سألتيني هي عامله ازاي

سألتيني هي عامله ازاي؟؟
هقولك دلوقتي, بس أوعديني تغمضي عينيك و تفكري فيها...
علشان اما اكلمك عليها تفتكريها...

هي... قصيرة
أقصر شوية صغيرة مني
يعني أما افتح ذراعاتي
تطول حضني

هي... سمرة
سمارها مصري بدلع
عينيها بتلمع فوق خدودها
زي النجوم في السما

هي... ضعيفة
بتخاف مني عليا
تستخبي مني فيا
تشكيلي مني

هي... شقية
مش بتعرف تقعد في مكان
يوم ما الكسل يمسكني
تطردة بنظرة عين

هي... جريئة
تتكلم بكل صراحة
يعني لما تعوز مني حاجة
تطلب بأمر الدلع

هي... موجودة
ليها أسم و ليها كيان و رأي
مش كل حاجة أيوة صح و حاضر
لما اكلمها مسمعش صدي صوتي

أوعديني تفضلي فاكراها
علشان لما اسألك عليها تبقي عارفاها