بدور علي السبب و جمع السبب أسباب
بدور علي الهدف و لكل هدف باب
باب ينفتح علي سكة
السكة اخرها نور
للمشي فيها صعاب
و لكل باب مفتاح
مفتاح في ايد الحلوة
الحلوة أم الضحكة
ترسم بيها السعادة
السعادة لعبة اجادة
يا اما تنجح و تنول
يا اما تنتهي علي طول
بدور في عيون الناس
و في وقفه الحراس
علي واحد كان صغير
كان حلمة حاجة كبيرة
كان نفسه يلاقي نفسة
كان حلمه يعلي فوق
من غير ما يبص تحت
كان نفسة يلقي ايد حوالية
و عنين بتبص عليه
و كلمة ترد الروح
و يلاقي اجابه ليه
ليه الدنيا بتضحك ساعة
و تكشر ألف ساعة
ليه ساعات الألم بتمر علي الجرح
بدل المرة ألف مرة
و تبص للساعة تقول
اجري خلصيني
تلاقي العقارب واقفة
بتضحك عليك
بتستفزك
مستحلفه لاتهدك
مسكينة الروح الحزينة
اتحطت في جسد مخزن
يلعب و يتلاعب بيها
تخلص اللعبة يرميها
و يحط عليها التراب
و ميسألش عنها تاني
وكأنها كانت سراب
أمتي السؤال امتي الحساب
أمتي نلاقي نهاية العذاب
عذاب السؤال
سؤال الحياة و الوجود
سؤال الكون لعبد الله
وحياتك هتجاوب و الا
هتعيش عذاب و تموت عذاب
السؤال
...............................
اسئلوا انتوا السؤال
هناك تعليقان (٢):
السلام عليكم :
ايه يا جماعه اخد اجازة من الشغل يوم واحد ارجع الاقيكوا قلبنها دراما
السؤال عاوز اجابة انا مش هسأل انا هجاوب
احنا عايشين ليه ؟
عشان نعبد ربنا ونعمر الارض قلي انته بقه عملت ايه عشان لما تروح تتحاسب يبقي في عمل كبير تقوله لربك يوم الحساب
زينا كلنا ولا حاجه ....
اقولك العمل الصالح في حد زاته هوه العمل اللي هيخليك تقدر تعيش ولما يسترد الله وديعته تقابله وانته مطمئن
العمل الصالح يكون بالايجابيه والاصلاح للفساد اللي مالي الكون حوالينا
كام مرة قلت لا واصريت عليها ؟
كام مرة كنت ايجابي وعملت حاجة بجد ؟
كام مرة لقيت حاجه غلط ورحت اعترضت وقلت لا ده مش هيحصل في بلدى ؟
كام مرة واحد اخد فرصك في الحياة وانته طنشت وقلت وايه يعنى ؟
احنا السبب في كل اللي وصلتله بلدنا متلومش غير نفسك
احنا الشباب عماد المجتمع زى ما قال سيدنا محمد عليه الصلاة والسلام
اعذرنى انا كنت قاسية حبتين بس كان لازم
انا بس عاوزاك تشوف الجانب المضئ مش بس الجانب المظلم وتقعد تقول نهاية العذاب ده ايه والكلام اللي هيخليك دايما شايف الصورة سودا
لما تعمل عمل صح وتثابر عليه وتلاقي نتيجه لده صدقنى هتلاقي الصورة اوضح واسعد من كده بكتييير .
واحدة
السلام عليكم
شكرا لكلامك يا فراشة...
كل كلمتين قلتيهم صح, كل سطر أصدق مالسطر اللي قبلة, و كل نقطة أهم من اللي بعدها.
باختصار و من غير لف و دوران, الكلام كلة مافهوش حاجة غلط..
أنا عايز أقول بس أن أنا مش ببص خالص علي الجانب الأسود أو أو... لا خالص انت لو شفتيني هتقولي الواد ده مبيكشرش لحظة ( يمكن بفكر كتير انما مش بكشر كتير )... أنا بس ذي ما تقولي مقبل علي ثورة تصحيحية في حياتي علشان أقدر أوصل بيها للي أنتي بتتكلمي عنه, و الخطوة ديه محتاجه جرأة و شجاعة, محتاجة دعم من اللي حواليا, محتاجة رأي الناس...
أنا مش هقبل ابدا أني استسلم لحياة الحيوانات اللي بيعيشوا و يموتوا و اثرهم يروح’ أنا عايز فعلا يوم الحساب اقول بكل اطمئنان و راحة أني قدمت كذا و عملت كذا.... و ده شيء صعب بس واجب..
شكرا لزيارتك, و متغيبيش كتييير عالينا علشان الدنيا بتضلم :D:D:D
إرسال تعليق