيبوظ الحاكم نفسه, لأنه لو حاكم كويس و عندة شخصية محدش هيأثر فيه..

مين أكتر اعلامي مصري بتحترمه؟
محمود سعد

قريت ديوان عمر مصطفى صاحب بلوج تجربه(اسباب وجيهه للفرح) عن دار ملامح ولا لسه
ولو آه ايه رأيك فيه؟؟
لا, انا بحب الشعر العامي و الخفيف

ايه تانى بلد تتمنى تعيش في بعد مصر؟
وانا مصري, ماحبش أعيش غير في مصر, لو انا اي جنسية تانيه, اتمني أعيش في الامارات عشان هيجي يوم من الايام و تبقي درة العرب

اوصف ليا ترتيبات اجمل فرح ممكن تحضره
ولا حاجة, يكون كل حبايبي موجودين

بتراعي كلام الناس والقيل والقال؟
لو اه او لو لا قول لى ليه؟
لا خالص, ولا باحط في دماغي الكلام ده, لو عليا مبسألش...انما لو علي بنت, مبستحملش

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
هرجع أنام تاني

السعاده هي ؟
اني اشوف الناس اللي بحبها سعيدة

عندك أمل؟؟
أسبابك؟
ايوة عندي, عشان في ظروفي ديه لو ماكنش عندي هموت

لما تحب تهرب من كل شئ بتروح فين؟
انا مابهربش من اي حاجة, بس ساعات بطنش حاجات انا شايفها مش ضرورية

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
يوم ما باقيت مسئول ولو بنسبه 10% عن شخص

لما بتعمل عمل خيرى بيكون ايه هو دافعك الاول؟
بصراحة, اني اشوف اللي قصادي سعيد, و ساعتها بكون مطمن من رضا ربي

بتشرب سجاير؟
لو الاجابه اه ايه شعورك لو شفت ست بتشرب سجاير؟
وليه؟
كنت و بطلت, و لو شفت بنت انا اعرفها بتشرب هبهدلها عشان مفيش ملائكة بتشرب سجاير

بتعرف ايدك اليمين من الشمال ازاي؟
هي بتيجي كده

ايه اكتر اله موسيقيه بتحبها؟
العود و الناي

ايه الحاجه اللى لو حصلتلك تبقى سعيد قوى؟؟؟
يبقي عندي بنت

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
فلوس في البنك, لأني ماليش في ولا حاجة من دول

البحر و لا النيل؟؟؟
البحر طبعا, لأن موج البحر هو كلامه, بيشد و يفرد معاك, انما النيل صامت, بس بحبه برضه

مركب و لا طياره؟؟
مركب

مجنون و لا عاقل؟؟
أنا عاقل بس ساعات بميل للجنون

تقرى كتاب و لا تتفرج عليه فيلم؟
أتفرج عليه فيلم عشان أحس بيه

بتمرر التاج لمين؟؟؟
للي يدخل و يقرأه